Zakaria
13 “Ngöne la drai cili, tro ha fe la ketre qeqe ne tim matre tro la itre matra i Dravita, me angetre Ierusalema a siënetrije la itre ngazo me itre huliwa ka sis i angatr.
2 “Ngöne la drai cili,” öni Iehova joxu ne la itre trongene isi e hnengödrai, “Tro ni a köletrije la ëjene la itre idrola qa ngöne la nöj, nge tha tro hmaca kö a meku angatr. Tro fe ni a apatrene la itre perofeta qa ngöne la nöj, memine la itre huliwa ka sis.* 3 Nge maine tro hmaca la ketre atr a perofeta, tro hë la kem me thin ka hnaho angeic a hape: ‘Tha tro hmaca kö eö a mel, ke hnei ö hna thoi ngöne la ëje i Iehova.’ Eje hi, tro la kem me thin ka hnaho angeic a jaqa angeic, pine angeic perofeta.
4 Ngöne la drai cili, tro asë hi la itre perofeta a hmahman la hnei angatr hna meköl goeën, ngöne la angatr a perofeta. Tha tro kö angatr a heetrëne la iheetr ne perofeta hna kuca hnei pene öni, matre iaöne la itre atr. 5 Nge tro hë angatr a qaja ka hape: ‘Tha ka perofeta kö ni, ngo ka eënyi pe, ke hna itö ni hnene la ketre atr, lo co petre kö ni.’ 6 Nge maine troa hnyingë angatr ka hape: ‘Hnauën la kola eatr la lue iape* i ö?’ Tro hë angatr a sa ka hape: ‘Hna lepi ni ngöne la hnalapa ne la itre sineeng.’*
7 “Taua fe, cile jë kowe la atre thupë mamoeng,
Kowe la sinatrongeng!” öni Iehova joxu ne la itre trongene isi e hnengödrai.
“Lepe ju la atre thup, nge loi e isa ije pi la hnënge mamoe!
Nge tro hë ni a amekötin la itre hna wangacon.”
8 “Eje hi, ngöne la nöj asë,” öni Iehova,
“Ala nyimu la hna troa xome* qa lai me humuth,
Nge xalaithe pe hi la ka troa lapa pe.
9 Tro hë ni a dreuthe hnei eë lai ala xalaith.
Tro hë ni a nyidrawa angatr tune la hna kuca kowe la sileva.
Nge tro hë ni a waipengöi angatr matre wang la esisitria i angatr tune la gool.
Tro angatr a hëne la ëjeng,
Nge tro ni a sa koi angatr.
Tro ni a hape: ‘Angatre la nöjeng,’
Nge tro angatr a sa ka hape: ‘Iehova la Akötresi hun.’”