Ieremia
41 Ngo ame ngöne la hna 7 ne treu, hnei Isamaela nekö i Nethania, lo nekö i Elisama, ketre atren la fami i joxu* nge ka huliwa i joxu, hna traqa memine la ala 10 e Mizepa, troa wai Gedalia nekö i Ahikama. Ame hë lo angatr a ce xeni e Mizepa, 2 mejë jë hi Isamaela nekö i Nethania memine lo 10 lao trahmany, troa humuthi Gedalia hnei taua, lo nekö i Ahikama, nekö i Safana. Aqane humuth angeice lai, lo tan ne la nöj hna acil hnene la joxu ne Babulona. 3 Hnei Isamaela fe hna humuth la angetre Iudra ka ce me Gedalia e Mizepa, memine la itre soc i angetre Kaledaia e cili.
4 Ame lo drai thupene la kola humuthi Gedalia, ngacama pë pala kö ka atre la ewekë ka traqa, 5 ngo hna traqa la 80 lao trahmanyi qa Sekema, me Silo, me Samaria. Hna cin la itre ienaj i angatr, nge ka zezen la itre iheetre i angatr, nge hnei angatr hna sijasija la ngönetrei i angatr. Hnei angatr hna traqa fë itre wene feja, me libanu nyine huujën ngöne la uma ne hmi i Iehova. 6 Ame hnei Isamaela nekö i Nethania hna tro qa Mizepa troa ixelë me angatr. Angeic a treije trootro. Ame hë la angeic a ixelë me angatr, öni angeice jë hi: “Trohemi ma wai Gedalia nekö i Ahikama.” 7 Ngo ame ju hi la angatr a lö hnine la traon, ke Isamaela nekö i Nethania me itre atre i angeic a humuthi angatre pi, me kuië angatr hnine la sima.
8 Ngo önine jë hi la ala 10 thei angatr koi Isamaela: “The humuthi huni kö! Hne huni hna juetrë qitr, me bali, me oel, me miel ngöne la hlapa.” Matre tha humuthi angatre ju kö hnei Isamaela, me itre sinatronge i angatr. 9 Ngo hnei Isamaela pë hë hna trije la itre hnei angeic hna humuth, e hnine la sima ka tru hnei Asa joxu hna kuca koi Baasa joxu ne Isaraela. Kolo hi lo sima hnei Isamaela nekö i Nethania, hna nyialien hnene la itre ngönetrei ka mec.
10 Ame hnei Isamaela hna akalabusine la angetre Mizepa ka lapa pe, me itre nekö i joxu jajiny, memine la nöjei atr ka lapa e Mizepa, lo hnei Nebuzaradana tane la itre ka thupë joxu, hna ahnith koi Gedalia nekö i Ahikama. Hnei lsamaela nekö i Nethania, hna akalabusi angatr me tro kowe la angetre Amona.
11 Matre ame hë la Iohanana nekö i Karea me itre tane isi i angeic, a drenge la ngazo hna kuca hnei Isamaela nekö i Nethania, 12 hnei angatr hna ce tro memine la itre soc i angatr asë, troa isi me Isamaela nekö i Nethania. Hnei angatr hna ee angeic ezine la itre timi ka tru* e Gibeona.
13 Tha aqane madrine kö la itre hna akalabusin hnei Isamaela, la angatr a öhnyi Iohanana nekö i Karea memine la itre tane isi. 14 Matre hnene lo itre hna akalabusin hnei Isamaela e Mizepa, hna bëeke hmaca me Iohanana nekö i Karea. 15 Ngo hnei Isamaela nekö i Nethania memine la 8 lao atre i angeic, hna kötre Iohanana me tro koi angetre Amona.
16 Ame hnei Iohanana nekö i Karea me itre tane isi hna bëeke fë la angetre Mizepa ka lapa pe, ene lo itre hna thapa qaathei Isamaela nekö i Nethania, thupene lo angeic a humuthi Gedalia nekö i Ahikama. Hnei angatr hna tro hmaca qa Gibeona memine la itre trahmany, me itre soc, me itre föe, me itre nekönatr, me itre ka huliwa i joxu. 17 Ngöne la gojeny, hnei angatr hna pane cil ngöne la ketre neköi otel e Kimeama, ezine Bethelema, ke aja i angatr troa tro Aigupito 18 pine la angetre Kaledaia. Eje hi, angatr a xouene la angetre Kaledaia, ke hnei Isamaela nekö i Nethania hna humuthi Gedalia nekö i Ahikama, lo hnei joxu ne Babulona hna acil hune la nöj.