Ieremia
26 Ame la kola nyiqaane musi hnei Iehoiakima nekö i Iosea, joxu ne Iudra, hnei Iehova hna ithanata koi Ieremia, me hape: 2 “Hane hi la hna qaja hnei Iehova: ‘Cile jë ngöne la kur ne la uma ne hmi i Iehova, nge qaja jë göne* la itre atrene la itre traon e Iudra ka traqa troa thith* ngöne la uma ne hmi i Iehova, la nöjei ewekë hnenge hna ahnithe koi ö; the thëthëhmine kö la ketre hna ithanata. 3 Nge maine jë, tro hë angatr a dreng me nuetrije la itre aqane ujë i angatr ka ngazo. E cili, tha tro hmaca kö ni* a axulune lo akötr hnenge hna mekun troa kuca koi angatr, pine la itre ngazo i angatr. 4 Hape jë koi angatr: “Hane hi la hna qaja hnei Iehova: ‘Drei ni ju, eje hi, metrötrëne ju la wathebo* hnenge hna hamë epun, 5 nge drenge ju la itre hlueng perofeta, lo hnenge hna anyimua* upe koi epun, ngo tha hnei epuni pe hna dreng. 6 Wanga tro ni a kuca kowe la uma celë tun e Silo, nge tro la nöjei nöj a qaja la traone celë ngöne la angatr a ieji.’”’”
7 Ame hna drenge la itre trengewekë i Ieremia hnene la itre atre huuj, me itre perofeta, me nöjei atr ngöne la uma ne hmi i Iehova. 8 Matre ame hë la Ieremia a ase tro fë la maca i Iehova kowe la nöj, ke hnene la itre atre huuj, me itre perofeta, me nöjei atr hna xolouthi angeic, me hape: “Tro hë eö a mec. 9 Hnauëne laka, eö a perofetan ngöne la ëje i Iehova ka hape, tro la uma celë a tun e Silo, nge tro ha patr me pë atrene la traone celë?” Nge hnene la ka ala nyim hna cile kanothi Ieremia hnine la uma ne hmi i Iehova.
10 Matre ame hë la kola drenge lai hnene la itre nekö i joxu ne Iudra, angatr a tro pi qa ngöne la uma i joxu me elë kowe la uma ne hmi i Iehova, me lapa ngöne la qëhnelö ka hnyipixe ne la uma ne hmi i Iehova. 11 Nge hnene la itre atre huuj me itre perofeta hna qaja kowe la itre nekö i joxu, me kowe la ka ala nyim ka hape: “Loi e troa meci la atr ce, pine angeic perofetane la akötr kowe la traone celë. Drenge hnyawa hi epuni lo!”
12 Nge öni Ieremia jë hi kowe la itre nekö i joxu me kowe la ka ala nyimu ka hape: “Iehova la ka upi ni troa perofetan la hnei epuni hna dreng göne la uma celë, me traone ce. 13 Matre enehila, saze pi la aqane ujë i epun me itre thiina i epun, nge drei Iehova jë Akötresi epun. E cili, tha tro hmaca kö* Iehova a axulune lo akötr hnei nyidrëti hna mekun koi epun. 14 Ngo ame kö ni, eni pë hë ngöne la hnatrapaime i epun. Isa wange ju pë hë epun la nyine tro epuni a kuca koi ni. 15 Ngo lapa atre ju laka, e tro epuni a humuthi ni, zöi epuni hë la madra ne la atr ka pë engazon, epun memine la traone ce, me itre atren. Ke Iehova hi la ka upi ni troa tro fë la maca celë koi epun.”
16 Ame hnene la itre nekö i joxu memine la ka ala nyim, hna qaja kowe la itre atre huuj me itre perofeta ka hape: “Tha meköti kö troa humuthe la atre ce, ke angeic a ewekë koi së ngöne la ëje i Iehova Akötresi së.”
17 Ketre, hnene fe la itre xaa qatr ne la nöje hna cil, me hape kowe la ka ala nyim: 18 “Ngöne la ijine mus i Hezekia joxu ne Iudra, hnei Mika qa Moresa hna perofetan kowe la nöje Iudra ka hape: ‘Hane hi la hna qaja hnei Iehova joxu ne la itre trongene isi e hnengödrai:
“Troa uja dro e Ziona tune la kola tron la ketre hlapa,
Me lep apatrenyi Ierusalema,
Nge tro la wetre ne la Uma* a tune la sasala* ka tiqa hnei sinöe.”’
19 “Ngo hapeu, hnei Hezekia kö joxu ne Iudra me angetre Iudra hna humuthi angeic? Waea. Hnene la joxu hna xoue Iehova me xëwe* koi Iehova. Matre tha hnei Iehova ju kö* hna axulune lo akötr hnei nyidrëti hna mekun. Ngo tune kaa fe së, tha easë kö la a hëne la akötr ka tru?
20 “Nge hetre ketre atr fe ka perofeta ngöne la ëje i Iehova: ene Uria nekö i Semaia qa Kiriatha-Iarim. Hnei angeice fe lo hna perofetane la akötr ka troa traqa kowe la traone celë me nöje ce. Casi hi lo itre trengewekë i angeic me Ieremia. 21 Ame hna drenge lai hnei Iehoiakima joxu, me itre atre i nyidrë ka catr, me itre nekö i joxu. Nge hnene la joxu hna thele troa humuthi angeic. Matre ame hë la kola drenge lai hnei Uria, hnei angeice hna xou me kötr a tro Aigupito. 22 Ame hnei Iehoiakima joxu hna upi Elenathana nekö i Akebora, memine la itre xaa trahmany a tro Aigupito. 23 Hnei angatre hna bëeke sai Uria qa Aigupito me tro sai angeice koi Iehoiakima joxu. Thupene lai, hnene la joxu hna humuthi angeic hnei taua, me kuiëne la ngönetrei angeic ngöne la hnë kele wezipo ne la nöjei atre menu.”
24 Eloine pe, hna isigöli Ieremia hnei Ahikama nekö i Sefana, matre mele ju kö Ieremia qa ngöne la ime ne la ka ala nyim.