Hosea

Me ketre ifile hna hul hun e Tabora.

 2 Hnene la itre ka icilekeu* hna catre ihumuth,

Ngacama hnenge hë hna hmekë* angatr asë.

 3 Atre Eferaima hi ni,

Nge tha sihngödri kö Isaraela koi ni.

Eferaima, nyimutre hë la hnei ö hna ce meköl* memin;

Pui ngazo hë Isaraela.

 4 Itre thiina i angatr a sewe angatr troa bëek kowe la Akötresi angatr,

Ke pi tro kö angatr a nyi föe ne gojeny;*

Tha angatre hmaca kö a nyipiewekë Iehova.

 5 Hnene la pi tru i Isaraela hna qejeqeje angeic;*

Hnei Isaraela me Eferaima hna kei pine la itre ngazo i nyidro,

Ame hnei Iudra hna ce kei me nyidro.

 6 Hnei angatr hna tro troa thele Iehova memine la hnënge mamoe me itre kau i angatr,

Ngo tha öhnyi nyidrëti kö hnei angatr.

Hnei nyidrëti hna ananyi angatr.

 7 Hnei angatr hna mele thoi koi Iehova,

Ke hnei angatr hna ce hnaho memine la itre föe trenyiwa.

Enehila, tro hi la ca treu a öni* angatr me itre hnepadro* i angatr.

 8 Ufi trutru jë e Gibea, memine la neköi trutru e Rama!

Sue jë troa isi e Beth-aven! Eahuni a xötrethenge eö Beniamina!

 9 Eferaima fe, tro la itre atr a meci hnei xou ngöne la kola troa ameköti ö.

Ase hë ni thuemacane la itre tribu ne Isaraela göne la itre ewekë ka troa traqa.

10 Ceitune hi la itre nekö i joxu ne Iudra me itre ka kötrë ifego.

Tro ni a nenge la elëhning hui angatr, kösë tim.

11 Kola akötrë Eferaima, nge ka meköti la aqane wajafici angeic,

Ke ase hë angeice mekun troa xötrethenge la ithupëjia.

12 Ame hnenge hna ujë koi Eferaima tune la neköi öni ka xuje la sinöe

Me kowe la nöje Iudra tune la hnyiqetr.

13 Ame la Eferaima a öhne la mec i angeic, nge Iudra la ikakötr i angeic,

Hnei Eferaima hna tro Asuria, me iupi fë maca kowe la joxu ka tru.

Ngo thatreine kö la joxu aloine la meci epun,

Me ameune la itre kakötre i epun.

14 Tro ni a tune la neköi liona koi Eferaima,

Me tune la liona ka catr kowe la nöje Iudra.

Tro ni a heje zezenyi nyidro me tro hmaca;

Tro ni a hule cope nyidro, nge pëkö ka atreine troa amele nyidro.

15 Tro ni a bëeke hmaca kowe la göhneng, uti hë la tro nyidroti a xeni pune la itre ngazo i nyidro,

Qa ngöne lai, tro hë nyidroti a thel tro ni a kepe nyidro.*

Nge ngöne la akötr, tro hë nyidroti a thele ni.”