Hnaaluene Tus i Aqane Lapa Itre Joxu

4 Thupene lai, nyidrëti a kuca ju la ita ne huuj kopa: 20 kubit* la eqean, 20 kubit la eisaisan, nge 10 kubit la edraiën.

2 Nge nyidrëti a kuca ju fe la ketre itrapene si atraqatr, hna hëne ka hape, Hnagejë kopa. Ka raone la itrape cili, nge kola e la 10 kubit qane la ketre can uti hë la ketre. Nge 5 kubit la edraiën, nge e troa xomi tulun me kanoth ej, nyipiewekë troa hetre eno ka 30 kubit. 3 Nge hetre itre wene fuo hna sija kanothe la trapene si,* e koho hun me e kuhu fen. Hna sija la 10 lao wene fuo, nge hna sija la lue xötre fuo. Nge ame la itrapene si memine la itre wene fuo, hna aca tro xupe hi. 4 Hna atë la itrapene si hune la 12 lao kau. Köni ka goe kolopi, nge köni ka goe kuë, nge köni ka goe kolojë, nge köni ka goe koië. Hna atë la trapene si hune la itre kau, nge angatr a hutrö kowe la nyipine la itrap. 5 Nge ame la aqane hmekönine lai trapene si, ke ca hnatrapaim.* Nge ame la hune la trapene si, ke kösë ulane ver me iengene lili. Ej a nyi trengene la 3 000 lao bath.*

6 Nyidrëti a kuca ju fe la 10 lao trepene tim, me amë la 5 ngöne la götrane maca, nge 5 ngöne la götrane mi. Hna huliwane la itre trepene tim cili, nyine wasin la itre hna xom thatraqane la itre huuj ne dreuth asë. Ngo ame la trepene si atraqatr, ke nyine siene la itre atre huuj.

7 Nge nyidrëti a kuca ju la 10 lao ita ne lame gool, thenge la hna siji tulun. Nyidrëti a amë ju hnine la uma ne hmi, ene 5 ngöne la götrane maca, nge 5 ngöne la götrane mi.

8 Nge nyidrëti a kuca ju fe la 10 lao laulau, me amë hnine la uma ne hmi, 5 ngöne la götrane maca, nge 5 ngöne la götrane mi. Nge nyidrëti a kuca ju la 100 lao kape gool.

9 Thupene lai, nyidrëti a xupe jë la hnahag gaa pë ihakun kowe la itre atre huuj, memine la hnahag atraqatr gaa pë ihakun,* me itre qëhnelön. Nyidrëti a pelethe jë la itre qëhnelö hnei kopa. 10 Nge nyidrëti a amë ju fe la Hnagejë ngöne la götrane maca, nyipin e kolojë me koië.

11 Nge hnei Hirama fe hna kuca la itre itrapë hnatresij, me itre pel, me itre kap.

Nge celë hi aqane afenesine Hirama la itre huliwa hna upi angeic hnei Solomona joxu, thatraqane la uma ne hmi ne la nyipi Akötresie. Hane hi la itre huliwa i angeic: 12 Lue poto, me lue hune ipoto kösë kap, me lue ifile nyine heetrëne la lue hune ipoto kösë kap, 13 memine la 400 lao grenad thatraqane la lue ifile, lue xötre grenad ngöne la lue ifile, matre heetrëne la lue hune ipoto kösë kap, 14 memine la 10 lao ikatr, me 10 lao trepene tim hune la itre ikatr, 15 memine la Hnagejë, me 12 lao kau fene la Hnagejë, 16 me itre itrapë hnatresij, me itre pel, me itre fok, me nöjei ewekë kopa ka jijia, hna kuca hnei Hiramabi* koi Solomona joxu, me kowe la uma ne hmi i Iehova. 17 Hnene la joxu hna iup troa ahmun itre ej ngöne la dro ka fedr nge ka hmekön. Hna kuca lai ngöne la hnathup e Ioridrano,* nyipine Sukotha me Zaretana. 18 Nyimutre catre la itre ewekë cili hnei Solomona hna xup, nge goi tha tuluthe fe la ehacene kopa hna huliwan.

19 Solomona a kuca asë jë la itre ewekë thatraqane la uma ne hmi ne la nyipi Akötresie, ene la ita ne huuj gool, me itre laulau nyine atë la itre falawa nyine amaman,* 20 me itre ita ne laam, me itre laame hna kuca hnei nyipi gool, lo hna amelen ngöne la hnë lö ne la Gaa Nyipi Hmitrötr,* thenge lo hna amekötin, 21 me itre iengen, me itre laame cil, me itre akofe gool hna kuca hnei nyipi gool, 22 me itre fizi, me itre kap, me itre ver, me itre trengene eë hna kuca hnei nyipi gool, memine la hnë lö ne la uma* ne hmi, me itre qëhnelö e hnin ka tro kowe la Gaa Nyipi Hmitrötr, me itre qëhnelö ne la uma ne hmi hna kuca hnei gool.