Pane Tus Samuela
29 Hnene la angetre Filisiti hna hën asë la itre soce i angatr e Afeka, nge hnei angetre Isaraela hna acile la lapa ne la itre soce i angatr, ezine la qeqe ne tim e Iezerela. 2 Nge itre joxu i angetre Filisiti a upe la itre soc, thenge la ala 100, me ala 1 000. Nge Dravita me itre atre i angeic, me Akisa la ka thinge la tro. 3 Ngo hnene la itre joxu i angetre Filisiti hna hnyinge ka hape: “A kola u la angetre Heberu the së?” Sa jë hi Akisa ka hape: “Dravita lai, lo hlue i Saulo, joxu ne Isaraela. Hnei angeic hna trotrije la trongene isi angeic, nge ma ase hë sasaithe la ca macatre ne ce angeic me eni. Nge uti hë enehila, pëkö engazo i angeic.” 4 Ngo hnene la itre joxu i angetre Filisiti hna elëhni koi Akisa, me hape: “Upi angeice pi qa la, upi angeice hmaca jë kowe la traon hnei eö hna ami angeice ngön. Tha tro kö angeic a ce isi me easë, wanga cile jë pena koi së. Ke maine aja i angeic tro la joxu i angeic a kepe angeice hmaca, tro hi angeic a tro fë koi Saulo la he ne la itre atre së. 5 Nge tha Dravita kö la, lo hna nyiman me fian hnene la nöj ka hape:
‘Ase hë Saulo lepe la ala 1 000,
nge Dravita la ala 10 000.’”
6 Ame hnei Akisa hna hë Dravita me hape: “Qëmekei Iehova Akötresie ka mel, atre ka meköti eö. Ka madrin catre ni koi eö, ke hnei eö hna ce tro me itre trongene ising kowe la tro celë. Nge pëkö engazo i ö qaane lo drai hnei eö hna lö kowe la hnalapang. Ngo kola mekuhni ö hnene la itre xa joxu. 7 Matre bëeke hmaca jë kowe la hnalapa i ö, nge the kuca kö la ketre ewekë ka troa amejëne la elëhni angatr.” 8 Ngo öni Dravita koi Akisa ka hape: “Nemene la ngazong? Hetre ngazo kö hnei nyipëti hna öhne theng? Hnauëne laka, tha ijijinge kö troa ce tro me nyipë, me isi me itre ithupëjia me nyipë joxung?” 9 Sa jë hi Akisa ka hape: “Ame koi ni, ka lolo catre la thiina i eö, kösë angela i Akötresie. Ngo öni itre xa joxu ne Filisiti ka hape: ‘Tha tro kö angeic a ce isi me easë.’ 10 Haawe, tro hë eö me itre atre i eö a canga ihlë, me hnëkë, me tro e kaqa ne lai.”
11 Dravita me itre sinatronge i angeic a canga ihlë jë, me bëeke kowe la nöje i angetre Filisiti. Nge angetre Filisiti pë hë a tro Iezerela.