Pane Tus i Aqane Lapa Itre Joxu

14 Hnei Hirama, joxu ne Turo, hna upe la itre atre tro fë maca koi Dravita, me iupi fë arasi, me itre ka thupe etë* me ka tratrau sinöe, matre troa xupe la uma i Dravita. 2 Qa ngöne lai, xecie hnyawa ju hi koi Dravita laka, hnei Iehova hna sil acatrene la musi angeic e Isaraela, ke hnei nyidrëti hna kuca matre troa hlemu loi la hnanyijoxu i angeic, pi Isaraela nöje* i nyidrë.

3 Hnei Dravita hmaca hna xomi itre xa föe e Ierusalema, matre hnahone la itre xa nekönatr, trahmanyi me jajiny. 4 Hane hi la ëjene la itre nekö i nyidrë ka mala e Ierusalema: Samua, me Sobab, me Nathana, me Solomona, 5 me Ibara, me Elisua, me Elipelet, 6 me Noga, me Nefega, me Iafia, 7 me Elisama, me Eliada, me Elifelet.

8 Ame hë la angetre Filisiti a drenge laka, joxu hë Dravita hui Isaraela, angatr a thele Dravita jë. Nge ame hë la Dravita a drenge lai, nyidrë a tro ju troa isi me angatr. 9 Matre ame hë la angetre Filisiti a traqa, angatr a tro ju troa isi ngöne la hnathup e Refai. 10 Dravita a hnyinge jë koi Akötresie ka hape: “Tro kö ni a isi me angetre Filisiti? Tro kö nyipëti a xatua ni troa lepi angatr?” Sa jë hi Iehova ka hape: “Tro jë, ke tro ni a xatua eö troa lepi angatr.” 11 Dravita a tro ju e Baala-farez,* nge e cili hi la nyidrëti a ngaa angetre Filisiti. Matre öni Dravita: “Tune la hneopegejë ka catr, hnene la nyipi Akötresie hna thawaluëne la itre xötre soc ne la itre ithupëjiang, me ië ni troa kuca lai.” Celë hi matre hna hëne la götrane cili ka hape, Baala-farez. 12 Ke hnene la angetre Filisiti hna nuetrije la itre idrola i angatr, nge hnei Dravita hna iupe troa dreuthetrij itre ej.

13 E thupen, hnei angetre Filisiti hmaca hna traqa troa isi ngöne la hnathup. 14 Matre Dravita a hnyinge hmaca jë koi Akötresie, ngo hnene la nyipi Akötresie hna qaja ka hape: “The qëmeke kö koi angatr, ngo tro eö a pane kanothi angatr. Pane tro ju hutrö i angatr, nge lepi angatre jë qa hutrö, qëmekene lo itre isinöe baka. 15 Nge e drenge hë eö la mejene soc ka tro nyipine la itre baka, canga sesë pi troa isi, ke tro la nyipi Akötresie a tro pa troa lepi angetre Filisiti.” 16 Dravita a trongëne jë la hna qaja hnene la nyipi Akötresie. Ame hnene la trongene isi i Dravita hna lepi angetre Filisiti qane Geba, uti hë Gezera. 17 Matre hlemu hë Dravita ngöne la nöj asë. Nge hnei Iehova hna kuca matre tro la nöjei nöj a xoue Dravita.