Pane Tus i Aqane Lapa Itre Joxu

27 Hane hi la etrune la angetre Isaraela, ene la itre tixe ne lapa, me itre tane la ala 1000 me ala 100, me itre tane ka huliwa koi joxu, itre ka thupëne la itre lapa ka traqa me tro, e nöjei treu ne la macatre. Ala 24000 angatr ngöne la isa ca lapa.

2 Iasobeam nekö i Zabediela la ka elemekene la pane lapa, lo atrekë hnëqane la pane treu ne la macatre. Ala 24000 lao trahmany hnine la lapa i angeic. 3 Ketre matra i Farez angeic. Qa i angeic troa elemekene la nöjei tan gurup, ka huliwa la pane treu. 4 Nge Dodai qa Aohi la ka elemekene la hnaaluene lapa. Ala 24000 lao trahmany hnine la lapa i angeic, nge Mikeloth la ka ixatua. 5 Benaia nekö i Iehoiada, lo atre huuj ka sisitria, la tane la hnaakönine lapa, ka huliwa la hnaakönine treu. Ala 24000 lao trahmany ngöne la lapa i angeic. 6 Nge angeice la ketre soc ka catre isi hna e memine lo ala 30; angeice fe la ka elemekene la ala 30. Nge Amizabada nekö i angeic, la tane la gurupe i angeic. 7 Nge ame Asael trejine me Ioaba, angeice la tane la hna 4 ne lapa, ka huliwa ngöne la hna 4 ne treu. Nge Zebadia nekö i angeic la ka nyihna i angeic. Ala 24000 lao trahmany ngöne la lapa i angeic. 8 Nge Sama qa Izara la tane la hna 5 ne lapa, ka huliwa ngöne la hna 5 ne treu. Ala 24000 lao trahmany ngöne la lapa i angeic. 9 Nge Ira nekö i Ikes qa Tekoa la tane la hna 6 ne lapa, ka huliwa ngöne la hna 6 ne treu. Ala 24000 lao trahmany ngöne la lapa i angeic. 10 Nge ame Helez qa Pelone, lo matra i Eferaima, angeice la tane la hna 7 ne lapa, ka huliwa ngöne la hna 7 ne treu. Ala 24000 lao trahmany ngöne la lapa i angeic. 11 Nge Sibekai qa Husa, lo matra i Zera, la tane la hna 8 ne lapa, ka huliwa ngöne la hna 8 ne treu. Ala 24000 lao trahmany ngöne la lapa i angeic. 12 Nge ame Abiezera qa Anathoth, lo matra i Beniamina, angeice la tane la hna 9 ne lapa, ka huliwa ngöne la hna 9 ne la treu. Ala 24000 lao trahmany ngöne la lapa i angeic. 13 Nge Maharai qa Netofa, lo matra i Zera, la tane la hna 10 ne lapa, ka huliwa ngöne la hna 10 ne treu. Ala 24000 lao trahmany ngöne la lapa i angeic. 14 Nge Benaia qa Pirathon, lo matra i Eferaima, la tane la hna 11 ne lapa, ka huliwa ngöne la hna 11 ne treu. Ala 24000 lao trahmany ngöne la lapa i angeic. 15 Nge ame Heledai qa Netofa, lo matra i Otheniela, angeice la tane la hna 12 ne lapa, ka huliwa ngöne la hna 12 ne treu. Ala 24000 lao trahmany ngöne la lapa i angeic.

16 Nge hane hi la itre tane la itre tribu ne Isaraela: Thene la tribu i Reubena, Eliezera la tan, nekö i Zikeri; thene la tribu i Simeona, Sefata nekö i Maaka; 17 thene la tribu i Levi, Hasabia nekö i Kemuela; thene la itre matra i Arona, Zadoka; 18 thene la tribu i Iudra, Elihu ketre mama i Dravita; thene la tribu i Isakara, Omeri nekö i Mikaela, 19 thene la tribu i Zebulona, Isemaia nekö i Obadia; thene la tribu i Nafatali, Ieremoth nekö i Azeriela; 20 thene la tribu i Eferaima, Hosea nekö i Azazia; thene la sine la tribu i Manase, Ioela nekö i Pedaia, 21 thene la sine la tribu i Manase e Gileada, Ido nekö i Zakaria; thene la tribu i Beniamina, laasiela nekö i Abinera, 22 thene la tribu i Dana, Azareela nekö i Ierohama. Angetre hi la itre tan ne la itre tribu ne Isaraela.

23 Ngo tha hnei Dravita kö hna e la itre ka 20 lao macatre a uti ipië, ke ase hë Iehova sisinyi troa atiqane la angetre Isaraela, tune la itre wëtresij e hnengödrai. 24 Hnei Ioaba nekö i Zeruia hna nyiqane e la etru i angatr, ngo tha afenesine kö angeic, ke hnei Akötresie hna elëhni koi Isaraela pine lai. Nge tha hna fejane kö la etrun, ngöne la itusi ne la mele i Dravita joxu.

25 Nge Azemaveth nekö i Adiela la atrekë hnëqane la itre hnahagë trengamo ne la joxu, nge Ionathana nekö i Uzia la atrekë hnëqane la itre hnë ami ewekë* ngöne la itre hlapa, me traon, me hunahmi, me itre ita ne thup. 26 Nge Ezeri nekö i Kelubo, la atrekë hnëqane la itre ka huliwa ngöne la itre hlapa, itre ka eëny. 27 Simei qa Rama la atrekë hnëqane la itre hlapa vin, *nge Zabedi qa Sefama la atrekë hnëqane la itre hnë ami ewekë, ene lo hnë ami waina. 28 Nge Baala-hanana qa Gedera la atrekë hnëqane la itre hnë eënyi elaio,* me sukamore ne Sefela. Nge Ioasa la atrekë hnëqane la itre hnahagë oel. 29 Setari qa Sarona la atrekë hnëqane la itro kau ne la itre hnepadro ne Sarona. Safata nekö i Adelai la atrekë hnëqane la itro kau ngöne la itre ga paapaa.* 30 Nge Obili qa Isamaela la atrekë hnëqane la itre kamela, nge Iehedeia qa Merono la atrekë hnëqane la itre boliko föe. 31 Nge Iaziz qa Hagara la atrekë hnëqane la itro mamoe. Angatr asë hi la itre tan ka thupëne la itre ewekë i Dravita joxu.

32 Nge ame Ionathana utha i Dravita, ke ketre atresi ka inamacan angeic, nge hna acil troa sekreter. Nge Iehiela nekö i Hakemoni la ka thupëne la itre nekö i joxu. 33 Ahithofela la atresi joxu, nge Husai qa Areki la sinee* i joxu. 34 Nge thupei Ahithofela, ame la itre xa atresi,* ke Iehoiada nekö i Benaia, me Abiathara. Nge Ioaba la tane la trongene isi i joxu.