Iobu
17 “Pë hë trengecatreng, nge co pe hi la itre drai ne la meleng;
Ke kola treqe ni hnene la hua.
2 Kola cil xötreithi ni hnene la itre ka ihnyimasai,
Nge luemekeng a goeëtiline* la aqane icilekeu i angatr.
3 Haawe, pane sisinyi jë koi ni laka, tro nyipëti a xatua ni.
Ke e tha nyipëti kö, ke drei?
4 Hnei nyipëti hna kuca matre tha tro kö angatr a hetre wangatrehmekun;
Celë hi matre, tha nyipëti kö a nue angatr troa hun.
5 Ame itre xan, angatr a thawa la itre ewekë i angatr kowe la itre sinee i angatr,
Ngo kolo pe a mama la jiin ngöne la luemeke ne la itre nekö i angatr.
6 Hnei nyidrëti hna kuca matre tro la itre nöj a methinë* ni,
Nge eni hë la ketre atr hna hnyijuëne la iqëmek.
7 Kucakuca ha la luemekeng hna treij,
Nge kösë iahnu la ngönetreing asë.
8 Ame la kola öhne lai hnene la itre atre ka meköt, angatr a sesëkötr,
Nge kola elëhni la atre ka pë ethan, pine la itre atr ka tha metrötrë* Akötresie.
9 Tro pala hi la atre ka meköt a trongëne la itre jë i angeic,
Nge tro ha catre trootro la atre ka hetre ime ka wië.
10 Ngo loi e tro epuni a qejepengöne hmaca,
Ke pëkö atr ka inamacan hnenge hna öhne thei epun.
11 Kola ha nyipune la itre drai ne mele ni;
Patre hë la itre hnenge hna mekun, me itre aja ne la hning.
12 Angatr pala hi a nyihnane la lai hnene la jidr,
Ke angatr a qaja ka hape: ‘Easenyi hë la lai, ke jidri la.’
13 Maine tro ni a itreqe, tro hë la Hua* a nyi hnalapang;
Nge tro ni a hnëkëne la göhneng ngöne la gaa melöhlem.
14 Tro hë ni a sue kowe la hnaop* ka hape: ‘Eö la kemeng!’
Nge ame kowe la wanak: ‘Eö la thineng me xang!’
15 Haawe, ekaa la mejiuneng?
Nge drei la ka hnëkë mejiune koi ni?