Ieremia
34 Ame lo ijine Nebukaneza* joxu ne Babulona, me trongene isi i angeic, me nöjei baselaia ne la fen hnei angeic hna musinën, me nöjei nöj a lepi Ierusalema memine la itre traon ezin, hnei Iehova hna ithanata koi Ieremia me hape:
2 “Hane hi la hna qaja hnei Iehova, Akötresi Isaraela: ‘Tro jë troa ithanata me Zedekia joxu ne Iudra me hape: “Hane hi la hna qaja hnei Iehova: ‘Tro ni a nue la traone celë kowe la joxu ne Babulona, nge tro hë angeic a dreuthetriji ej. 3 Thatreine kö eö troa kötre angeic, ke tro ha othi ö me nue eö kowe la joxu ne Babulona. Tro eö a öhnyi angeic hnene la luemeke i ö, me ithanata iqëmekë me angeic, nge tro hë eö a tro Babulona.’ 4 Ngo Zedekia fe joxu ne Iudra, pane drenge ju la hna qaja hnei Iehova: ‘Hane hi la hna qaja hnei Iehova göi ö: “Tha tro kö a humuthi ö hnei taua. 5 Tro eö a meci tingeting. Nge tro ha dreu ka pui loi ngöne la ijine kelemi ö, tune lo aqane kuca ekö kowe la itre qaaqaa i ö, lo itre joxu ka tro pa. Nge tro la itre atr a treije pi ö me hape: ‘Ekölöhini maseta!’ Eje hi, ‘celë hi lo hnenge hna qaja,’ öni Iehova.”’”’”
6 Ame hnei Ieremia perofeta hna tro Ierusalema troa tro fë la itre trengewekë celë koi Zedekia joxu ne Iudra. 7 Ngöne lo ijine cili, hnene la trongene isi ne la joxu ne Babulona hna lepi Ierusalema, memine la lue traon ne Iudra ka lapa pe, ene Lakisa me Azeka. Eje hi, kolo pe hi lo lue traon hna eköhagen e Iudra hna tha hane kö thapa.
8 Hnei Iehova hna ithanata koi Ieremia, thupene la Zedekia joxu me angetre Ierusalema a sisiny troa nue hmaca la itre hlu. 9 Tro angatr a isa nue la itre hlue i angatr trahmanyi me föe, lo angetre Heberu; tha tro hmaca kö angatr a thahluëne la ketre trejin me angatr qa Iudra. 10 Ame hna idrengethenge hnene asë hi la itre nekö i joxu, me itre atrene la nöj. Jëne la isisinyikeu cili, hnei angatr hna sisinyi troa nue la itre hlue i angatr trahmanyi me föe, nge loi e troa canga nue angatr. Ame hnei angatr hna idrengethenge me nue la itre hlu. 11 Ngo e thupen, hnei angatr hna hëne hmaca lo itre hlu hnei angatr hna nue hë, me thahluë angatre hmaca. 12 Matre hnei Iehova hna ithanata koi Ieremia, öni Iehova:
13 “Hane hi la hna qaja hnei Iehova, Akötresi Isaraela: ‘Ame lo drai ne eni a amelene la itre qaaqaa i epun qa Aigupito, lo nöje ka thahluë angatr, hnenge hna isisinyikeu me angatr me hape: 14 “Thupene la 7 lao macatre, tro epuni a isa nue la trejin me epun, lo atre Heberu hnei epuni hna itön, nge ka nyihlue i epun koi 6 lao macatre. Qa i epun troa nue angeic.” Ame pe, tha drei ni kö hnene la itre qaaqaa i epun, nge tha hnangenyëne kö angatr. 15 Ngo eue hi lo, hna saze la aqane ujë i epun: hnei epuni hna kuca la loi qëmekeng ngöne la epuni a nue hmaca la itre trejin me epun. Nge hnei epuni hna sisiny qëmekeng ngöne la uma ka xome la ëjeng. 16 Ngazo pe, hnei epuni hmaca hna saze mekun: hnei epuni hna adrone la ëjeng, la epuni a hëne me thahluëne hmaca lo itre hlu hnei epuni hna nue hë troa trongëne la itre sipu aja i angatr.’
17 “Haawe, hane hi la hna qaja hnei Iehova: ‘Ase hë epuni sisiny troa isa nue la trejin me sinee i epun, ngo tha drei ni pe hnei epun. Haawe, eni hë la a sisinyi troa nue epun troa mec hnei isi,* me itre mec ka ixötrekeu, me jiin,’ öni Iehova. ‘Nge tro la nöjei baselaia ne la fen a xou pine la ewekë ka traqa koi epun. 18 Nge hane hi la ka troa traqa kowe la itre ka ena la isisinyikeung, nge tha ka trongëne kö lo itre hna sisiny qëmekeng, ngöne lo angatr a thupaluëne la neköi kau, me tro nyipine la lue götran. 19 Eje hi, hane hi la ka troa traqa kowe la itre nekö i joxu ne Iudra, me itre nekö i joxu ne Ierusalema, me itre atre huliwa hnine la hnalapa i joxu, me itre atre huuj, me itre atrene la nöj ka tro nyipine la lue götran ne la neköi kau: 20 Tro ni a nue angatr kowe la itre ithupëjia me angatr, me kowe la itre ka thele troa humuthi angatr. Nge tro hë la itre waco me itre öni wael a öni la ngönetrei i angatr. 21 Nge tro ni a nue Zedekia joxu ne Iudra, me itre nekö i joxu i angeic kowe la itre ithupëjia me angatr, lo itre ka thele troa humuthi angatr, memine la trongene isi ne la joxu ne Babulona ka mejë qaathei epun.’
22 “‘Tro ni a amekötin me abëekë angatr kowe la traone ce,’ öni Iehova. ‘Tro angatr a lepe la traon, me thapa, me dreuthetrije ej. Nge tro ni a kuca matre tro la itre traon ne Iudra a tune la ketre hnapapa gaa pë atren.’”