Ezekiela
31 Ngöne la hna 11 ne macatre, ngöne la pane drai ne la hnaakönine treu, hnei Iehova hna ithanata koi ni, me hape: 2 “Nekö i atr, hape jë koi Farao joxu ne Aigupito, me itre atre i angeic:
‘Drei la ka draië tui ö?
3 Hetre atre Asuria, ketre arasi ne Lebanona,
Ceitu la itre picin i angeic ka mingöming me hnënge hnitr ka xetixet, nge gaa xapo, nge ka draië catr;
Goi ketre fe la itre iaw hnene la itre hone i angeic.
4 Hnene la itre tim hna akökötrenyi angeic, nge hnene la itre qeqe ne tim ka jui, matre draië catre hë angeic.
Hetre tim ka neni xötreithe la götran hna traa angeic;
Hna fii trongëne la nöjei sinöe ne la hlapa hnene la itre jë i tim.
5 Celë hi matre, draië catre kö angeic hune la itre xaa sinöe ne la hlapa.
Nyimutre la itre picine i angeic, nge kola qea la itre wapicin
Ke hna fii pala hi hnene la itre jë i tim.
6 Itre waco ne hnengödrai asë a të hune la itre picine i angeic,
Itre öni wael asë ne la hlapa a hnaho fene la itre wapicine i angeic,
Nge tha nyine qaja kö la etrune la itre ka lapa fene la gaa xapo i angeic.
7 Sisitria ha la sinöe cili hnene la emingömingö i angeic me eqeane la itre picine i angeic,
Ke itre iwaane i angeic a xuxu uti hë la itre tim ka tru.
8 Pëkö ketre arasi ka tun ngöne la djardë i Akötresie..
Pëkö göti ka hetre picin ka tune lai,
Pëkö aremoni ka hetre wapicin ka tune lai.
Nge pëkö ketre sinöe ngöne la djardë i Akötresie ka mingöming tui angeic.
9 Hnenge hna kuca matre tro angeic a ketre sinöe ka mingöming nge ka cia hlöeë,
Nge kola pii angeic hnene la nöjei sinöe ne Edrena, lo djardë i Akötresie.’
10 “Matre hane hi la hna qaja hnei Iehova Joxu Ka Sisitria: ‘Atraqatre hë angeic,* nge traqa ha la itre hone i angeic kowe la itre iaw, matre pi tru hë la hni i angeic pine la edraië i angeic. 11 Celë hi matre, tro ni a nue angeic kowe la joxu ka catr ne la itre nöj, ka troa lepi angeic. Nge tro hë ni a nuetriji angeic pine la aqane iakötrë i angeic. 12 Tro la itre trenyiwa, me itre atr ka catr qa ngöne la itre nöj ka pë utipin, a satriji angeic me nuetrij hune la itre wetr. Nge tro pë hë la itre dröne i angeic a malamala ngöne la itre hnathup, nge tro la itre wapicine i angeic ka xeci, a lapan asë la itre timi ne la nöj. Nge tro hë la nöjei nöj a trotrij la gaa xapon me nuetriji angeic. 13 Tro pë hë la itre waco ne hnengödrai a lapane la ngön i angeic hna sa, nge tro la nöjei öni wael ne la hlapa a lapane la itre wapicine i angeic. 14 Qa ngöne lai, tha tro hmaca kö la ketre sinöe ka cia ezine la tim, a draië catr me weje la itre iaw hnene la itre honen ej. Nge tha tro hmaca kö la ketre sinöe hna fii lapaan a ketr la itre iaw. Ke tro ha ce nue itre ej asë kowe la mec ngöne la nöj e kuhu, memine la itre nekö i atr ka uti kowe la hnaop.*”
15 “Hane hi la hna qaja hnei Iehova Joxu Ka Sisitria: ‘Ngöne la drai ne tro angeic a uti koi Hua,* tro ni a iup troa hnëmec. Eje hi, tro ni a heetrën la itre tim ka jui, me sawa la itre tim ka neni, matre acilën la itre tim ka neni lapa. Tro ni a ajidrin la Lebanona pi angeic, nge tro ha qaqacile la nöjei sinöe ne la hlapa. 16 Tro ni a kuca matre tro la itre nöj a hmengöhmengön la angatr a drei angeic e kei, ngöne la eni a troa ce autinyi angeic kowe la Hua* memine lo itre ka uti koi hnaop.* Nge tro hë la nöjei sinöe e Edrena, lo itre ka mingöming me lolo e Lebanona, lo itre hna fii lapan, a keukawa ngöne la nöj e kuhu. 17 Tui angeic, hnei angatr hna uti koi Hua,* kowe la itre atr hna humuth hnei taua. Nge ce angeic me itre sine xöle i angeic,* lo itre ka lapa fene la gaa xapo i angeic nyipine la itre nöj.’
18 “‘Drei la sinöe e Edrena ka lolo me draië tui ö? Ngo ame pe, tro kö a ce autinyi ö memine la itre xaa sinöe ne Edrena kowe la nöj e kuhu. Tro hë eö a meköl nyipine la itre atr hna tha xötrehatren, itre hna humuth hnei taua. Celë hi ka troa traqa koi Farao me itre atre i angeic,’ öni Iehova Joxu Ka Sisitria.”