Pane Tus Samuela
7 Hnene la itre trahmany ne Kiriatha-Iarim hna xome la Pua i Iehova, me amë ngöne la hnalapa i Abinadabe, lo uma ka cil hune la sasala. Angatr a iëne jë la nekö i angeic, Eleazara, troa thupëne la Pua i Iehova.
2 Nge traqa koi 20 lao macatre thupene lo angatr a traqa fë la Pua e Kiriatha-Iarim. Matre hnene la nöje Isaraela asë hna nyiqaane thele* Iehova. 3 Öni Samuela jë hi kowe la nöje Isaraela asë ka hape: “Maine epuni a bëeke koi Iehova memine la hni ka pexej, trije pi qaathei epun la itre haze trenyiwa me itre idrola i Aseira. Nge e tro la hni i epuni a epe catre koi Iehova, nge e tro epuni a nyihlue i nyidrëti hmekuje hi, tro hë nyidrëti a amele epun qaathene la angetre Filisiti.” 4 Qa ngöne lai, hnene la nöje Isaraela hna trije la itre Baala, me itre idrola i Aseira, me nyihlue i Iehova hmekuj.
5 Nge öni Samuela jë hi: “Hën asë jë la nöje Isaraela e Mizepa, nge tro ni a thithi sai epun koi Iehova.” 6 Angatr a icasikeu jë e Mizepa, nge angatr a tha tim me neng qëmekei Iehova. Nge ngöne la drai cili, hnei angatr hna tha xen me hape: “Hne huni hna ngazo koi Iehova.” Matre Samuela a nyiqaane ameköti angetre Isaraela jë e Mizepa.
7 Matre ame hë la kola atre hnei angetre Filisiti laka, hnei angetre Isaraela hna icasikeu e Mizepa, hnene la itre joxu i angetre Filisiti hna elë troa isi me Isaraela. Nge ame hë la kola drenge lai hnei angetre Isaraela, xou i angatr ju hi la angetre Filisiti. 8 Matre öni angetre Isaraela koi Samuela ka hape: “The mano kö hë Iehova Akötresi së, matre tro nyidrëti a amele së qaathei angetre Filisiti.” 9 Samuela a xome pi la ketre neköi mamoe, me hamë Iehova nyine huuj ne dreuth asë. Thupene lai, angeic a hë Iehova jë, me sipo ixatua koi angetre Isaraela. Nge Iehova a sa ju koi angeic. 10 Ngo ame hë la Samuela a tro fë huuj, xulu pi hi la angetre Filisiti troa thele isi. Eloine pe, hnei Iehova hna axulun ngöne la drai cili la itre hedreng ka catr, ene pe, menumenu pi angatr. Matre hnei angetre Isaraela hna ngaa angetre Filisiti. 11 Ame hnene la itre trahmanyi ne Isaraela hna tro qa Mizepa, me huzune la angetre Filisiti. Nge hnei Angatr hna humuthi angetre Filisiti, uti hë e kolojë e Betheka. 12 Matre Samuela a xome jë la ketre etë atraqatr, me acil nyipine Mizepa me Seni. Angeic a ati ëjene jë ka hape, Ebeneza,* ke öni angeic: “Uti hë enehila, hnei Iehova hna amele së.” 13 Celë hi aqane ngaa angetre Filisiti, nge tha lö hmaca kö angatr ngöne la nöje Isaraela. Nge ngöne la itre drai i Samuela, tha mano kö Iehova isi me angetre Filisiti. 14 Ketre, ame lo itre xa nöj i angetre Isaraela hna thapa hnei angetre Filisiti, bëeke hmaca ha koi angatr, qaane ju hi e Ekerona uti hë Gatha. Matre Isaraela a thapa hmaca jë la itre nöje i angeic, lo hna cipan hnei angetre Filisiti.
Nge ka tingetinge Isaraela me angetre Amora.
15 Matre uti hë la Samuela a mec, hnei angeic hna ameköti angetre Isaraela. 16 E nöjei macatre, angeic a trongëne la nöj me tro Bethela, me Gilegala, me Mizepa, me iameköti ngöne la nöjei götrane cili. 17 Thupene lai, angeic a bëeke hmaca pi a tro Rama, ke e cili hi la hnalapa i angeic. Nge e Rama, angeice fe a ameköti Isaraela, me xupi ita ne huuj koi Iehova.