Ezekiela
19 “Qa i ö troa thinge la nyima ne latresi* göne la itre tan ne Isaraela, 2 me hape:
‘Drei lo thine i ö? Ketre liona föe nyipine la itre liona.
Eahlo lo a meköl nyipine la itre neköi liona ka catr, me hiane la itre nekö i eahlo.
3 Hnei eahlo hna hetrune la ketre nekön, matre ketre liona ka catre hë angeic.
Hnei angeic hna inine la aqane troa heje zezen la itre tha,
Nge goi öni fe angeic la itre atr.
4 Hnene la itre nöj hna drei meje i angeic, me umë angeic hnine la itre hnaope i angatr,
Hnei angatr hna aletrë angeic a tro Aigupito.
5 Hnene la thine i angeic hna itreqe, ngo trotrohnine ju hi eahlo laka, tha tro hmaca kö angeic a bëek.
Matre hnei eahlo pena hna xome la ketre nekön, me hia angeic troa ketre liona ka catr.
6 Hnei angeice fe hna tro nyipine la itre liona, matre ketre liona ka catre hë angeic.
Hnei angeic hna inine la aqane troa heje zezen la itre tha, nge goi öni fe angeic la itre atr.
7 Hnei angeic hna tro nyipine la itre ita ne thup hna eköhagen i angatr me lep apatren la itre traone i angatr,
Matre kola mexeme la aqane ho i angeic ngöne la itre traon hna lep.
8 Hnene la itre nöj ne la itre baselaia xötreith hna traqa troa nue la ifile i angatr hui angeic,
Nge hnei angatr hna umë angeic hnine la hnaope i angatr.
9 Hnei angatr hna xome la aletr, matre umë angeic, me tro sai angeic kowe la joxu ne Babulona.
Hna umë angeic e cili, matre tha tro hmaca kö a dreng la nine i angeic hune la itre wetr ne Isaraela.
10 Ceitune hi la thine i ö me ketre vin hnine la madra i ö,* hna traan ezine la tim.
Jëne la itre tim, hnei eahlo hna wa wen, nge tiqa ha hnei wapicine i eahlo.
11 Ka catre la itre wapicine* i eahlo, kolo itre hna huliwan nyine kuci sine tö ne la itre tan.
Hnei eahlo hna kökötr me sasaithe la itre xaa sinöe,
Mama ha eahlo hnene la edraië i eahlo, memine la etrune la itre dröne i eahlo.
12 Ngazo pe, hna fejetriji eahlo cememine la trengehni, me kuië eahlo e kuhu hnadro,
Hnene la enyi ne koië hna aqaqacilene la itre wen qaathei eahlo.
Hna theatrije la itre picine i eahlo ka catr, matre qaqacile pi hi, ame hna dreuthetrij itre ej.
13 Ase pena ha traa eahlo ngöne la hnapapa,
Ketre nöj ka qaqacil, nge gaa pë tim.
14 Hnene la eë hna xötr qa ngöne la itre wapicin,* uti hë la itre picin ka catr me itre wen,
Matre pë hnyawa ha ca picine ka catr nyine kuci sine tö ne mus.
“‘Celë hi nyima ne latresi, nyine tro pë hë a thing ngöne la kola latresi.’”