Ezekiela
27 Hnei Iehova hmaca hna ithanata koi ni, me hape: 2 “Ngo ame kö eö, nekö i atr, thinge jë la ketre nyima ne latresi* göi Turo, 3 nge hape jë koi Turo:
‘Eö ka lapan la itre qëhnelö ne la hnagejë,
Lo atre salem kowe la itre nöj me hnapet ka nyimutre,
Hane hi la hna qaja hnei Iehova Joxu Ka Sisitria:
“Turo fe, öni ö lo: ‘Ka mingöminge catre ni.’
4 Ej e nyipine la hnagejë la itre götrane i ö,
Hnene la itre ka xupi ö hna apexejene la emingömingö i ö.
5 Tune la he, hnei angatr hna kuca la itre inehe i ö hnei göti qa Senir,
Nge hnei angatr hna xome la sinöe arasi ne Lebanona, nyine kuca la ima* i ö.
6 Hnei angatr hna kuca la itre galu i ö hnene la itre sinöe libene qa Basana,
Me kuca hnene la ketre pengöne göti la meken ne la he i ö, nge hna amingömingön ej hnei jiane elefa qa ngöne la itre hnapet ne Kitim.
7 Nge hna xome la lino ka nyimu han qa Aigupito nyine kuca la ivoal* i ö,
Nge hna can la itre titaxapo ne la he i ö, hnei thenyi ka bulu me lino ka madra qa ngöne la itre hnapeti ne Elisa.
8 Angetre Zidona me Arevadi la itre ka galu koi ö.
Turo fe, itre trahmany ka atreine xomi he la itre matelo i ö.
9 tre trahmany ka maca* nge ka atreine huliwa qa Gebala, la ka pelethe la tröne la itre he, matre tha tro kö a lö timin.
Kola isa traqa la nöjei he asë me itre ka huliwa e cili, matre kuci biznes me eö.
10 Itre atre Peresi, me Luda, me Futa la itre ka sine la trongene isi i ö, nge itre ka isi catr angatr.
Hnei angatr hna athipi la itre petr me itre itrapetre ne isi i angatr thei ö, nge angatre la emingömingö i ö.
11 Hnene la angetre Arevadi ka sine la trongene isi i ö, hna cile xötreith troa thupëne la itre ihage i ö,
Nge hnene la itre atr ka catr hna isigöline la itre ita ne thupe i ö.
Hnei angatre hna athipe la itre petr ka raone i angatr hune la itre ihage i ö
Nge hnei angatr hna apexejen la emingömingö i ö.
12 “‘“Hnei Tasesa hna kuci biznes me eö, ke ka trenamo catr eö. Hnei angatr hna itöne la itre ewekë i ö hnei sileva, me fao, me kapa, me plo. 13 Hnei Iavana fe, me Tubala, me Meseka hna hane kuci biznes me eö. Hnei angatr hna itöne la itre ewekë i ö hnei itre hlu, me itre ewekë kopa. 14 Nge hnene la itre matra i Togarema hna itöne la itre ewekë i ö hnei itre hos ne ihul, me itre hos ne isi, me itre miul. 15 Hnei angetre Dedana fe hna hane kuci biznes me eö. Ala nyimu la itre ka salem qa ngöne la itre hnapet ka huliwa koi ö; hnei angatr hna hamë jiane elefa, me itre sinöe ebeni nyine hotr koi ö. 16 Hnei Edroma fe hna kuci biznes me eö, ke tru catr la itre ewekë hnei ö hna kuca. Hnei angatr hna hamë eö la semerado, me drela ka madra, me itre maano hna sili drelan ka nyimu han, me itre nyipi maano, me itre korai, me itre etë ka paluluxötr, nyine itön la itre ewekë i ö.
17 “‘“Hnei Iudra fe me Isaraela hna hane kuci biznes me eö. Hnei angatr hna hamë qitre ne Minith, me itre nyipi xen, memine la miel, me oel, me pomad, nyine itöne la itre ewekë i ö.
18 “‘“Hnei Damaseko fe hna kuci biznes me eö, ke tru catr la itre ewekë hnei ö hna kuca, nge ka trenamo catr eö. Hnei angeic hna thue waina i ö qa Elebona, me drela qa Zahar.* 19 Hnei Vedana me Iavana qa Uzala hna hamë fao hna lepelepe hnei hama, me kasia,* me kani,* nyine itöne la itre ewekë i ö. 20 Hnei Dedana hna hamë eö la itre tapi nyine amë fen la isadrel* ne la itre ka ti hos. 21 Eö la maseta ne la itre Arab memine la itre tan asë ne Kedara, lo itre ka salemëne la itre neköi mamoe, me itre mamoe trahmany, me itre nani trahmany. 22 Hnene la itre ka salem qa Sheba me Rama hna kuci biznes me eö. Hnei angatr hna hamë eö la nöjei pengöne nyipi senitr, me nöjei pengön etë ka tru thupen, me gool, nyine itöne la itre ewekë i ö. 23 Hnei Karan, me Kane, me Edena, me itre ka salem qa Sheba, me Asura, me Kilemada hna hane kuci biznes me eö. 24 Ngöne la hnamaketr i ö, hnei angatr hna salemën la itre iheetr ka mingöming, me itre tapi ka nyimu han, me itre ikotr ka qea ka bulu nge hna sil amingömingön hnei drela ka nyimu han. Nge hna ce hnöthe hnyawan hnei eno.
25 Itre he ne Tasesa la ka nyiape fë la itre ewekë i ö nyine salemën,
Matre tha aqane tiqa kö eö me hace* nyipine la hnagejë.
26 Hnene la itre ka galu hna tro sai ö kowe la itre hnagejë ka enienij;
Nge hnene la enyi ne koië hna kapasaitrë eö nyipine la hnahedr.*
27 Tro la itre trengamo, me itre ewekë i ö, me itre ewekë i ö nyine salemën, me itre ka huliwa i he, me itre matelo i ö,
Lo itre ka pelethe la itre he i ö matre tha tro kö a lö timin, me nöjei soc i ö, me itre ka salemën* la itre ewekë i ö
Eje hi, tro asë hi la nöjei atr ka lapa thei ö
A nunucil nyipine la gaa bulu, ngöne la drai ne troa apatrenyi ö.
28 Ame hë la kola sue hnene la itre matelo i ö, tro ha hmengöhmengöne la itre ngöne gejë.
29 Tro asë hi la itre ka galu, me itre ka huliwa ngöne la he, me itre matelo
A uti qa hune la itre he i angatr, me cile hune la ihnadro.
30 Tro hë angatr a ewekë catr me hokötre pi ö
Tro angatr a sië drone la he i angatr, me ujëujë ngöne la hnatresij.
31 Tro hë angatr a cin apan la he i angatr, me heetrë ibëek ka tru thenyin;
Tro hë angatr a treije latresi pi ö.
32 Ngöne la akötr, tro angatr a latresi me nyima cememine la hleuhleu göi ö, me hape:
‘Drei la ka tui Turo laka, pëhë mejen nyipine la hnagejë?
33 Ame lo kola traqa la itre ewekë i ö qa ngöne la hnahedr,* ke hnei ö hna amejin la itre nöj ka nyimutre.
Hnene la etrune la itre trengamo i ö, me itre ewekë hnei ö hna salemën, hna atrenamone la itre joxu ne la fen.
34 Ngo enehila, lö hë eö ngöne la hnahedr,* ngöne la gaa jui,
Hna ce lö me eö hnene la itre ewekë i ö, me nöjei atr ka lapa thei ö.
35 Tro la itre atrene la itre hnapet a xou ngöne la angatr a goeë eö.
Tro la itre joxu i angatr a meci hnei xou. Tro ha seseu la itre iqëmeke i angatr.
36 Tro hë la itre ka salem qa ngöne la itre nöj a qej pine la ewekë ka traqa koi ö.
Tro hi a canga traqa me ngazo la pun koi ö,
Nge tro hë eö a patre palua.’”’”