Hnaaluene Tusi Itre Joxu

15 Ngöne la kola 27 lao macatre ne mus i Ieroboama* e Isaraela, hna acili joxu Azaria* nekö i Amazia qa Iudra. 2 Nge 16 lao macatre i nyidrë lo kola acili joxu nyidrë. Hnei nyidrë hna mus koi 52 lao macatre e Ierusalema. Iekolia la ëjene la thine i nyidrë, föe ne Ierusalema eahlo. 3 Azaria a kuca la loi koi Iehova, tui Amazia keme i nyidrë. 4 Ngo tha hna apatrene kö qa ngöne la nöj la itre hnë hmi gaa hmitrötr. Nge itre atrene la nöje pala kö a tro fë huuj e cili, me huhajine la itre huuje i angatr. 5 Hnei Iehova hna lepe la joxu hnei mec, matre lepera ju pë hë Uzia joxu uti hë la nyidrëti a mec. Hna pane ami nyidrëti cas ngöne la ketre uma, nge Iotham nekö i nyidrë, la ka cilëne la uma i joxu me amekötine la nöj. 6 Nge ame la mele i Azaria me nöjei huliwa i nyidrë, hna fejan asë hnine la itusi ne la mele ne la itre joxu ne Iudra. 7 Ame hnei Azaria hna meköl me itre qaaqaa i nyidrë ngöne la mec, nge hna kelemi nyidrë me angatr ngöne la Traone i Dravita. Nge hna acili joxu Iotham nekö i nyidrë, troa nyihna i nyidrë.

8 Ngöne la kola 38 lao macatre ne mus i Azaria joxu ne Iudra, hna acili joxu Zakaria nekö i Ieroboama, troa joxu ne Isaraela. Hnei nyidrëti hna mus e Samaria koi 6 lao treu. 9 Nyidrëti a kuca la ngazo koi Iehova, tune lo aqane kuca ne la itre qaaqaa i nyidrë. Tha mano kö nyidrë kuca la itre ngazo hna kuca hnei Isaraela, fene lo mus i Ieroboama nekö i Nebata. 10 Matre hnei Saluma nekö i Iabese, hna thele troa humuthi Zakaria. Angeic a humuthi nyidrëti jë e Ibeleama, me cil troa joxu. 11 Nge ame la mele i Zakaria, hna fejan asë hnine la itusi ne la mele ne la itre joxu ne Isaraela. 12 Qa ngöne lai, eatre hnyawa ha la hnei Iehova hna qaja koi Iehu ka hape: “Tro hë la itre nekö i eö trahmany a lapane la therone i Isaraela, koi 4 lao xötr atr.” Celë hi aqane trongen.

13 Hna acili joxu Saluma nekö i Iabese, hmekune la kola 39 lao macatre ne mus i Uzia joxu ne Iudra. Hnei Saluma hna musi koi ca treu ka pexej e Samaria. 14 Hnei Menahema nekö i Gadi hna tro qa Tireza a tro Samaria, me humuthi Saluma nekö i Iabese. Nge angeic a cile jë troa joxu. 15 Nge ame la mele i Saluma, memine la aqane thele nyidrë troa humuthe la joxu, hna fejan asë hnine la itusi ne la mele ne la itre joxu ne Isaraela. 16 Nge ngöne la ijine cili, hnei Menahema hna tro qa Tireza, me humuthe la nöjei atrene Sifesa, me itre ka lapa xötreith. Hnei nyidrëti hna ujë tun, ke xele kö la itre atrene la traon ma fe qëhnelö koi nyidrë. Nyidrëti a humuthe pi la itre atrene Sifesa, me kuluhmathe la itre ka upune.

17 Ngöne la kola 39 lao macatre ne mus i Azaria joxu ne Iudra, hna acili joxu Menahema nekö i Gadi, troa joxu ne Isaraela. Hnei nyidrëti hna mus e Samaria koi 10 lao macatre. 18 Nyidrëti a kuca la ngazo koi Iehova. Nge ngöne la mele i nyidrë, tha mano kö nyidrë kuca lo itre ngazo hna kuca hnei Isaraela, fene lo mus i Ieroboama nekö i Nebata. 19 Nge ngöne la ketre drai, hnei Pula joxu ne Asuria, hna lö hnine la nöje Isaraela. Matre hnei Menahema hna hamëne koi Pula la 1 000 lao talane* sileva, matre xatua nyidrë troa acatrene la mus i nyidrë kowe la baselaia ne Isaraela. 20 Hnei Menahema hna musinëne la nöjei trenamo e Isaraela troa kuiëne la 50 lao sekele* sileva, matre ijije tro nyidrëti a hlem me kuiëne la mani kowe la joxu ne Asuria. Ame hnene la joxu ne Asuria hna bëeke hmaca, me mejë qa Isaraela. 21 Nge ame la mele i Menahema me nöjei huliwa i nyidrë, hna fejan asë hnine la itusi ne la mele ne la itre joxu ne Isaraela. 22 Ame hnei Menahema hna meköl me itre qaaqaa i nyidrë ngöne la mec. Nge hna acili joxu Pekahia nekö i nyidrë, troa nyihna i nyidrë.

23 Ngöne la kola 50 lao macatre ne musi i Azaria joxu ne Iudra, hna acili joxu Pekahia nekö i Menahema, troa joxu ne Isaraela. Hnei nyidrë hna musi koi 2 lao macatre e Samaria. 24 Nyidrëti a kuca la ngazo koi Iehova. Nge tha mano kö nyidrë kuca lo itre ngazo hna kuca hnei Isaraela, fene lo mus i Ieroboama nekö i Nebata. 25 Hnei Peka nekö i Remalia, lo tane isi i nyidrë, hna thele troa humuthi nyidrë. Matre hnei Peka hna humuthi Pekahia hnine la hnahag ka draië ne la hnalapa i joxu. Ce angeic me Aregoba me Arie, me 50 lao trahmanyi ne Gileada. Celë hi matre hnei Peka hna joxu thupei Pekahia. 26 Nge ame la mele i Pekahia me nöjei huliwa i nyidrë, hna fejan asë hnine la itusi ne la mele ne la itre joxu ne Isaraela.

27 Ngöne la kola 52 lao macatre ne musi i Azaria joxu ne Iudra, hna acili joxu Peka nekö i Remalia, troa joxu ne Isaraela. Hnei nyidrë hna musi koi 20 lao macatre e Samaria. 28 Nyidrëti a kuca la ngazo koi Iehova. Nge tha mano kö nyidrë kuca lo itre ngazo hna kuca hnei Isaraela, fene lo mus i Ieroboama nekö i Nebata. 29 Ngöne la ijine mus i Peka joxu ne Isaraela, hnei Tigelathe-pilesera joxu ne Asuria, hna traqa troa lapane la itre traon ne Ion, me Abela-bethe-maaka, me Ianoa, me Kadesi, me Hazora, memine la götrane Gileada, me Galilaia, memine la nöje Nafatali asë. Hnei nyidrëti hna xolouthe la itre atrene la itre traon, me kötre fë a tro Asuria. 30 Nge e thupen, hnei Hosea nekö i Ela hna thele troa humuthi Peka, nekö i Remalia. Ame hnei Hosea hna humuthi Peka, me nyihna i nyidrë troa mus. Hna traqa lai hmekune la kola 20 lao macatre ne mus i Iotham, nekö i Uzia. 31 Nge ame la mele i Peka me nöjei huliwa i nyidrë, hna fejan asë hnine la itusi ne la mele ne la itre joxu ne Isaraela.

32 Ngöne la kola lue macatre ne mus i Peka joxu ne Isaraela, nekö i Remalia, hna acili joxu Iotham nekö i Uzia troa joxu ne Iudra. 33 Traqa koi 25 lao macatre i nyidrë lo kola acili joxu nyidrë. Hnei nyidrë hna mus koi 16 lao macatre e Ierusalema. Ierusa la ëjene la thine i nyidrë, nge eahlo la nekö i Zadoka. 34 Iotham a kuca la loi koi Iehova, tui Uzia keme i nyidrë. 35 Ngo tha hna apatrene kö qa ngöne la nöj la itre hnë hmi gaa hmitrötr. Nge itre atrene la nöje pala kö a tro fë huuj e cili, me huhajine la itre huuje i angatr. Nge nyidrëti hi lo ka xupe la qëhnelö ka he koho ne la uma ne hmi i Iehova. 36 Nge ame la mele i Iotham me nöjei huliwa i nyidrë, hna fejan asë hnine la itusi ne la mele ne la itre joxu ne Iudra. 37 Ngöne la ijine cili, hnei Iehova hna nyiqane upe la joxu Rezina ne Suria, me Peka nekö i Remalia, troa isi me Iudra. 38 Ame hnei Iotham hna meköl me itre qaaqaa i nyidrë ngöne la mec, nge hna ce kelemi nyidrë me angatr ngöne la Traone i Dravita. Nge hna acili joxu Ahaza nekö i nyidrë, troa nyihna i nyidrë.