Numera
34 Öni Iehova hmaca jë hi koi Mose: 2 “Qaja jë kowe la angetre Isaraela la itre hna amekötin celë: ‘Ame la epuni a troa lö kowe la nöje Kanana, hane hi la itre ifego ne la nöj hna troa hamën nyine edrö i epun:
3 “‘Ame ngöne la götrane kolojë, tro la ifego a nyiqaan qa ngöne la hnapapa Zin, ezin e Edroma. Nge ame e kuë, tro la ifego ne kolojë a tro qa ngöne la pune la Hnagejë Sotr.* 4 Nge tro ej a kano me thupa la götrane kolojë ne la sasala e Akarabima, uti hë e Zin. Nge tro ej a ut e kolojë e Kadesi-Banea, me elë hmaca koi Hazar-Adar uti hë Azemona. 5 Nge qa Azemona, tro la ifego a kano uti hë la hnathup* e Aigupito. Tro la ifego a nyipun ngöne la Hnagejë.*
6 “‘Ame la ifego i epun e koië, ke ene la Hnagejë Ka Tru* memine la ngönëtë trootro. Celë hi ifego i epun e koië.
7 “‘Hane hi la ifego i epuni e kolopi: Tro ej a tro qa ngöne la Hnagejë Ka Tru, uti hë la Wetre Hora. 8 Nge qa ngöne la Wetre Hora, tro la ifego a tro uti hë Lebo-Hamath,* me tro uti hë Zedada. 9 Nge tro ej a uti hmaca e Zifona, me hmaca e Hazar-Enana. Celë hi ifego i epun e kolopi.
10 “‘Ame kowe la ifego i epun e koië, qa i epun troa tro meköt, qaane Hazar-Enana uti hë Sefama. 11 Nge qa Sefama, tro la ifego a tro uti hë Ribela, ngöne la götrane koië ne Aina, nge tro ej a uti trootro e koië uti hë la Hnagejë Ne Kinereth.* 12 Nge tro ej a uti kowe la hneopegejë Ioridrano, me hmaca ngöne la Hnagejë Sotr. Celë hi nöje i epun, me itre ifego i epun.’”
13 Ame hnei Mose hna amekötin kowe la angetre Isaraela ka hape: “Celë hi nöj hnei epuni hna troa thawa qa ngöne la hna uthidrönegöti,* ene la nöj hnei Iehova hna amekötin troa hamëne kowe la 9 lao tribu nge sin. 14 Ke ame la tribu ne la angetre Reubena, thenge la itre lapa i angatr, memine la tribu ne la angetre Gada, thenge la itre lapa i angatr, memine la sin la tribu i Manase, ke ase hë angatr kapa la edrö i angatr. 15 Ase hë la lue tribu nge sin kapa la edrö i angatr ngöne la götrane koië ne la nöje Ioridrano, hmekun e Ieriko, ngöne la hna fetra hnei jö.”
16 Matre öni Iehova hmaca jë hi koi Mose ka hape: 17 “Hane hi la itre ëjene la itre trahmany ka troa thawa la nöj koi epun: Eleazara lo atre huuj, me Iosua nekö i Nuna. 18 Qa i epun troa xome la isa ca tan qa ngöne la isa ca tribu, matre thawa la nöj. 19 Hane hi la ëjene la itre atre cili: qa ngöne la tribu i Iudra, Kaleba nekö i Iefune; 20 qa ngöne la tribu ne la itre nekö i Simeona, Samuela nekö i Amihuda; 21 qa ngöne la tribu i Beniamina, Elidada nekö i Kiselona; 22 qa ngöne la tribu ne la itre nekö i Dana, ca tan, ene Buki nekö i Iogeli; 23 qaathene la itre nekö i Iosefa: qa ngöne la tribu ne la itre nekö i Manase, ca tan, ene Haniela, nekö i Efoda; 24 nge qa ngöne la tribu ne la itre nekö i Eferaima, ca tan, ene Kemuela, nekö i Sifetan; 25 qa ngöne la tribu ne la itre nekö i Zebulona, ca tan, ene Elizafana, nekö i Parenaka; 26 qa ngöne la tribu ne la itre nekö i Isakara, ca tan, ene Paletiela, nekö i Azana; 27 qa ngöne la tribu ne la itre nekö i Asera, ca tan, ene Ahihuda, nekö i Selomi; 28 qa ngöne la tribu ne la itre nekö i Nafetali, ca tan, ene Pedaela, nekö i Amihuda.” 29 Celë hi la itre trahmanyi hnei Iehova hna upe troa thawa la nöje Kanana kowe la angetre Isaraela.