Salamo
Thatraqane la atre jumi traem; ngöne la nin: “The apatrene kö.” Mikitam* i Dravita.
58 Atreine kö epuni qeje meköt, ngo epuni pe a lapa thaup?
Atreine kö epun amekötin thenge la meköt, ngacama itre nekö i atre pe epun?
2 Epuni pe a mekun la itre ewekë ka tha meköti kö e kuhu hni i epun,
Nge itre ime i epun a isi trootro ngöne la nöj.
3 Itre ka tria* la itre atr ka ngazo, qaane lo kola hnaho* angatr;
Itre ka icilekeu angatr me thoi, qaane lo kola mala angatr.
4 Ceitune hi la poizine i angatr memine la poizine i un;
Ka simi hnangenyë angatr tune la asip,* ka thinge la hnangenyën ej.
5 Tha tro kö ej a dreng la aqane ewekë ne la itre ka iaö,
Ngacama catrehnine pi hë la kuci iöni i angatr.
6 Akötresieti fe, thë akaqane pi la itre inyö i angatr!
Iehova fe, thë pi la itre që ne la itre liona* cili!
7 Epi tro angatr a patr tune la itre tim ka isa ije.
Epi tro Akötresieti a wenë la tane pehna i nyidrë, me akeinyi angatr hnene la itre ane pehna i nyidrë.
8 Epi tro angatr a tune la catrei ka iëz ngöne la kola wewë trootro;
Tune la nekönatr ka mec la kola hnahon matre tha öhne ju kö la jö.
9 Qëmekene tro la itre öle i epun a dreng la idreuthine la itre sinöe ka ithiny,
Tro nyidrëti a ufe la itre wanapalaman ka hatr me ka mel, kösë hna uf hnene la ketre udreli.
10 Tro hë la atr ka meköt a madrine troa öhne la kola troa të koi angatr;
Tro hë la lue ca i angeic a siëne la madra ne la itre atr ka ngazo.
11 Tro hë la itre atr a qaja ka hape: “Eje hi, hetre thupen ka loi kowe la itre atr ka meköt.
Hetre Akötresie ka amekötin e celë fen.”