Iosua
16 Ame la götran hna uthidrönegötiën* me hamën kowe la itre matra i Iosefa, ke kola tro qa ngöne la hneopegejë Ioridrano hmekun e Ieriko, a tro kowe la itre tim e koië, nge ka thupa la hnapapa e Ieriko, me elë uti hë la itre wetr e Bethela. 2 Qa Bethela e Luza, ej a tro uti hë la ifego ne la angetre Areki e Atarotha, 3 me uti hmaca a tro kuë kowe la ifego ne la angetre Iafelet, uti hë la ifego ne Beth-Horona e Kuhu, nge uti hë e Gezera; kola nyi ifegone la götrane i angatr hnene la hnagejë.
4 Ame hnei Manase me Eferaima, lo lue matra i Iosefa, hna thapa la itre götrane thatraqai nyidro. 5 Hane hi la itre ifego ne la itre matra i Eferaima, lo itre götran hna thawa thenge la itre fami i angatr: Ame la ifego i angatr e koië, ke Ataroth-Adara uti hë e Bethe-Horona e Koho, 6 nge ej a tro uti hë la hnagejë. Ame Mikematha, ke ej e kolopi, nge kola kano la ifego e koië a tro Tanatha-Silo, me koië thenge a tro Ianoa. 7 Thupene lai, ej hmaca a uti qa Ianoa a tro Atarotha me Naratha, me ketr i Ieriko uti hë la hneopegejë Ioridrano. 8 Qa Tapua, ej a kuë thenge a tro kowe la tim Kana; nge ej a hmaca ngöne la hnagejë. Celë hi la edrö ne la tribu i Eferaima, edrö hna thawa thenge la itre fami i angatr. 9 Nge ame fe la itre xaa traon me itre hunahmi ezin hna hamën kowe la itre matra i Eferaima, ke itre ej nyipine la itre götrane i Manase.
10 Ame pe, tha hnei angatre kö hna helëne la angetre Kanana ka lapa e Gezera, nge angetre Kanana pala hi enehila a ce mel memine angetre Eferaima, ngo hna folosa angatre pe.