Ezekiela
25 Hnei Iehova hmaca hna ithanata koi ni, me hape: 2 “Nekö i atr, ujë jë kowe la angetre Amona, nge perofetane jë la akötr ka troa traqa koi angatr. 3 Qa i ö troa qaja kowe la angetre Amona ka hape: ‘Drenge ju la hna qaja hnei Iehova Joxu Ka Sisitria. Hane hi la hna qaja hnei Iehova Joxu Ka Sisitria: “Öni epuni lo, ‘haha!’ lo kola apuingazone la uma ne hming, me lep apatrene la nöje Isaraela, me kötre fë la itre matra i Iudra. 4 Celë hi matre, tro ni a nue epun kowe la itre atrene Koië. Tro angatr a acile la itre lapa* i angatr thei epun, eje hi, tro angatr a acili itat nyipi epun. Tro angatr a xeni la itre wene sinöe i epun, me iji la meleke i epun. 5 Tro ni a kuca matre tro Raba a ketre hnë axö kamela, nge tro la nöje i angetre Amona a hnë mano ne la itre mamoe. E cili, tro hë epuni a atre laka, Iehova ni.”’”
6 “Ke hane hi la hna qaja hnei Iehova Joxu Ka Sisitria: ‘Hnei epuni hna xexe, me sesësesë hnei madrin,* nge madrine catr epun pine la akötr ka traqa kowe la nöje Isaraela. 7 Celë hi matre, tro ni a xejë la imeng troa lepi epun, me nue epun kowe la itre nöj matre troa thapa la itre ewekë i epun. Tro ni a xometriji epun qaathene la itre atr, me apatrenyi epun nyipine la itre nöj. Tro ni a lep apatrenyi epun, nge tro hë epuni a atre laka, Iehova ni.’
8 “Hane hi la hna qaja hnei Iehova Joxu Ka Sisitria: ‘Öni Moaba me Seira: “Dreng! Ceitui Iudra hi memine la itre xaa nöj!” 9 Celë hi matre, eni a amaman kowe la itre ithupëjia la gaa utiut ne la wetr ne Moaba, ngöne la itre traon ka nyi ifegon, lo ka amingömingöne* la nöj, ene Beth-Iesimoth, me Baala-Meon, uti hë Kiriathaima. 10 Tro ni a nue la angetre Moaba me Amona kowe la itre atrene Koië, matre tha tro hmaca kö la itre nöj a mekune la angetre Amona. 11 Tro ni a eatrëne la hna amekötin göi Moaba, nge tro hë angatr a atre laka, Iehova ni.’
12 “Hane hi la hna qaja hnei Iehova Joxu Ka Sisitria: ‘Hnei Edroma hna të kowe la itre matra i Iudra, nge pine lai, hetre zö i angeice hë. 13 Qa ngöne lai, hane hi la hna qaja hnei Iehova Joxu Ka Sisitria: “Tro fe ni a xejë la imeng matre nyithupene koi Edroma. Tro ni a apatren qa ngöne la nöj la itre trahmanyi me itre öni, me kuca matre tro ej a pë atren. Tro ha humuthi angatre hnei taua, qaan e Temana uti hë e Dedana. 14 ‘Tro ni a të koi Edroma jëne Isaraela nöjeng. Tro angatr a axulune la elëhning me trengehning koi Edroma, matre tro la angetre Edroma a xeni pun la elëhning,’ öni Iehova Joxu Ka Sisitria.”’
15 “Hane hi la hna qaja hnei Iehova Joxu Ka Sisitria: ‘Pine la ecatrene la imethinë i angetre Filisiti, hnei angatr hna ce eköthe la ngazo göi troa të me iapatreny. 16 Matre hane hi la hna qaja hnei Iehova Joxu Ka Sisitria: “Tro ni a xejë la imeng matre lep la angetre Filisiti, me humuth* la angetre Kerethi, me apatrene la itre ka lapa pe ezine la hnagejë. 17 Tro ni a nyithupene hnyawa koi angatr jëne la itre akötre ka tru. Nge tro hë angatr a atre e cili laka, Iehova ni, ngöne la eni a troa të koi angatr.”’”