Iosua

13 Ngo qatre catre hë Iosua, matre öni Iehova jë hi koi angeic: “Qatre catre hë eö, ngo ka tru pala kö hnei götran nyine tro epuni a thapa ngöne la nöj. 2 Hane hi la nöj nyine tro pala kö epuni a thapa: ene la nöjei götrane hna lapane hnene la angetre Filisiti, me angetre Gesuri 3 (ene lo götrane ka tro qa ngöne lo hneopegejë Nil,* ngöne la götrane koië* ne la nöje Aigupito, uti hë la ifego e kolopi ne la nöje Ekerona, lo götran ne la angetre Kanana ekö), memine lo itre nöj ne la 5 lao joxu ne Filisiti (ene Gaza, me Asedoda, me Asekelona, me Gatha, me Ekerona) memine la nöj ne la angetre Avi 4 e kolojë. Nge hane hi la nyine tro pala kö epuni a thapa: la nöje i angetre Kanana; me Meara lo götrane i angetre Gidona uti hë e Afeka, ezine la ifego ne la angetre Amona; 5 Memine la nöj ne la angetre Gebali, memine la Lebanona asë e koië, qa Baala-Gada fene la wetre Heremona uti hë e Lebo-Hamath*; 6 Memine la itre wetr ka tro qa ngöne la Lebanona uti hë Miserefo-Maim; memine la nöjei götran hna lapan hnei angetre Zidona. Tro ni a helëne la itre nöje cili matre hamën pena kowe la angetre Isaraela. Ame hi la nyine tro eö a kuca, ke troa thawa la nöj nyine edrö kowe la angetre Isaraela, tune lo hnenge hna amekötin koi ö. 7 Nge enehila, qai ö troa thawa la nöje cili nyine edrö kowe la 9 lao tribu, me kowe la ketre sine la tribu i Manase.”

8 Hnene la ketre sine la tribu i Manase, memine la angetre Reubena me angetre Gada, hna xome lo edrö i angatr hna hamën hnei Mose ngöne la götrane koië ne la hneopegejë Ioridrano, tune lo hnei Mose hlue i Iehova hna hamë angatr: 9 ej a tro qa Aroera ngöne la gaa utiut ne la hnathup e Arenona,* me tro kowe la traon nyipine la hnathup, memine la plato e Medeba uti hë e Dibona; 10 memin asë la itre traone i Sihona joxu i angetre Amora ka musi e Hesebona, uti hë la ifego ne la angetre Amona; 11 memine la nöje Gileada, memine la götran ne la angetre Gesuri me angetre Maaka, memine la wetre Heremona asë, memine la nöje Basana asë uti hë e Saleka; 12 memine la baselaia i Oga asë ngöne la nöje Basana, lo ka mus e Aseterotha me Ederei. (Nyidrëti pe hi lo atre Refai ka mel.) Hnei Mose hna lep me helën asë la itre atrene la itre götrane cili. 13 Ngo tha hnene kö la angetre Isaraela hna helën qa ngöne la nöj la angetre Gesuri me angetre Maaka; eje hi, kolo pala hi a ce mel enehila hnene lue nöje cili memine la angatre Isaraela.

14 Ngo ame kö la tribu i Levi, angatre pe hi la hnei Mose hna tha hamë edrön. Ke tune lo hnei angeic hna sisinyi koi angatr, itre huuj ne eë hna tro fë koi Iehova Akötresi Isaraela la edrö i angatr.

15 Thupene lai, hnei Mose hna hamë edrö kowe la tribu i Reubena, nge hna thawa pë hë thenge la itre fami i angatr; 16 Ame la götrane i angatr, ke ej a tro qa Aroera ngöne la gaa utiut ne la hnathup e Arenona. Nge kolo fe a e la traon ka ej nyipine la hnathup, memine la plato ezin e Medeba; 17 me Hesebona, me nöjei traon i angeic ka eje ngöne la plato: ene Dibona, me Bamotha-Baala, me Bethe-Baala-Meon, 18 me Iahaza, me Kademota, me Mefath, 19 me Kiriathaima, me Sibema, me Zerethe-Sahar ngöne la wetr ne la hnathup, 20 me Bethe-Peora, memine la itre gaa utiut e Pisega, me Beth-Iesimoth, 21 memine la nöjei traon ne la plato, memine la baselaia i Sihona asë, joxu i angetre Amora ka musi e Hesebona. Hnei Mose hna lepi Sihona, me Evi, me Rekem, me Zura, me Huro, me Reba, lo itre tan ne la angetre Midiana, lo itre jin i Sihona* ka mel ngöne la nöj. 22 Nge ame fe Baalama nekö i Beora, lo ka qajaqaja la itre drai elany, ke hna humuthi angeic hnei taua hnene la angetre Isaraela. 23 Ame la ifego ne la angetre Reubena, ke ene la hneopegejë Ioridrano; celë hi götran hna thawa kowe la angetre Reubena, thenge la itre fami i angatr, ene la itre traone cili me itre hunahmi ezin.

24 Thupene lai, hnei Mose hna hamë edrö kowe la tribu i Gada, nge hna thawa thenge la itre fami i angatr; 25 Ame la itre götrane i angatr ke: Iazera me nöjei traon ne Gileada, memine la ketre sin ne la nöje i angetre Amona uti hë e Aroera, lo ka qëmeke koi Raba. 26 Nge eje fe a tro qa Hesebona uti hë e Ramatha-Mizepa, me Betonim, me qa e Mahanaima uti hë la ifego ne Debira; 27 ej ngöne la hnathup, la götran ne Beth-Arama, me Bethenimera, me Sukotha, me Zafon, lo itre götran ka lapa pe ne la baselaia i Sihona joxu ne Hesebona, memine la Ioridrano ka nyi ifego qa ngöne la jua e kolojë ne la hnagejë Kineret,* hmekune la götrane kuë ne la hneopegejë Ioridrano. 28 Celë hi götran hna thawa kowe la angetre Gada, thenge la itre fami i angatr, ene la itre traone cili me itre hunahmi ezin.

29 Ase jë hi lai, hnei Mose hna hamë edrö kowe la ketre sine la tribu i Manase, nge hna thawa pë hë thenge la itre fami i angatr. 30 Ame la itre götrane i angatr, ke kola tro qa Mahanaima, memine la nöje Basana asë, memine la Baselaia i Oga asë joxu ne Basana, memine la nöjei götran hna acil la itre itate i Iaira ngöne la nöje Basana. Matre traqa jë kö koi 60 lao traon. 31 Nge ame pena la ketre sine la nöje Gileada, me Aseterotha, me Ederei, lo itre traon ne la Baselaia i Oga ngöne la Basana, ke hna hamën kowe la itre nekö i Makiri lo nekö i Manase, ene la ketre sin ne la itre nekö i Makiri; hna thawa pë hë la götrane cili thenge la itre fami i angatr.

32 Celë hi la itre edrö hnei Mose hna hamë angatr ngöne la itre gaa paapa ne Moaba ngöne la götrane koië ne Ieriko, hmekune la ketre pala ne la hneopegejë Ioridrano.

33 Ngo tha ase pi kö Mose thue edröne la tribu i Levi, ke Iehova Akötresi Isaraela la edrö i angatr, tune lo hnei nyidrëti hna sisinyi koi angatr.