Pane Tus Samuela
5 Ame hë la angetre Filisiti a ase thapa la Pua ne la nyipi Akötresie, angatr a kapa trongëne jë qa Ebeneza a tro Asedoda. 2 Angatr a xome jë la Pua ne la nyipi Akötresie, me amë hnine la uma ne hmi i Dagona, ezine lo hnasaatr i Dagona. 3 Ame lai drai thupen e hmakany, ngöne la kola hlë hnene la angetre Asedoda, mala ha Dagona qëmekene la Pua i Iehova. Matre, angatr a acile hmaca ju ngöne la göhnen. 4 Ngöne la drai thupen e sine hmakany, ame la angatr a hlë, mala hmaca ha Dagona qëmekene la Pua i Iehova. Nge isa meköle hë la he me lue im. Lue ej ngöne la qene qëhnelö ne la uma ne hmi. Matre, lapa ju pe hi la ngön.* 5 Kepine hi lai matre enehila, ame la itre atre huuj i Dagona, me itre ka lö hnine la uma ne hmi i Dagona e Asedoda, tha angatre kö a hane waja la qene qëhnelö.
6 Matre, Iehova a nyithupene ju kowe la angetre Asedoda. Nge tru la hnei nyidrëti hna lep hnei fini kakötr* la angetre Asedoda, me itre xa götran. 7 Ame hë la itre trahmanyi a öhne lai, öni angatr: “Tha tro kö a lapa the së la Pua ne la Akötresi Isaraela, ke ngazo la aqane lepi së hnei nyidrë, easë me Dagona haze së.” 8 Matre angatr a hëne jë la itre joxu i angetre Filisiti me hape: “Tro huni a uën la Pua ne la Akötresi Isaraela?” Önine jë hi la itre joxu: “Xome pi a tro Gatha.” Angatr a xome pi la Pua ne la Akötresi Isaraela a tro Gatha.
9 Matre ame hë la kola traqa e koilo la Pua, Iehova a lepe pi la traon hnene la ketre akötr, ame hna xou hnene la itre atr. Nyidrëti a lepe ju hnei fini kakötr* la itre trahmanyi ne la traon, qaane ju hi la ka co uti hë la ka tru. 10 Haawe, angatr a xome pi la Pua ne la nyipi Akötresie a tro Ekerona. Ngo ame ju hi la kola traqa la Pua ne la nyipi Akötresie e Ekerona, sue jë hi la itre atrene ka hape: “Hnei angatre hna traqa fë la Pua ne la Akötresi Isaraela matre tro sa mec, easë me nöje së!” 11 Matre angatr a hëne jë la nöjei joxu ne Filisiti me hape: “Xome pi qa la, la Pua ne la Akötresi Isaraela! Loi e troa bëeke fë koi angatr, matre tha tro kö hun me nöje hun a hane mec.” Xou hë la traon asë troa mec, ke ngazo catre la aqane lepi angatr hnene la nyipi Akötresie. 12 Ketre, ame la itre ka mele pe, angatr a isa si fini kakötr.* Nge hnene la itre atren la traon hna gala draië me sipo ixatua.