Angetre Amekötin
12 Ame hnene la itre trahmany ne Eferaima hna ce sasaithe la hneopegejë a tro Zafon,* me qaja koi Iefetha ka hape: “Hnauëne laka, tha hnei ö kö hna hane hë hun troa isi me angetre Amona? Tro eahuni a ce dreuthi ö memine la uma i ö.” 2 Ngo sa jë hi Iefetha ka hape: “Hnei eni me nöjeng hna isi memine la angetre Amona. Nge hnenge lo hna sipo ixatua koi epun, ngo tha hnei epuni kö hna cilëgöli ni. 3 Matre ame hë la eni a öhne laka, tha tro kö epuni a traqa, hnenge hna nue mel troa isi me angetre Amona. Nge hnei Iehova hna nue angatr koi ni. Matre hnauëne laka, epuni pena ha a thele isi me eni?”
4 Ame hnei Iefetha hna acasine la itre trahmanyi ne Gileada, me isi me angetre Eferaima. Nge hnene la angetre Gileada hna lep la angetre Eferaima, pine angatre qaja ka hape: “Ame epun angetre Gileada, epuni a pi lapane la itre götrane i Eferaima me Manase, ngo ume ka kötre Eferaima pe.” 5 Ame hnene la angetre Gileada hna canga thapa la itre götrane gaa tëtë ne la hneopegejë Ioridrano qëmekei Eferaima. Matre ame la kola thele troa kötr hnene la ketre atre Eferaima me hape: “Nue ni pi troa sasaithe la hneopegejë,” ke angetre Gileada a hnying ka hape: “Atre Eferaima eö?” Nge maine tro angeic a sa ka hape: “Waea,” 6 ke tro angatr a hape: “Pane qaja jë Shiboleth.” Ngo maine tro angeic a qaja triane ka hape: “Siboleth,” ke thatreine hnyawa kö angeice qaja la hnaewekë cili, tro hë angatre lai a xolouthi angeic, me humuthi angeic ezine la itre gaa tëtë ne la hneopegejë Ioridrano. Matre ame ngöne la ijine cili, traqa jë kö koi 42 000 lao atre Eferaima hna humuth.
7 Traqa koi 6 lao macatre ne ameköti Isaraela hnei Iefetha. Thupene lai, hnei angeic hna mec, nge hna kelemi angeic ngöne la traone i angeic e Gileada.
8 Thupei angeic, hnei Ibezan atre Bethelema hna ameköti Isaraela. 9 Traqa koi 30 lao nekö i angeic trahmany, me 30 lao jajiny. Hnei angeice hna upe la itre nekö i angeic jajinyi troa ikötresai memine la itre trahmanyi qa ngöne la itre xaa lapa, nge hnei angeice hna xome la 30 lao föe kowe la itre nekö i angeic trahmany. Hnei angeic hna ameköti Isaraela koi 7 lao macatre. 10 Ame hnei Ibezan hna mec, nge hna kelemi angeic e Bethelema.
11 Thupei angeic, hnei Elona atre Zebulona hna ameköti Isaraela koi 10 lao macatre. 12 Ame hna mec hnei Elona atre Zebulona, nge hna kelemi angeic e Aialona, ngöne la itre götran ne la tribu i Zebulona.
13 Thupei angeic, hnei Abedon nekö i Hilel atre Pirathon hna ameköti Isaraela. 14 Traqa koi 40 lao nekö i angeice trahmany, me 30 lao api i angeic trahmany ka tith la 70 lao boliko. Hnei angeic hna ameköti Isaraela koi 8 lao macatre. 15 Ame hna mec hnei Abedon nekö i Hilel atre Pirathon, nge hna kelemi angeic e Pirathon ngöne la itre götran ne la tribu i Eferaima, ngöne la wetr ne la atre Amaleka.