Pane Tus i Aqane Lapa Itre Joxu

21 Ngöne la ketre drai, hnei Satana* hna mejë troa icilekeu me Isaraela. Angeic a uku Dravita jë troa e la etrune la angetre Isaraela. 2 Matre öni Dravita koi Ioaba me itre tane la nöj, ka hape: “Tro jë troa e la etru i angetre Isaraela,* qaan e Bereseba uti hë Dana. Nge thuemacanyi ni jë, matre atre jë ni la etru i angatr.” 3 Ngo öni Ioaba kowe la joxu: “Epi tro Iehova a nyixane la nöj koi 100 hmaca kö. Ngo joxu fe! Angatr asë hi a huliwa koi nyipë, matre hnauëne laka, mekune jë nyipë troa kuca lai? Nge hnauëne laka, nyipëti a ajane troa nyi zö Isaraela?”

4 Ngo catre kö la hna qaja hnei joxu hui Ioaba, matre hnei Ioaba hna trongëne la nöje Isaraela asë, me bëeke hmaca a tro Ierusalema. 5 Ame hnei Ioaba hna qaja koi Dravita la etrun: E Isaraela asë, kola e la 1100000 lao soc ka cile fë taua, nge e Iudra, ala 470000 la ka cile fë taua. 6 Ngo tha e kö Ioaba la etrune la angetre Levi me Beniamina, ke angeic a xele ma wange la hna amekötin hnei joxu.

7 Nge xele catre la nyipi Akötresie ma wange la kola e la etru i Isaraela. Matre nyidrëti a mekune jë tro Isaraela a xeni pun. 8 Ame hnei Dravita hna qaja kowe la nyipi Akötresie ka hape: “Ngazo ka tru la hnenge hna kuca. Matre epi tro nyipëti a nue la ngazong, ke ase hë ni huliwa menu.” 9 Ame hnei Iehova hna ithanata koi Gada, lo atre qeje pu ka hamë eamo koi Dravita. Öni nyidrë: 10 “Tro ja qaja koi Dravita ka hape: ‘Hane hi la hna qaja hnei Iehova, “Eje qëmeke i eö la köni akötr, iëne jë la nyine tro ni a kuca koi ö.”’” 11 Matre Gada a lö ju koi Dravita me hape: “Hane hi la hna qaja hnei Iehova: ‘Nemene la aja i nyipë? 12 Aja i nyipëti kö tro la nöj a jinë xen koi köni macatre? Maine pena, aja i nyipë tro la itre ithupëjia a ngaa nyipë koi köni treu, nge tro la taua i angatr a lepi nyipë? Maine tro pena a lepe la nöj hnene la taua i Iehova, nge tro la angela i Iehova a lepe la nöje Isaraela hnei mec koi köni drai?’ Pane mekune hnyawa jë, nge qaja jë hë la nyine tro ni a sa kowe la atre upi ni.” 13 Ame hnei Dravita hna qaja koi Gada ka hape: “Ka seseu catre ni, ngo ka loi e tro ni a kei kowe la lue ime i Iehova, ke atraqatre la trenge utipine i nyidrë. Ngo tha tro kö ni a kei kowe la ime i atr.”

14 Ame hnei Iehova hna lepi Isaraela asë hnene la mec ka ixötrekeu. Matre traqa koi 70000 lao atre ka mec. 15 Ketre, hnene la nyipi Akötresie hna upe la angela troa lepi Ierusalema. Ngo ame ju hi la Iehova a öhne laka, kola ha troa lepi angatr hnene la angela, hace* ju hi la hni nyidrë. Matre öni nyidrë kowe la angela ka troa lepe la nöj ka hape: “Loi ju hë! Aipiëne ju hë la ime i ö.” Ame hna cile la angela i Iehova ezine la hnë lepe qitr i Aruna qa Iebusi.

16 Ame hë la Dravita a gala draië, öhne ju hi nyidrë la angela i Iehova nyipine la ihnadro me hnengödrai, nge kola ea fë la ketre taua me köja Ierusalema. Ame hnei Dravita me itre xa qatr ka heetrë ibëek ka tru thenyin, hna thil e kuhu hnadro. 17 Nge öni Dravita jë hi kowe la nyipi Akötresie: “Eni hi la ka iup troa e la etrune la nöj, eni hi la ka kuca la ngazo, nge eni hi la ka huliwa menu. Ngo ame la itre neköi mamoe celë, nemene fe la ngazo i nyudren? Matre Iehova Akötresinge fe, eni hi la ka troa xeni pun, eni me fami i kaka;* ngo the akötrëne kö la nöje i nyipë.”

18 Ame hnene la angela i Iehova hna qaja koi Gada, troa upi Dravita kowe la hnë lepe qitr i Aruna qa Iebusi, matre troa acili ita ne huuj koi Iehova. 19 Haawe, Dravita a elë jë kowe la hnë lepe qitr, tune lo hna qaja hnei Gada, atre tro fë maca i Iehova koi Dravita. 20 Ngöne la ijine cili, Aruna a lepelepe qitr, matre angeic a xei ju me öhne lai angela. Nge hnene la 4 lao nekö i angeice trahmanyi ka ce me angeic, hna zae. 21 Nge ame ju hi la angeic a öhnyi Dravita a traqa, angeic a canga tro pi qa ngöne la hnë lepe qitr, me thil e kuhu hnadro qëmeke i Dravita. 22 Nge öni Dravita koi Aruna: “Salemëne* jë koi ni la hnë lepe qitre i eö, tro ni a kuiëne la thupen ka pexej. Tro ni a acili ita ne huuj koi Iehova, matre patre pi la akötre ka lepe la nöj.” 23 Ngo öni Aruna koi Dravita: “Joxunge fe, xome jë la hnepadrong, ewekë i nyipëti lai. Kuca jë la mekuna* i nyipë, nge eni fe a hamë nyipë la itre kau, matre tro nyipë a nyi huuj ne dreuth asë. Nge ame göi sinöe, hane hi la ikatr nyine lepelepe qitr. Nge ame la qitr, xome jë nyine nyi huuj ne wene feja. Eni a hamën gufan asë koi nyipë.”

24 Ngo öni Dravita joxu koi Aruna ka hape: “Waea, tro ni a kuiëne la thupen ka pexej, ke xele ni troa xome la ewekë i ö me hamë Iehova. Thatreine kö ni tro fë la huuj ne dreuth asë ka pë thupen.” 25 Matre Dravita a hamëne pi koi Aruna la etrune la 600 lao sekel* gool, troa itöne lai hnepadro. 26 Thupene lai, Dravita a acili ita ne huuje jë koi Iehova, me tro fë la itre huuj ne dreuth asë, me itre huuj ne tingeting. Dravita a thithi* ju koi Iehova, nge hnei nyidrëti hna sa me upe la eë qa hnengödrai, troa dreuth asë la itre huuj hune la ita ne huuj. 27 Ame hnei Iehova hna upe la angela troa amë hmaca la taua hnine la trengen. 28 Ngöne la ijine cili, hnei Dravita pala hi hna tro fë huuj hune la hnë lepe qitr i Aruna qa Iebusi, ke öhne hi Dravita laka, hnei Iehova hna drei angeic e cili. 29 Ngo ame la uma maano i Iehova, lo hna kuca hnei Mose ngöne la hnapapa, memine la ita ne huuj ne la itre huuj ne dreuth asë, itre eje pala kö hune la hnë hmi gaa hmitrötr e Gibeona. 30 Ngo tha hnei Dravita kö hna tro cili troa hnyinge koi Akötresie, ke angeice pala kö a xouene la taua ne la angela i Iehova.