Thenge La Hna Qaja Hnei Luka
1 Ala nyimu la angetre cinyihane la itre ewekë ka traqa, lo hne së fe hna lapaune* kow. 2 Hetre itre ka melëne la itre ewekë cili, nge ame itre xan, hna qaja pë hë la itre ewekë cili koi angatr hnene lo itre ka tro fë trongëne la maca i Akötresie. 3 Matre, hnenge fe hna hane thele pengöne la itre ewekë cili, matre cinyihane wengëne hnyawa la itre ewekë cili koi nyipë Theofila, atre hna wangatrun. 4 Hnenge hna kuca lai koi nyipë, matre tro nyipëti a jele nyipicine la itre hnei nyipëti hna inin.
5 Ame ngöne lo ijine mus i Herodra,* joxu ne Iudra, hetre ketre atre huuj, Zakaria la ëjen, ka huliwa hnine la gurup i Abia. Hnei angeic hna xomi föe thene la hnalapa i Arona, Elisabeth la ëje i eahlo. 6 Lue ka meköti nyidro qëmeke i Akötresie, nge ka lapa pë ethane nyidro, thenge lo itre wathebo me itre hna amekötin hnei Iehova.* 7 Ngazo pe, pëkö nekö i nyidro, ke tha ijiji Elisabeth kö troa hnaho, nge ketre qatre catre hë nyidro.
8 Matre ame ngöne la ijine cili, Zakaria pena ha la atre troa huuj qa ngöne la gurupe i angeic, qëmeke i Akötresie. 9 Ewekë lai hna majemine kuca hnene la itretre huuj, nge qa i angeice fe troa dreu sinöe ka pui lolo ngöne la angeic a lö e hnine la uma ne hmi i Iehova. 10 Nge ala nyimu catre la itre atr ka traqa troa thith e trön, ngöne la ijine kola dreu sinöe ka pui lolo. 11 Ame hna mama pi koi Zakaria la angela i Iehova, kola cile ngöne la götrane maca ne la ita ne huujë sinöe ka pui loi. 12 Ngo ame ju hi la angeic a öhne lai, sesëkötre ju hi angeic, me xou atraqatr. 13 Matre önine jë hi la angela ka hape: “The xou kö Zakaria, ke ase hë kapa la xëwe i eö, nge tro la ifënekö i eö, Elisabeth a hamë eö la nekönatr trahmany, nge tro hë eö a ati ëje i nyën, Ioane. 14 Tro hë eö lai a madrin nge troa tru catr la madrine i eö, nge tro fe la itre atr a hane madrine la kola troa hnaho nyën. 15 Nge tro hë nyën a ketre atr ka tru koi Iehova, ngo tha tro pi kö nyën elanyi a hane iji waina, me nöjei pengöne ka haitr, ke tro nyën a tiqa hnei uati hmitötr qëmekene troa hnaho nyën. 16 Nge tro nyën a abëekëne la itre nekö i Isaraela koi Iehova, Akötresi angatr. 17 Tro nyën a tro qëmeke i Akötresie, cememine la hni me trengecatr, tui Elia, matre ujëne la hni ne la itre kem matre tune la itre nekön, me itre ka tha idrei matre tune la itre ka inamacan me meköt. Nge tro fe nyën a hnëkëne la ketre nöj, thatraqai Iehova.”
18 Öni Zakaria jë hi kowe lai angela ka hape: “Tro ni a mejiune tune kaa? Ke qatre hë ni la, nge ketre qatre föe fe hë la föeng.” 19 Sa jë hi lai angela koi angeice ka hape: “Gaberiela la ëjeng, nge eni a cile qëmeke i Akötresie, nge hna upi ni troa ithanata me eö, me thuemacanyi eö la maca ka loi celë. 20 Ngo goeën! Tro hë eö a hum, tha tro hmaca kö eö a ithanata uti hë eatre pi la itre ewekë celë, pine eö tha lapaune kowe la itre trengewekëng, lo itre ka troa eatre ngöne la ijine hna sa.” 21 Nge ngöne la ijine cili, itre atr pala kö a itreqe me isa sesëkötr laka, ekula ha angeic e hnine la uma ne hmi. 22 Ame hë la angeic a lö pi qa lai, thatreine hë angeice ithanata koi angatr, ene pe, trotrohnine ju hi angatr laka, hetre ka mama koi angeic e hnine la uma ne hmi. Matre angeic a nyiqaane köjaköja ju koi angatr, ke thatreine hë ithanata. 23 Nge ame hë la kola ase hnyawa la itre drai ne eatrën angeic la hnëqa ka hmitrötr,* angeic a tro hmaca pi kowe la hnalapa i angeic.
24 Thupene la itre hnepe drai, upune pi hi Elisabeth föi angeic, matre eahlo a lapa hnalapa ju koi faifi lao treu, me hape: 25 “Hane hi la aqane ujë i Iehova* koi ni ngöne la itre drai celë. Hnei nyidrëti hna wangatrunyi ni me ananyine qaathenge la ewekë ka ahmahmanyi ni qëmekene la itre atr.”
26 Nge ame hë ngöne la hnaasikisine treu i eahlo, hnei Akötresieti hmaca hna upi Gaberiela angela kowe la ketre traon ne Galilaia, ene Nazareta, 27 kowe la ketre jajinyi* hna oth* nyine föi Iosefa, ketre matra i Dravita. Nge Maria la ëje ne lai jajiny. 28 Ame hnene la angela hna lö jë koi angeic me hape: “Bozu eö, jajiny hna hnime catrën. Ce Iehova* me eö.” 29 Matre hna pane ajolëne la mekuna i angeic hnene la itre trengewekë celë, ke angeic a thele troa trotrohnine la aqane ibozu cili. 30 Ngo önine jë hi lai angela koi angeic ka hape: “The xou kö Maria, ke hna hnimi eö hnei Akötresie. 31 Nge hanawang! tro hë eö a upune, nge tro eö a hnahone la ketre nekönatr trahmany. Nge tro eö a ati ëje i nyën, Iesu. 32 Nge tro nyën a atre ka tru, nge troa hë nyën ka hape, Nekö ne la Akötresie ka Draië Catr, nge tro Iehova* Akötresie a hamë nyëne la therone i Dravita, keme i nyën. 33 Nge tro nyën a mus me Joxu hune la hnalapa i Iakobo epine palua, nge tro ha pë pun la Baselaia i nyën.”
34 Öni Maria jë hi kowe lai angela ka hape: “Ngo tro lai a traqa tune kaa, ke tha ka ce meköle pala kö ni me trahmany?” 35 Sa jë hi la angela ka hape: “Tro la uati hmitrötr a lapa hui eö, nge tro la men ne la Akötresie ka Draië Catr a hakuthi eö. Celë hi matre, troa hëne la atr hna hnahon ka hape, hmitrötr, Nekö i Akötresie. 36 Nge hanawang! Upune hë Elisabeth, sinee i eö, nge sikisi hë lao treu i eahlo. Tro eahlo a hnahone la ketre nekönatr trahmany, ngacama qatre föe hë eahlo, nge hna hë eahlo lo ka hape, ka tha hnaho. 37 Ke pëkö ketre ewekë hna thatreine kuca hnei Akötresie.” 38 Matre öni Maria jë hi: “Hanawang! Hlue i Iehova* ni! Epi traqa koi ni thenge la hnei nyipëti hna qaja.” Ame hna tro hmaca pi lai angela.
39 Ngöne la itre drai cili, canga mejë jë hi Maria troa tro kowe la itre wetr, ngöne la ketre traon ne Iudra. 40 Angeic a lö jë kowe la hnalapa i Zakaria me ibozu me Elisabeth. 41 Nge ame hë la Elisabeth a drei Maria e ibozu, enije jë hi la nekönatr e kuhu hni eahlo. E cili, tiqa pi Elisabeth hnei uati hmitrötr, 42 matre eahlo a ithanata catre jë me hape: “Manathithi hë eö hune la nöjei föe asë, nge manathithi la nekönatr hnei eö hna troa hnahon. 43 Nge nemene ni matre troa kapa la manathithi celë, laka, kola wai ni hnene la thine ne la Joxung? 44 Ke hanawang! Ame la kola traqa kowe la lue hnangenyënge la ibozu i eö, hnene la nekönatr hna enij madrine e kuhu hning. 45 Nge manathithi la föe ka lapaun, ke troa eatre hnyawa la hnei Iehova* hna qaja koi angeic.”
46 Nge öni Maria jë hi: “Eni a atrunyi Iehova,* 47 nge ka madrine pala hi la hninge göi Akötresie, Atre amele ni. 48 Ke hnei nyidrëti hna goeëne la nekö jajiny, hlue i nyidrë, ka pë pengön. Nge hanawang! Qaane enehila nge ngöne la itre xötr epin, tro ha qeje ni ka hape, ka madrin, 49 ke hnene la Trene Men Ka Sisitria hna kuca la itre ewekë ka tru thatraqai ni, nge hmitrötre la ëje i nyidrë. 50 Nge ngöne la nöjei xötr atr asë, tro ha eje la utipine i nyidrë kowe la itre ka xoue nyidrë. 51 Hnei nyidrëti hna kuca la itre huliwa ka men hnene la ime i nyidrë, me isa ijene la itre ka pi tru fë mekun e kuhu itre hni angatr. 52 Nyidrëti fe a thaipiëne la itre atr ka mus qa hune la therone i angatr, me adraiëne la itre ka ipië. 53 Nyidrëti a amejine la itre ka mecijiin hnei itre ewekë ka lolo, ngo hna cipane pë hë kowe la itre trenamo, me helë angatr. 54 Hnei nyidrëti hna xatua Isaraela, hlue i nyidrë, me anyipicine laka, mekune pala kö nyidrë lo hnei nyidrëti hna qaja, ene la troa hetre utipin epine palua 55 koi Aberahama me itre matra* i angeic, tune lo aqane qaja i nyidrë kowe la itre xötrapane së.” 56 Haawe, Maria a pane lapalapa ju e cili me Elisabeth koi köni treu, qëmekene troa bëeke hmaca kowe la hnalapa i angeic.
57 Nge ijine tro hë Elisabeth a hnaho, ame hnei eahlo hna hnahone pi la medreng trahmany. 58 Nge drenge ju hi hnene la itre atr ka lapa easenyi eahlo me itre sinee i eahlo laka, hnei Iehova* hna nyipi utipi eahlo, ame hnei angatr hna ce madrine jë me eahlo. 59 Nge ngöne la hnaeitrene drai, angatr a xötrehatrene ju lai medreng, me thele troa atë la ëje i kem, ene Zakaria. 60 Ngo öni thine jë hi: “Waea, troa hë nyën, Ioane.” 61 Ngo sa jë hi angatr ka hape: “Pëkö atrene la lapa i eö hna hëne tun.” 62 Angatr a köjaköja ju koi kem göi troa hnyingëne la ëj hnei nyidrëti hna mekun. 63 Kem a sipone jë la ketre nyine cinyihan, me cinyianyine ka hape: “Ioane la ëje i nyën.” Ame hnei angatr asë hna isa sesëkötr. 64 Nge e cili, fe pi hi la që i angeic, nge uke pi hi la thineme i angeic, ame hnei angeic hna nyiqaane ithanata me atrunyi Akötresie. 65 Ame hna traqa pi la xou kowe la itre atr ka lapa easenyi nyidro, nge kolo fe a iqajakeune la ewekë cili ngöne la götrane wetr ne Iudra. 66 Nge hnene la itre atr ka drenge lai, hna isa lapa mekune e kuhu hni angatr, me hape: “Nemene jë la pengöne la nekönatr cili elany?” Ke mama ha laka, ce me nyën la ime i Iehova.*
67 Tiqa pi hi Zakaria keme i nyën hnei uati hmitrötr, matre angeic a perofetane ju ka hape: 68 “Epi atrunyi Iehova* jë, Akötresi angetre Isaraela, ke hnei nyidrëti hna wangatrune la nöje i nyidrë, me amelene ej. 69 Nge hnei nyidrëti hna hnëkëne la ketre jian ne iamele* qa ngöne la hnalapa i Dravita, hlue i nyidrë, 70 thenge lo hnei nyidrëti hna qaja ha, jëne la itre perofeta i nyidrëti ekö ka hmitrötr. 71 Kola thepe së qaathene la itre ithupëjia, me qa ngöne la ime ne la itre ka methinë së, 72 me amamane la utipine i nyidrë kowe lo itre qaaqaa së, me mekune hmaca lo isisinyikeu i nyidrë ka hmitrötr. 73 Kolo isisinyikeu hna kuca me Aberahama keme së, 74 ene laka, thupene la hna thepe së qaathene la itre ithupëjia, ijiji së hë troa nyihlue i nyidrëti hnyawa, 75 me mele nyipici me meköti o drai qëmeke i nyidrë. 76 Ngo ame pë hë hmunë, nekönatr, tro hë hmunë a perofeta ne la Akötresie ka Draië Catr, nge tro hmunë a tro qëmeke i Iehova* me hnëkëne la gojenyi koi nyidrë, 77 me qaja ka hape, tro Akötresie a amele angatr, jëne la hna köletrije la itre ngazo i angatr 78 ke tru la utipine ne la Akötresi së. Nge tro la utipine cili a uti koi së tune la kaqa ne lai, 79 matre thinane la itre ka lapa ngöne la gaa mit, me ngöne la iahnue ne la mec, me thinane la hnë lue ca së ngöne la gojenyi ne la tingeting.”
80 Haawe, ame la nekönatr, nyën pala hi a tru trootro, me macaje trootro.* Nge angeic a lapa ngöne la hnapapa, uti hë la ijine tro angeic a cainöj kowe la nöje Isaraela.