Pane Tus i Aqane Lapa Itre Joxu

24 Hane hi la itre lapa ne la itre matra i Arona: Itre nekö i Arona, Nadaba, me Abihu, me Eleazara, me Ithamara. 2 Hnei Nadaba me Abihu hna pane mec, nge pi keme i nyidro. Nge pëkö nekö i nyidro. Ngo Eleazara me Ithamara pala hi a cilëne la hnëqa ne atre huuj. 3 Ame hnei Dravita, me Zadoka matra i Eleazara, me Ahimelek matra i Ithamara, hna thawa la itre matra i Arona, me acili lapa, matre thue qa i angatr ngöne la ijine huliwa i angatr. 4 Ngo nyimutre kö la itre tixen thene la itre nekö i Eleazara hune la itre nekö i Ithamara. Matre hna thewe angatr tune la: 16 lao tixe ne lapa thatraqane la itre nekö i Eleazara, nge 8 lao tixe ne lapa thatraqane la itre nekö i Ithamara.

5 Nge hna uthi trikitr* troa thewe angatr, ase jë hi ketre lapa matre ketre lapa. Hna kuca tun, ke thene la itre nekö i Eleazara me Ithamara, hetre itre atrekë hnëqane la götrane gaa hmitrötr, me itre tan ka huliwa kowe la nyipi Akötresie. 6 Thupene lai, hnei Semaia nekö i Nathaniela, sekreter i angetre Levi, hna siji ëje i angatr qëmeke i joxu, me itre he ne nöj, me Zadoka atre huuj, me Ahimelek nekö i Abiathara, me itre tixe ne lapa thene la itre atre huuj me angetre Levi. Hna iëne la ca lapa koi Eleazara, nge ketre koi Ithamara.

7 Hna pane eatre la hna uthi trikitr* koi Iehoiarib, nge Iedaia la hnaaluen, 8 nge Harim la hnaakönin, nge Seorim la hna 4, 9 nge Malekia la hna 5, nge Miamin la hna 6, 10 nge Koz la hna 7, nge Abia la hna 8, 11 nge Iesua la hna 9, nge Sekania la hna 10, 12 nge Eliasiba la hna 11, nge Iakim la hna 12, 13 nge Hupa la hna 13, nge Iesebeab la hna 14, 14 nge Bilega la hna 15, nge Imer la hna 16, 15 nge Hezir la hna 17, nge Hafezez la hna 18, 16 nge Pethaia la hna 19, nge Ezekiela la hna 20, 17 nge Iakina la hna 21, nge Gamul la hna 22, 18 nge Delaia la hna 23, nge Maazia la hna 24.

19 Celë hi aqane acili angatr, ngöne la ijin angatr a kuca la huliwa i angatr, me lö hnine la uma i Iehova, thenge la aqane ameköti huliwa i Arona qaaqaa i angatr, lo hnei Iehova Akötresi Isaraela hna upi angeic troa kuca.

20 Nge ame kowe la itre xa angetre Levi: Thei itre nekö i Amerama: Sebuela. Nge thei itre nekö i Sebuela: Iehedeia. 21 Thei Rehabia: Isia la tixene la itre nekö i Rehabia. 22 Thei angetre Izara: Selomith. Nge thei itre nekö i Selomith: Iahath. 23 Nge thene la itre nekö i Heberona: Ieria la tixen, me Amaria la hnaaluen, me Iaziela la hnaakönin, me Iekameama la hna 4. 24 Nge thei itre nekö i Uziela: Mika. Nge thei itre nekö i Mika: Samira. 25 Isia la trejin me Mika, nge thene la itre nekö i Isia: Zakaria.

26 Nge Maheli me Musi la lue nekö i Merari; Nge thei itre nekö i Iaazia: Beno. 27 Thene la itre matra i Merari: Iaazia keme i Beno, me Sohama, me Zakuri, me Iberi. 28 Nge thei Maheli: Eleazara ka pë neköne trahmany. 29 Nge thei Kiso: itre nekö i Kiso, Ieramela. 30 Itre nekö i Musi: Maheli, me Edera, me Ieremoth. Angatre hi la itre nekö i Levi, thenge la isa lapa i angatr. 31 Nge hna hane fe uthi trikitrë angatr qëmeke i Dravita joxu, me Zadoka, me Ahimelek, me itre tixe ne lapa i angetre huuj me angetre Levi, tune lo hna kuca hnei itre trejin me angatr, itre nekö i Arona. Ceitune hi la aqane kuca kowe la lapa ne la xötre ka tru, me kowe la xötre ka co.