Ezekiela

41 Thupene lai, hnei angeic hna lö sai ni kowe la Gaa Hmitrötr,* nge hnei angeic hna tuluthe la itre ikapa ka cil ngöne la lue ezin: traqa koi 6 kubit la eisaisan ngöne la ketre götran, nge 6 kubit* la eisaisan ngöne la ketre. 2 Traqa koi 10 kubit la eisaisan ne la hnë lö, nge ame la itre ngöne uma, ngöne la lue götrane la hnë lö, ke traqa koi 5 kubit la eisaisan. Hnei angeic hna tuluthe la hnahag: traqa koi 40 kubit la eqean, nge 20 kubit la eisaisan.

3 Thupene lai, hnei angeic hna lö e koho hnin,* me tuluth la itre ikapa ka cil ngöne la lue ezine la hnë lö: traqa koi 2 kubit la ehmekönin. Nge traqa koi 6 kubit la eisaisane la hnë lö, nge ame la itre ngöne uma,* ngöne la lue götrane la hnë lö, ke traqa koi 7 kubit la eisaisan. 4 Thupene lai, hnei angeic hna tuluthe la hnahag tröne la Gaa Hmitrötr: traqa koi 20 kubit la eqean, nge 20 kubit la eisaisan. Nge öni angeic jë hi: “Celë hi Gaa Nyipi Hmitrötr.”

5 Thupene lai, hnei angeic mina fe hna tuluthe la ngöne uma ne la uma ne hmi: traqa koi 6 kubit la ehmekönin. Nge traqa koi 4 kubit la eisaisan la itre hnahag xötreithe la uma ne hmi. 6 Hetrenyi asë hi la itre hnahage cili ngöne la lue götrane ne la köni etaz, ketre hnahag hune la ketre, nge traqa koi 30 lao hnahag ngöne la isa ca etaz. Ame xötreithe la ngöne uma ne la uma ne hmi, hna xupe la itre nyine sajuën la itre hnahag, matre tha tro kö a kuje la ngöne uma. 7 Nge ame ngöne la lue götran ne la uma ne hmi, hetre eskalie ka tru trootro, nge ka elë kano kowe la itre hnahag e koho. Kola tru trootro la eisaisan ej qa kuhu fen uti hë koho hun, qa ngöne la ketre etaz kowe la ketre.

8 Ame hnenge hna öhne xötreithe la uma ne hmi la ketre trepen hna xupe draiën: ame asë hi la trepene ne la itre hnahag ezin uti fe hë la ölin ej, ke traqa koi ca rozo ka 6 kubit. 9 Nge ame kowe la ngöne uma ka he tröne la itre hnahag ezin, ke traqa koi 5 kubit la ehmekönin. Nge hetre neköi gojenyi* ka xötrën la batima ne la itre hnahage cili ngöne la uma ne hmi.

10 Ngöne la lue götran, hetre neköi götran ka pë ihakun nyipine la uma ne hmi me itre hnahag hnë xen, nge traqa koi 20 kubit la eisaisan. 11 Ame e kolopi, nyipine la neköi gojeny memine la itre hnahag ngöne la lue götran, ke hetre hnë lö, nge hetrenyi fe la ketre hnë lö ngöne la götrane kolojë. Traqa koi 5 kubit la eisaisane la neköi gojeny ka kanothe la uma ne hmi.

12 Ame la batima e kuë, lo ka qëmek kowe la neköi götran ka pë ihakun, ke traqa koi 70 kubit la eisaisan, nge 90 kubit la eqean. Nge traqa koi 5 kubit la ehmekönin la ngöne uma xötreith.

13 Hnei angeic hna tuluthe la uma ne hmi: traqa koi 100 kubit la eqean. Nge traqa fe koi 100 kubit la eqeane la neköi götran ka pë ihakun, memine la batima,* me itre ngöne uma ne ej. 14 Nge ame la eisaisan la götrane koië ne la uma ne hmi, memine la neköi götran ka pë ihakun, ke traqa koi 100 kubit.

15 Hnei angeic hna tuluthe lai batima, ka qëmeke kowe la neköi götran ka pë ihakun ka he trön, memine la itre kuluar ngöne la lue götran: traqa koi 100 kubit la eqean.

Nge hnei angeice fe hna tuluthe la Gaa Hmitrötr, me Gaa Nyipi Hmitrötr, me itre poretiko ne la kur, 16 me itre hnë lö, me itre mamala ka co kötre trootro, me itre kuluar ngöne la köni götrane cili. Ezine la hnë lö, hetre inehe hna acil qa kuhu trepen uti hë la itre mamala; nge hna heetrën la itre mamala. 17 Hnei angeic hna xomi tulu hune la hnë lö, e koho hnin me e kuhu tröne la uma ne hmi, me hune fe la ngöne uma xötreith. 18 Hetre itre kerubi me itre pama hna xuj*; ca pama nyipine la lue kerubi, nge ka isa lue iqëmekene la itre kerubi. 19 Ame la iqëmeke ne atr, ke kola xei kowe la pama ngöne la ca götran, nge ame la iqëmeke ne liona, ke kola xei kowe la pama ngöne la ketre götran. Celë hi aqane xuj* itre ej, hnine la uma ne hmi asë. 20 Qa kuhu trepen uti hë e koho hune la hnë lö, ke hetre itre kerubi me itre pama hna xuj* hune la ngöne uma ne la uma ne hmi.

21 Ka kare la itre hune qëhnelö* ne la uma ne hmi. Qëmekene la götrane gaa hmitrötr,* hetre ketre ewekë kösë 22 ita ne huuj hna kuca hnei sinöe, ka köni kubit la edraiën, nge lue kubit la eqean. Hetre itre poto ngöne la itre kona, nge hna kuca hnei sinöe la trepen* me xötreithe ej. Önine jë hi la trahmany koi ni: “Celë hi laulau qëmekei Iehova.”

23 Isa hetre lue qëhnelö ne la Gaa Hmitrötr me götran gaa hmitrötr. 24 Ame la hnë lö, ke ka lue qëhnelön, lue qëhnelö kowe la ca hnë lö. 25 Hetre itre kerubi me itre pama hna xuj* hune la itre qëhnelö ne la uma ne hmi, tune lo itre hna tratraun hune la itre ngöne uma. Ame e kuhu trön, hna kuca hnei sinöe la neköi verada* ka hakuthe la poretiko. 26 Hetrenyi mina fe la itre mamala ka co kötre trootro, me itre pama hna xuj* ngöne la lue götrane la poretiko, me hune la itre ngöne uma ne la itre hnahag ezine la uma ne hmi, me hune la itre ölin.