Numera

1 Nge ngöne la pane drai ne la hnaaluene treu, ngöne la hnaaluene macatre, thupene la angatr a tro qa Aigupito, hnei Iehova hna ithanata koi Mose ngöne la hnapapa e Sinai, e hnine la itat ne icasikeu. Öni nyidrë: 2 “E jë la etrune la angetre Isaraela, ase jë ketre matre ketre, thenge la itre fami i angatr, me thenge la itre lapa i angatr. Nge fejane jë la ëjene la itre trahmany. 3 Tro eö me Arona a e la etrune la itre trahmanyi ka 20 lao macatre a tro draië, thenge la itre lapa* i angatr, nge ka ijije troa hane lö hnine la itre soc i angetre Isaraela.

4 “Xome jë epone la isa ca trahmanyi qa ngöne la isa ca tribu; tro angatr a isa tixene la itre lapa i angatr. 5 Hane hi la itre ëjene la itre trahmanyi ka troa xatua epon: qa Reubena, Elizura nekö i Sedeura; 6 qa Simeona, Selumiela nekö i Zurisadai; 7 qa Iudra, Nasona nekö i Aminadaba; 8 qa Isakara, Nathaniela nekö i Zuara; 9 qa Zebulona, Eliaba nekö i Helona; 10 nge qaathene la itre nekö i Iosefa: qa Eferaima, Elisama nekö i Amihuda; qa Manase, Gamaliela nekö i Pedazura; 11 qa Beniamina, Abidana nekö i Gideona; 12 qa Dana, Ahiezera nekö i Amisadai; 13 qa Asera, Pagiela nekö i Okerana; 14 qa Gada, Eliasafa nekö i Deuela; 15 nge qa Nafatali, Ahira nekö i Enan. 16 Celë hi la itre trahmanyi hna hën qa ngöne la nöj. Angatre la itre tixe ne la itre tribu ne la itre keme i angatr, itre tixe ne la itre milie* qa Isaraela.”

17 Ame hnei Mose me Arona hna hëne la itre trahmanyi cili. 18 Nge hnei angatr hna icasinekeune la nöj ngöne la pane drai ne la hnaaluene treu, matre isa fejane la ëjene la itre ka 20 lao macatre a tro draië, thenge la itre fami i angatr, me itre lapa i angatr, 19 tune la aqane amekötin hnei Iehova koi Mose. Hna fejane lai ngöne la hnapapa e Sinai.

20 Hna fejane la itre ëjene la itre nekö i Reubena, lo itre matrane la pane nekö i Isaraela, thenge la itre fami i angatr, me itre lapa i angatr. Nge ame la itre trahmanyi ka 20 lao macatre a tro draië, nge ka ijije troa soc, ke hna e la etru i angatre fe. 21 Matre traqa koi 46 500 la etrune la itre hna fejan qa ngöne la tribu i Reubena.

22 Hna fejane la itre ëjene la itre matra i Simeona, thenge la itre fami i angatr me itre lapa i angatr. Nge ame la itre trahmanyi ka 20 lao macatre a tro draië, nge ka ijije troa soc, ke hna e angatre fe. 23 Matre traqa koi 59 300 la itre hna fejan qa ngöne la tribu i Simeona.

24 Hna fejane la itre ëjene la itre matra i Gada, thenge la itre fami i angatr me itre lapa i angatr. Nge ame la itre trahmanyi ka 20 lao macatre a tro draië, nge ka ijije troa soc, ke hna e angatre fe. 25 Matre traqa koi 46 650 la itre hna fejan qa ngöne la tribu i Gada.

26 Hna fejane la itre ëjene la itre matra i Iudra, thenge la itre fami i angatr me itre lapa i angatr. Nge ame la itre trahmanyi ka 20 lao macatre a tro draië, nge ka ijije troa soc, ke hna e angatre fe. 27 Matre traqa koi 74 600 la itre hna fejan qa ngöne la tribu i Iudra.

28 Hna fejane la itre ëjene la itre matra i Isakara, thenge la itre fami i angatr me itre lapa i angatr. Nge ame la itre trahmanyi ka 20 lao macatre a tro draië, nge ka ijije troa soc, ke hna e angatre fe. 29 Matre traqa koi 54 400 la itre hna fejan qa ngöne la tribu i Isakara.

30 Hna fejane la itre ëjene la itre matra i Zebulona, thenge la itre fami i angatr me itre lapa i angatr. Nge ame la itre trahmanyi ka 20 lao macatre a tro draië, nge ka ijije troa soc, ke hna e angatre fe. 31 Matre traqa koi 57 400 la itre hna fejan qa ngöne la tribu i Zebulona.

32 Hna fejane la itre ëjene la itre matra i Iosefa qaathei Eferaima, thenge la itre fami i angatr me itre lapa i angatr. Nge ame la itre trahmanyi ka 20 lao macatre a tro draië, nge ka ijije troa soc, ke hna e angatre fe. 33 Matre traqa koi 40 500 la itre hna fejan qa ngöne la tribu i Eferaima.

34 Hna fejane la itre ëjene la itre matra i Manase, thenge la itre fami i angatr me itre lapa i angatr. Nge ame la itre trahmanyi ka 20 lao macatre a tro draië, nge ka ijije troa soc, ke hna e angatre fe. 35 Matre traqa koi 32 200 la itre hna fejan qa ngöne la tribu i Manase.

36 Hna fejane la itre ëjene la itre matra i Beniamina, thenge la itre fami i angatr me itre lapa i angatr. Nge ame la itre trahmanyi ka 20 lao macatre a tro draië, nge ka ijije troa soc, ke hna e angatre fe. 37 Matre traqa koi 35 400 la itre hna fejan qa ngöne la tribu i Beniamina.

38 Hna fejane la itre ëjene la itre matra i Dana, thenge la itre fami i angatr me itre lapa i angatr. Nge ame la itre trahmanyi ka 20 lao macatre a tro draië, nge ka ijije troa soc, ke hna e angatre fe. 39 Matre traqa koi 62 700 la itre hna fejan qa ngöne la tribu i Dana.

40 Hna fejane la itre ëjene la itre matra i Asera, thenge la itre fami i angatr me itre lapa i angatr. Nge ame la itre trahmanyi ka 20 lao macatre a tro draië, nge ka ijije troa soc, ke hna e angatre fe. 41 Matre traqa koi 41 500 la itre hna fejan qa ngöne la tribu i Asera.

42 Hna fejane la itre ëjene la itre matra i Nafatali, thenge la itre fami i angatr me itre lapa i angatr. Nge ame la itre trahmanyi ka 20 lao macatre a tro draië, nge ka ijije troa soc, ke hna e angatre fe. 43 Matre traqa koi 53 400 la itre hna fejan qa ngöne la tribu i Nafatali.

44 Celë hi la itre ëj hna feja hnei Mose me Arona, memine la 12 lao tixe ne Isaraela ka nyihatrene la isa lapa i angatr. 45 Matre ame la itre trahmanyi ne Isaraela ka 20 lao macatre a tro draië, nge ka ijije troa soc, ke hna fejane fe la ëje i angatr, thenge la itre lapa i angatr. 46 Matre traqa koi 603 550 la etru i angatr asë.

47 Ngo tha hna ce fejane kö la ëjene la angetre Levi memine la itre xaa tribu. 48 Öni Iehova koi Mose ka hape: 49 “Tha tro kö eö a fejane la ëjene la itre atrene la tribu i Levi, me ce e angatr memine la etrune la itre xaa tribu ne Isaraela. 50 Nge tro eö a ahnithe la uma maano ne Anyipicin, me itre jia ne huliwa ne ej, me itre ewekë ne ej kowe la angetre Levi. Tro angatr a kapa trongën la uma maano, me itre jia ne huliwa ne ej; qa i angatr troa huliwa ngöne la uma maano, me lapa xötreith ej. 51 E troa mejë fë la uma maano, qa ne la angetre Levi troa fej; e tro hmaca a acil ej, qa ne la angetre Levi troa acil; tro ha humuthe la nöjei atr ka easenyin ej, ngo ka tha ijije* pe.

52 “Nge tro la atre Isaraela a acile la itate i angeic, ngöne la götrane hna amekötin koi angeic. Tro angeic a lapa ngöne la götran hna amekötin kowe la köni tribu i angeic, thenge la lapa i angeic. 53 Nge tro la angetre Levi a lapa xötreithe la uma maano ne Anyipicin, matre tha tro kö a wesitr kowe la angetre Isaraela; hnëqa ne la angetre Levi troa thupëne hnyawa la uma maano ne Anyipicin.”

54 Ame hnene la nöje Isaraela hna kuca thenge la hnei Iehova hna amekötin koi Mose. Celë hi hnei angatre hna kuca.