Isaia
16 Iupe jë la ca nani trahmany kowe la joxu ne la nöj,
Nge qa Sela, upe pi la nani ngöne la hnapapa
Uti hë la wetre ne la nekö jajiny ne Ziona.
2 Tune la waco hna helën qa ngöne la trengen ej,
Celë hi pengöne la itre nekö jajiny ne Moaba ka cil ngöne la gaa tëtë* ne Arenona.
3 “Eamone jë, nge trongëne jë la hna axeciën.
Ame e hnaipajö, tro la iahnue i ö a tune la jidr.
Juetrëne ju la itre hna isa ijen, nge the qajaqaja kö la itre ka kötre mel.
4 Moaba fe, nue pi la itre atreng hna isa ijen matre lapa thei ö.
Loi e tro eö a nyi hnë zae i angatr pine la atre ihumuth.
Tro ha apatrene la atre ihumuth,
Tro ha nyipune la akötr,
Nge tro ha xometrij qa ngöne la ihnadro la itre ka wajahuje la itre xan.
5 Tro ha acile hutine la ketre theron hnene la ihnim.*
Qa ngöne la itat i Dravita, tro la ketre joxu a të hune la theron, me mele nyipici;
Tro angeic a amekötin thenge la thiina ka meköt, me saqe kuca la meköt.”
6 Ase hë huni drei mejen la pi tru i Moaba, ene la etrune la pi mama i angeic
Memine la aqane pi hun, me pi tru, me elëhni i angeic;
Ngo ka pë aliene la itre trengewekë i angeic.
7 Qa ngöne lai, tro Moaba a sue pine la akötre i angeic;
Tro angatr asë a itreijeny.
Tro la itre ka kucakuca a awe, ke angatr a treije pine la itre gato rezë ka qaqacil ne Kira-haraseth.
8 Ke fitre hë la itre hlapa ne Hesebona,
Memine la itre vin* ne Sibema,
Nge hnene la itre joxu ne la itre nöj hna waja la picin ej ka madra;*
Ene lo itre picin ka xötr uti hë e Iazera, nge ka traqa kowe la hnapapa;
Hnene la itre picin ej hna xöl.
Me xötr uti hë la hnagejë.
9 Celë hi matre tro ni a treije pine la hnënge vin ne Sibema, tune lo eni a treije pi Iazera.
Hesebona me Eleala, tro ni a thue ime i epon hnene la itre trenge timidrang,
Ke tha drenge* hë ni la kola madrin pine la itre wene sinöe hna menuën ngöne la ijine hedredrei.
10 Pëhë madrin me hnyima ngöne la hlapa,
Nge pë fe hë ka nyima me sue madrin ngöne la hnënge vin.
Patre hë la itre ka waja la itre wene rezë ngöne la hnë weje wene vin,
Ke ase hë ni thupatëne la madrine i angatr.
11 Celë hi matre, tha lapa hnyawa kö la hning, nge eni a seseu koi Moaba,
Tune la itre ifilene arp,
Nge ame e kuhu hning eni a xou göi Kira-Heres.
12 Ngacama tro Moaba a kucakuca ngöne la itre hnë hmi gaa hmitrötr, me thith ngöne la uma ne hmi i angeic, ngo tha tro kö a hetre thangan.
13 Celë hi trengewekë hnei Iehova hna qaja göi Moaba. 14 Nge öni Iehova ka hape: “Ame ngöne la köni macatre (thenge la aqane e la itre macatre ne la atre ka huliwa),* tro ha thaipiëne* la lolo i Moaba, me traqa la nöjei pengön akötr. Nge xalaithe pe hi la ka troa mel.”