Hnaaluene Tus i Aqane Lapa Itre Joxu

3 Ame hnei Solomona hna nyiqaane xupe la uma ne hmi Iehova e Ierusalema, hune la wetre Moria, lo götran hnei Iehova hna mama koi Dravita keme i Solomona, hmekune lo götran hnei Dravita hna hnëkën, ngöne la hnëlepe qitr i Aruna qa Iebusi. 2 Hnei Solomona hna nyiqaane xupe la uma ngöne hnaaluene drai ne la hnaaluene treu, hmekune la kola 4 lao macatre ne mus i nyidrë. 3 Ame la trepen hnei Solomona hna xup kowe la uma* ne hmi ne la nyipi Akötresie, ke 60 kubit la eqean, nge 20 kubit la eisaisan, thenge lo aqane tulu ekö.* 4 Nge ame la hnahag hnë lö, ke 20 kubit la eqean, nge tune fe la eisaisane la uma,* nge 120* la edraiën. Nyidrëti a pelethe jë hnei nyipi gool la hnë lö e koho hnin. 5 Nge nyidrëti a heetrën asë jë la hnahag ka tru* hnei itre pano göti, me pelethe hmaca hnei nyipi gool. Thupene lai, hnei nyidrëti hna amingömingön hnei itre pama me itre cein hna desën. 6 Ketre, nyidrëti a heetrën asë jë la uma hnei itre etë ka tru thupen, nge ame la gool hna huliwan, ke gool qa Parevaima. 7 Matre nyidrëti a pele goolën asë jë la uma, me itre ipoto, me itre qe ne qëhnelö, me itre ngöne uma, me itre qëhnelö, nge nyidrëti a sija jë la itre kerubi hune la itre ngöne uma.

8 Nyidrëti a thawaluëne* pi la ketre hnahag, matre nyine Gaa Nyipi Hmitrötr. Ame la eqeane lai hnahag, ke ceitu hi memine la eisaisane lai uma, ene 20 kubit la eqean, nge 20 kubit la eisaisan. Nyidrëti a heetrëne jë hnei 600 lao talane* nyipi gool. 9 Nge ame la ehacene la gool hna huliwan troa kuca la itre fao, ke 50 sekel.* Nyidrëti a pelethe jë hnei gool la itre hnahag e koho.

10 Nge e hnine la Gaa Nyipi Hmitrötr, nyidrëti a kuca jë la lue hnasatrë kerubi, nge nyidrëti a pelethe jë hnei gool. 11 Ame la eqeane la lue iape ne la lue kerubi ke, 20 kubit: 5 kubit la ca iape ne la pane kerubi, nge ej a ketr la ketre ngöne uma. Nge ame la ketre iap, 5 kubit fe la eqean, nge ej a ketr la ketre iape ne la hnaaluene kerubi. 12 Nge 5 kubit la eqeane la ketre iape ne la hnaaluene kerubi, nge ej a ketr la ketre ngöne uma. Nge ame la ketre iap, 5 kubit fe la eqean, nge ej a ketr la ketre iape ne la pane kerubi. 13 Matre ame la lue kerubi, lue ej a axö iap a traqa koi 20 kubit la eqean. Nge nyidroti a isa cil, me qëmek kowe la hnine uma.*

14 Nyidrëti a kuca ju fe la irido hnei fil ka bulu, me pene mamoe ka madra, me fil ka madra, me imaano ka hmelele, nge nyidrëti a cane ju la itre kerubi hune la irido.

15 Thupene lai, qëmekene lai uma, nyidrëti a acile jë la lue ipoto, 35 kubit la eqean. Nge ame la lue he ne ipoto, traqa koi 5 kubit la eqean. 16 Nge nyidrëti a kuci fini ceine jë, kösë itre otrene nyinawa, me afenane la lue he ne poto. Nge nyidrëti a kuca ju fe la 100 lao grenad me athip hune la itre cein. 17 Thupene lai, nyidrëti a acile jë la lue ipoto qëmekene la uma ne hmi, casi ngöne la götrane maca,* nge ketre ngöne götrane mi.* Nyidrëti a ati ëjene jë la ipoto maca ka hape, Iakina,* nge Boaza* la ipoto ngöne la götrane mi.