Amosa
6 “Ekölöhini la itre atrene Ziona ka nyi ka atre,
Itre ka mele tingeting hune la wetr e Samaria,
Itre atr ka tru ngöne la nöje ka hlemu catr,
Lo itre hna mejiune kow hnene la nöje Isaraela!
2 Tro jë a tro Kalene, nge goeëne ju.
Qa lai, tro jë a tro Hamath Ka Tru,
Nge uti pi a tro Gatha e Filisiti.
Hapeu, ka sisitria kö angatr hune la itre baselaia celë?*
Tru kö la götrane i angatr hune la itre götrane i epun?
3 Epuni kö a thele troa thëthëhmine la drai ne akötr
Me acile la itre atr ka iakötrë troa mus?
4 Angatr a meköl hune la itre ili hna kuca hnei jian ne elefa, me saaju hune la itre göhnë,
Nge angatr a öni la itre nani trahmanyi hna axöj me itre neköi kau ka giris;
5 Angatr a sili mekötin la itre nyima ngöne la kola elo arp,*
Nge tui Dravita, angatr a kuca la itre nyine elo miuzik ka hnyipixe;
6 Angatr a ij la itre kapë waina ka tiqa
Me köle la itre ngönetrei i angatr hnei itre oel ka sisitria.
Ngo tha semesinene* kö angatr la jol ka traqa koi Iosefa.
7 Celë hi matre, tro angatr a tro pa qëmeken la itre hna kötre fë,
Nge tro ha nyipun la feete ne la itre ka saaju.
8 ‘Hnei Iehova Joxu Ka Sisitria hna sisinyi ngöne la mele i nyidrë,’ öni Iehova Akötresie ne la itre trongene isi e hnengödrai ka hape:
‘“Mething la trenge pi tru i Iakobo,
Cane mething la itre ita ne thupe i angeic hna eköhagen,
Nge tro hë ni a nue la traon me itre alien ej kowe la itre ithupëjia,
9 “‘“Nge maine ala 10 pe hi la itre trahmanyi e hnine la uma, ke tro fe angatr a mec. 10 Tro la ketre atrene la fami* i angatr a traqa, me xomi angatr a tro e kuhu trön, me isa dreuthi angatr. Eje hi, tro angeic a xome la itre june i angatr qa hnine la uma. Thupene lai, tro angeic a hnyingëne kowe la ka lapan la itre hnahag e koho hnine la uma, ka hape, ‘Hetre atre pala kö me eö?’ Nge tro angeic a sa ka hape: ‘Waea pëhë!’ E cili, tro angeic a hape: ‘Humu ju! Ke tha ijine hmaca kö troa qaja la ëje i Iehova.’”
11 Ke Iehova la ka amekötine lai,
Tro nyidrëti a thë la uma ka tru, matre lapa ju pe hi la itre itra etë,
Tro nyidrëti a thë la uma ka co, matre lapa ju pe hi la itre wene etë.
12 Hapeu, itre hose kö a nyinyap hune git
Nge itre kau kö a uja dro e cili?
Ke hnei epuni hna saze la meköt koi feja ka poizin,
Memine la wene ne la meköt koi feja ka haitr.
13 Epuni a madrine la ka pë alien,
Me hape: “Tha hnene kö la sipu trengecatre hun matre catre jë hun?”