Ieremia
14 Hane hi la hnei Iehova hna qaja koi Ieremia göne la itre ijine qaqacil:
2 Iudra a hnëmec, nge hnyeqetre hë la itre qëhnelö ne la itre traone i angeic.
Itre ej a kei trootro uti hë la kola mala e kuhu hnadro,
Nge kola elë la mejen la atr ka sue qa Ierusalema.
3 Itre maseta a upe la itre hlu* troa thele tim.
Itre hlu a tro kowe la hnë tha tim* ngo pëkö tim.
Angatr a bëeke fë la itre trengen ka pë alien.
Angatr a hmahma me hleuhleu,
Me juetrën la itre he i angatr.
4 Itre ka eënyi a atu he me sesëkötre ngazo,
Ke kaqakaqa ha la dro,
Eje hi, tha mani pi kö ngöne la nöj.
5 Nge ame fe ngöne la hlapa, kola nuetrij la nekön hna nyipi hnahon hnene la drube föe
Ke pëhë haö.
6 Itre boliko wael a cil hune la itre sasala ka papa.
Itre ej a manomano tune la itre kuli wael ka meci hnei pi ij;
Kucakuca ha la luemeke i angatr hna thele xen.
7 Iehova fe, isigöline jë la ëje i nyipë,
Ngacama kola upezö hun hnene la itre ngazo hun.
Eje hi, nyimutre catre la itre aqane mele thoi hun,
Nge nyipëti hi la hne huni hna ngazo kow.
8 Atre amele Isaraela fe, atre amele angeic ngöne la ijin akötr,
Hnauëne laka, ceitui nyipë me trenyiwa ngöne la nöj,
Me tune la atre ihamë ka traqa hi e jidr troa meköl?
9 Hnauëne laka, ceitui nyipë me ketre atr ka sesëkötr,
Me tune la atre iamele ka thatrein amelen?
Ke nyipëti kö e nyipi hun Iehova,
Nge ëje i nyipë la hne huni hna xom.
Haawe, the nuetriji huni kö.
10 Hane hi la hnei Iehova hna qaja göne la nöje ce: “Pi tro pala hi angatr a ngenu agö. Thatreine kö angatr xomehnöth la lue ca i angatr, nge methi Iehova lai. Enehila, tro hë nyidrëti a mekun la itre tria i angatr, me ihnyingë pine la itre ngazo i angatr.”
11 Thupene lai, öni Iehova koi ni: “The thithi kö koi ni matre troa amanathithin la nöje ce. 12 Ame la angatr a tha xen, tha eni kö a dreng la itre xëwe i angatr. Nge ame la angatr a tro fë huuje ne dreuth asë me itre huuj ne wene feja,* tha eni kö a semesinen. Tro ni a apatrenyi angatr hnene la isi,* me jiin, me itre mec ka ixötrekeu.”
13 Ngo öning: “Ekölöhini Iehova Joxu Ka Sisitria! Itre perofeta a qaja koi angatr ka hape: ‘Tha tro kö a traqa koi epuni la isi me jiin, ke tro ni a hamë epuni la tingeting ngöne la nöje ce.’”
14 Öni Iehova hmaca koi ni: “Itre perofeta a qeje trengathoi ngöne la ëjeng. Tha hnenge kö hna upi angatr, pëkö hnenge hna ahnithe koi angatr, nge tha hnenge kö hna ithanata koi angatr. Angatre pe a perofetan la itre hna meköl goeëne ka thoi, me itre hna perofetan ka pë alien, me itre trenge iaö.* 15 Haawe, hane hi la hna qaja hnei Iehova: ‘Ame la itre perofeta hnenge hna tha up, ngo ka perofetan ngöne la ëjeng ka hape, tha tro kö a traqa la isi me jiin ngöne la nöje ce, ke tro hë angatr a mec hnei isi me jiin. 16 Nge ame la itre ka drei angatr, ke tro fe angatr a meci hnei jiin me isi. Tro ha triji angatr ngöne la itre gojenyi e Ierusalema, nge pëkö ka troa kelemi angatr, me itre föi angatr, me itre nekö i angatr trahmanyi me jajiny. Ke tro ni a nenge hui angatr la akötr hnei angatr hna thel.’
17 “Qaja ju koi angatr ka hape:
‘Epi tro pala hi a neni la itre trenge timidra qa ngöne la luemekeng e lai me jidr,
Ke ase hë wajahuj me lep angazon la nyipi jajiny,* jajinyi ne la nöjeng,
Tru catre la eatre i angeic.
18 Ame la eni a tro ngöne la hlapa,
Öhne hi ni la itre atr hna humuthe hnei taua!
Nge ame la eni a lö ngöne la traon,
Öhne hi ni la itre atr ka wezipo hnei pi xen!
Hnene la perofeta memine la atre huuj hna trongën la nöj hna thatre.’”
19 Hapeu, hnei nyipëti kö hna nuetriji Iudra maine sisi Ziona?
Hnauëne laka, hnei nyipë hna lepi hun uti hë la troa pë nyin la itre eatre hun?
Easë lo a aja tingeting, ngo pëkö loi ka traqa,
Easë lo a treqene la ijine troa aloinyi së, ngo xou pe la ka traqa!
20 Iehova fe, atre hi hun laka, hne huni hna iakötrë,
Nge atre fe hun la itre ngazo ne la itre qaaqa hun,
Ke hne huni hna ngazo koi nyipë.
21 Pine la ëje i nyipë, the nuetriji huni kö;
The wangacone kö la therone i nyipë ka draië.
The thëthëhmine kö la isisinyikeu i nyipë me eahun, nge the apatrene kö.
22 Hapeu, ijije kö tro la idrola ka pë alien ne la itre nöj a axulune la mani?
Maine pena, ijije kö tro la hnengödrai a sipu mekun troa axulune la mani?
Iehova fe Akötresi hun, nyipëti hmekuje hi la ka atrein!
Nge eahuni a mejiune koi nyipë,
Ke nyipëti hi la ka xup la nöjei ewekë cili!