Iosua

20 Matre öni Iehova jë hi koi Iosua: 2 “Hape jë kowe la angetre Isaraela: ‘Iëne jë thatraqai epun la itre traon ne kötre mel, tune lo hnenge hna amekötin koi epun jëne Mose, 3 matre tro la ka humu atr nge tha hna thë kö,* a kötr kow ej. Tro la itre traon cili a nyine kötre mel, matre kötrene la atre ti madra.* 4 Nge tro la ka humu atr a kötr kowe la ketre traone cili, me cil ngöne la qëhnelö ne la traon, matre qejepengöne la ewekë ka traqa kowe la itre qatr ne la traone cili. Nge tro hë angatr a kepe angeic ngöne la traon, me thue götrane i angeic troa lapan. Nge tro hë angeic a ce mel me angatr. 5 Maine tro la atre ti madra a weji angeic, tha tro kö la itre qatr a nue angeic kowe la ka ti madra, ke tha hnei angeice kö hna thë troa humuth lo atre lapa ezi angeic, nge tha hnei angeice kö ekö hna methinëne la atre cili. 6 Loi e tro angeic a lapa ngöne la traone cili, uti hë la troa kootrë angeic hnene la icasikeu. Tro hë angeic a lapa ngöne la traon, uti hë la kola mec la atre huuj ka sisitria ka huliwa ngöne la ijine cili. Nge e cili, ijiji angeic hmaca ha troa bëeke kowe la traon hnei angeic hna trotrij, me kowe la hnalapa i angeic.’”

7 Ame hnei angatr hna ahmitrötrën* la itre traone celë: Kadesi e Galilaia ngöne la itre wetr ne la götrane i Nafatali, me Sekema ngöne la itre wetr ne la götrane i Eferaima, me Kiriath-Areba, ene Heberona, ngöne la itre wetr ne la götrane i Iudra. 8 Nge ame pena e Ioridrano, ngöne la götrane koië ne Ieriko, hnei angatr hna iën ngöne la götran ne la tribu i Reubena, la traon ne Bezeri, ka ej ngöne la hnapapa hune la plato; nge ame pena, ngöne la götran ne la tribu i Gada, ke hna ië Ramotha e Gileada, me Golana e Basana qa ngöne la tribu i Manase.

9 Hna iën la itre traone cili thatraqane la angetre Isaraela asë, me itre trenyiwa ka lapa thei angatr, matre tro la ka humu atr nge tha hna thë kö a kötre kowe la itre traone cili, nge matre tha tro kö a humuthi angeic hnene la atre ti madra, qëmekene troa pane kootrë angeic hnene la nöj.