Itre Treije i Ieremia
א [Aleph]
4 Tha melemele hë lo nyipi gool, lo gool ka melemel!
Ekölöhini pë hë la itre etë ka hmitrötr!* Ase hë trij ngöne la nöjei hna ijejea!*
ב [Beth]
2 Ame pena lo itre nekö hnimina i Ziona, lo hna tuluth tune la nyipi gool,*
Ke ase hë xome ceitu angatr me itre trengene tim hna kuca hnei dro ka fedr,
Lo huliwa ne la atre xupi inege!
ג [Gimel]
3 Ame la itre kuli wael, ke angatr a iji thin la itre nekön,
Ngo ame kö la nekö jajinyi ne la nöjeng, ke ngazo hë la thiina i angeic, tune lo itre iaena* ngöne la hnapapa.
ד [Daleth]
4 Fedre hë la thinemene la medreng hnei pi ij.
Itre nekönatr a sipo falawa, ngo pëkö ka hamë angatr.
ה [He]
5 Ame lo itre ka majemine xeni la itre xen ka lolo, angatre ha meköl e cahu gojeny hnei mecijiin.*
Ame lo itre ka heetrë iheetre ka madra palulu, angatre ha hle hnatresij.
ו [Waw]
6 Tru catre kö la aqane amekötine* la nekö jajinyi ne la nöjeng hui Sodroma,*
Lo hna aca tro apatren, nge pëkö atre amelen.
ז [Zayin]
7 Ka wië kö la itre nazeri i angeic hune la kiona, nge ka wië kaca kö angatr hune la melek.
Madra catre kö la ngönetrei i angatr hune la itre korai, nge angatr a melemel tune la itre safairo.
ח [Heth]
8 Ngo wetrewetre catre hë la ngönetrei i angatr hune la wanalep;
Nge goi tha wangatrehmekunyi angatre fe e cahu gojeny.
Fedre hë la ikupeine i angatr hune la itre ijune i angatr, tune la sinöe ka qaqacil.
ט [Teth]
9 Loi ju kö la troa meci hnei taua hune la troa meci hnei mecijiin,
Hune la troa ae la ngön, ke pëhë xen ngöne la itre hlapa.
י [Yod]
10 Hnene la itre thine ka itrotrohni hna atrone la itre nekö i angatr hnene la sipu ime i angatr.
Hnei nyudren hna nyi xeni ne hnëmec i angatr, lo kola akötrëne la nekö jajinyi ne la nöjeng.
כ [Kaph]
11 Hnei Iehova hna amamane la elëhni i nyidrë;
Me nenge la trengehni i nyidrë.
Nyidrëti a amelene la eë ka tru e Ziona, matre dreuthetrij la itre trepen.
ל [Lamed]
12 Tha mekune kö la itre joxu ne la fen me itre atren la traon laka
Tro la ka icilekeu memine la ithupëjia a lö qa ngöne la itre qëhnelö ne Ierusalema.
מ [Mem]
13 Hna traqa lai, pine la itre ngazo ne la itre perofeta me itre tria ne la itre atre huuj,
Ka anenine la madra ne la itre atr ka meköt nyipine la traon.
נ [Nun]
14 Hnei angatr hna tro menu e cahu gojeny tune la itre timek.
Pine laka si madra hë angatr,
Matre pëkö ka atreine ketr la iheetre i angatr.
ס [Samekh]
15 Kola sue koi angatr ka hape: “Itre ka pui ngazo, tro pi! Tro pi! Tro pi! The ketri huni kö!”
Ke itre ka pë hnalapa hë angatr nge ka tro menu.
Kola iqajakeun nyipin la itre nöj ka hape: “Tha ijiji angatre kö troa ce lapa me easë.*
פ [Pe]
16 Iehova hi* la ka aisaije angatr;
Tha tro hmaca kö nyidrëti a goeë angatr me hnimi angatr.
Pë hmaca kö metrötre ne la itre atr kowe la itretre huuj, me ihnim kowe la itre qatr.”
ע [Ayin]
17 Enehila mina fe, genyi hë la luemeke hun hna treqene la atre ixatua.
Hne huni hna lapa treqene la ixatua qaathene la ketre nöj ka thatreine amele hun.
צ [Tsade]
18 E a ca feke ca hun, angatr a weje huzu hun, matre thatreine hë huni lö hnine la traon.
Calemi hë la pun koi hun. Ase hë la itre drai hun, ke traqa ha la pun koi hun.
ק [Qoph]
19 Saqe catre kö la itre ka weje huzu hun hune la itre aeto e hnengödrai.
Hnei angatr hna weje huzu hun hune la itre wetr, me zae treqe hun ngöne la hnapapa.
ר [Resh]
20 Hnei angatr hna umën ngöne la hnaope i angatr ka tru, lo hna iën* hnei Iehova, lo hnamano ne la hnafiji hun,
Lo hne huni hna qaja ka hape: “Tro huni a mel fene la ahnue i nyidrë nyipine la itre nöj.”
ש [Sin]
21 Nekö jajinyi ne Edroma fe, ka lapa ngöne la nöje Uza, sue jë nge madrine jë.
Tro fe a hane line koi ö la ver. Tro hë eö a hnaitö me amaman la ngönetrei i ö ka xöe.
ת [Taw]
22 Nekö jajinyi ne Ziona fe, fenesi hë lo ijine kola ameköti ö.
Tha tro hmaca kö nyidrëti a kötre sai ö.
Ngo tro kö nyidrëti a të la itre tria i ö, nekö jajinyi ne Edroma.
Tro nyidrëti a qaja amamane la itre ngazo i ö.