Ezekiela
4 “Nge ame eö nekö i atr, xome pi la ca birik nge amë ju qëmekei ö. Nge sija ju hune lai birik la desë ne la traon ne Ierusalema. 2 Cile kanoth eje jë, nge acile jë la ihag ne isi xötreith ej, me ketre ija nyine thapa la traon, nge acilëne jë la itre lapa ne soc xötreithe la traon, me itre agö nyine thë la itre qëhnelö. 3 Xome jë la ketre falaipene fao, nge amë ju kösë ihage fao nyipi ö memine la traon. Nge goeëne hutine ju la traon, ke tro ha cile xötreith ej; eö la ka troa cile xötreith ej. Celë hi hatren kowe la nöje Isaraela.
4 “Thupene lai, tro eö a mekölen la götrane mi ö, me kapa hui ö* la ngazo i Isaraela. Tro hë eö a thu la ngazo i angatr, ngöne la nöjei drai ne eö a meköle ez. 5 Eni a upi ö troa kuca lai koi 390 lao drai, ke ka ihmeku memine la itre macatre ne ngazo angatr, nge tro hë eö a thu la ngazo i Isaraela. 6 Qa i ö troa kuca tun uti hë la pune la itre drai cili.
“Thupene lai, tro hmaca eö a meköle ez, ngo ngöne pena la götrane maca. Nge tro eö a thu la ngazo i Iudra koi 40 lao drai, e ca drai, ke ca macatre, ca drai, ca macatre, hane hi la hnenge hna amekötine koi ö. 7 Tha tro kö eö a heetrëne la iwanakoime i ö, la eö a goeëne hutine la kola cile xötreithi Ierusalema. Nge qa i ö troa perofetan la itre akötr ka troa lepi angeic.
8 “Dreng! Tro ni a hnöthi ö hnei eno matre tha tro kö eö a ujë, e tha fenesi kö la itre drai ne eö a cile xötreithe la traon.
9 “Xomi qitre jë, me bali, me faio, me lati, me mile, me ketre pengöne qitr me kesem, nge amë ju ngöne la trengene nyine sa falawa. Tro hë eö a xeni lai ngöne la 390 lao drai, ngöne lo itre drai ne tro eö a meköle ez. 10 E nöjei drai, tro eö a tuluthe la 20 sekel* nyine a i ö. Tro eö a xeni lai ngöne la itre ijin hna sa.
11 “Nge tro fe eö a tuluthe la tim nyine tro eö a ij: ene la sine la ca litë* tim. Tro eö a xeni lai ngöne la itre ijin hna sa.
12 “Tro eö a xeni la falawa cili kösë falawa bali ka raon. Tro eö a xome la agetri i atr ka qaqacil, nyine athi eë me atrone la falawa qëmekei angatr.”
13 Matre öni Iehova jë hi: “Celë hi aqane tro la angetre Isaraela a xeni la falawa i angatr ka pui ngazo, nyipine la itre nöj hnenge hna troa aisaije angatre kow.”
14 Nge öninge jë hi: “Waea, the tune kö lai, Iehova Joxu Ka Sisitria! Qane lo eni a co uti hë enehila, tha hane fe kö ni pui ngazo me öni la mitr ne la ketre öni ka mec, maine hna hej hnei öni wael. Goi tha hna hane fe kö traqa kowe la qëng la mitr ka pui ngazo.*”
15 Matre öni nyidrëti jë hi: “Nga xome jë hö la agetri i kau ngo tha agetri i atr kö, matre atrone la falawa i ö.” 16 Nge öni nyidrëti hmaca jë hi: “Nekö i atr, tro ni a apëne la itre nyine xen* e Ierusalema. Nge tro hë angatr a seseu la kola tuluth la falawa nyine tro angatr a xen, me xou la kola tuluth la tim nyine tro angatr a ij. 17 Tro ha co hnei falawa me tim, matre tro angatr a igoeë me seseu, me mec pine la ngazo i angatr.