Nyima i Solomona
3 “Ngöne la itre jidr, hune la hnë meköleng,
Hnenge hna thel la hniminang.
Hnenge hna thele angeic, ngo tha öhnyi angeice kö ni.
2 Tro ni a mejë me trongëne la traon;
Ngöne la itre gojeny me ngöne la gaa tru atr,
Tro ni a thel agöne la hniminang.
Hnenge hna thele angeic, ngo tha öhnyi angeice kö ni.
3 Hnenge hna ixelë memine la itretre thup ka tro kanothe la traon.
‘Tha öhne kö epuni lo hniminang?’
4 Thupene ju hi la eahuni a ixelë,
Öhne ju hi ni lo hniminang.
Hnenge hna ea catrë angeic, ke xele ni ma nue angeic
E tha hnenge kö hna pane lö sai angeic kowe la uma i nenë,
Ngöne la hnahage ne la föe ka hnaho ni.
5 Itre jajinyi ne Ierusalema fe, pane sisinyi jë koi ni,
Jëne la itre gazel me itre drube föe ne hnitr, ka hape:
Maine pë pala kö ihniming, the amejëne kö nge the ahlëne kö e kuhu hning.”
6 “Nemene la ewekë celë ka so draië qa ngöne la hnapapa kösë iaw,
Ka pui muro me libanu,
Me nöjei paudra ka punepun ne la atre salem?”
7 “Kolo hnë saaju i Solomona.
Kola cile xötreithi nyidrë hnene la 60 lao trahmany ka catr,
Hna iën thene la itre trahmany ka catr ne Isaraela.
8 Hetre taua i angatr asë,
Hna ini angatr asë troa isi,
Hna athipe la taua ngöne la isa gö i angatr
Matre thupëne la joxu e jidr.”
9 “Kolo ili* i Solomona Joxu
Hnei nyidrëti hna kuca memine la itre sinöe ne Lebanona.
10 Hnei nyidrëti hna kuca la itre ikapa i nyidrë hnei sileva,
Me hnë ati wanakoime i nyidrë hnei gool.
Hna kuca la icea i nyidrë hnei drela ka madra mit;
Hnene la itre nekö jajinyi ne Ierusalema
Hna thaipine la göhne i nyidrë cememine la ihnim.”
11 “Ha nekö jajinyi ne Ziona fe, lö pi,
Nge hai Solomona Joxu jë.
Nyidrëti a petrëne la ikorona* ne faipoipo hna kuca hnei thine i nyidrë
Ngöne lo drai ne faipoipo i nyidrë,
Drai ka amadrinën la hni i nyidrë.”