Isaia
15 Itre trengewekë göi Moaba:
Ngöne hi la ca jidr, hna apatrenyi angatr,
Hna lep ahumunyi Ara-Moaba.
Ke ngöne hi la ca jidr, hna apatrenyi angatr,
Hna lep ahumunyi Kira-Moaba.
2 Hnei angatr hna elë kowe la uma ne hmi e Dibona,
Ngöne la itre hnë hmi* gaa hmitrötr matre treij.
Moaba a treije pi Nebo me Medeba.
Ase hë angatre cin apan la itre he i angatr, me xöje la itre ienaje i angatr.
3 Hnei angatr hna heetrëne la itre ibëek ka tru thenyin ngöne la itre gojeny.
Angatr a sue hune la itre uma me ngöne la itre gaa tru atr;
Angatr a treije latresi.
4 Hesebona me Eleala a treije latresi;
Kola drenge la meje i angatr uti hë e Iahaza.
Qa ngöne lai, kolo pala hi a sue la itre soc ne Moaba.
Angatr a hmengöhmengön.
5 Kola treije la hning pi Moaba.
Ke kola kötr la itre atre i angeic a tro Zoara me Egelath-Selisia.
Ngöne la sasala ne Luhith, angatr a elë me treije trootro;
Ngöne la gojenyi ne tro Horonaim, angatr a hokötr pine la ka traqa.
6 Ke qaqacile hë la itre tim ne Nimera;
Fitre hë la itre haö,
Patre hë la haö, nge pë fe ca hnitr ka cia.
7 Celë hi matre, kola xometrongëne la itre kemej, me itre mo;
Angatr a sasaithe la hnathup* ne la itre sinöe garaba.
8 Ke kola mexem la itre treije ngöne la nöje Moaba asë.
Kola drenge la itre aqane hokötre uti hë Egelaim;
Kola drenge la itre aqane hokötre uti hë Beer-Elima.
9 Ke tiqa ha hnei madra la itre tim ne Dimon,
Nge eni hmaca a hnëkën la itre xaa akötr koi Dimon:
Ene la itre liona kowe la angetre Moaba ka kötr
Me kowe la itre ka lapa pe ngöne la nöj.