Iosua
9 Ame hna dreng hnene la itre joxu ka lapa ngöne la götrane kuë ne la hneopegejë Ioridrano la ewekë ka traqa e cili. Kolo itre joxu ka lapa ngöne la itre wetr, me ngöne la Sefela, me ngöne la itre ngöne gejë trootro ne la Hnagejë Ka Tru* qëmeken e Lebanona, ene la itre joxu ne la angetre Heth, me Amora, me Kanana, me Perizi, me Hivi, me Iebusi. 2 Hnei angatre hna ce uti troa isi me Iosua memine la angetre Isaraela asë.
3 Nge hnene fe la angetre Gibeona hna drenge la hna kuca hnei Iosua kowe la lue traon ne Ieriko me Ai. 4 Matre hnei angatre hna huliwa inamacan: hnei angatre hna atë la itre watreng ka hnyiqetr hune la itre boliko i angatr, me qatreng e kuhu hnin la itre kemej, me itre trengene* waina ka zezeny nge hna cane hmaca. 5 Nge hnei angatre hna otreëne la itre cane butr hna cane hmaca, me heetrëne la itre iheetr ka hnyiqetre hë. Goi xome fe angatr la itre falawa ka qaqacile hë, nge ka mudromudro nyine kemej. 6 Ame hnei angatre hna tro troa wai Iosua ngöne la lapa e Gilegala, me qaja koi angeic me kowe la itre trahmanyi ne Isaraela ka hape: “Eahuni a traqa qa ngöne la ketre nöje gaa nany. Pane isisinyikeu jë me hun, matre tro sa tingeting.” 7 Ngo önine jë hi la itre trahmanyi ne Isaraela koi angatr: “Nemene la ka anyipicin ka hape, epuni a lapa gaa nany, matre tro huni a isisinyikeu me epun?” 8 Matre sa jë hi la angetre Hivi ka hape: “Eahuni la itre hlue i nyipë.” Ame hnei Iosua hna hnying koi angatre ka hape: “Drei epun? Nge epuni a traqa qa kaa?”
9 Matre sa jë hi angatr ka hape: “Joxu, eahuni a traqa qa ngöne la ketre nöje gaa nany, ke eahuni a metrötrëne la ëje i Iehova Akötresi nyipë. Hne huni hna drenge la aqane hlemu i nyidrë, memine la hnei nyidrëti hna kuca e Aigupito, 10 me nöjei ewekë hnei nyidrëti hna kuca kowe la lue joxu ne Amora, ka lapa ngöne la ketre götrane* la hneopegejë Ioridrano, ene Sihona joxu ne Hesebona, me Oga joxu ne Basana ka lapa e Aseterotha. 11 Matre hnene pë hë la itre qatr, me itre atrene la nöje hun hna upi hun ka hape: ‘Xome trongëne jë la itre kemej, nge tro jë troa wai angatr. Hape jë koi angatr: “Tro hë eahun a nyihlue i epun. Ngo pane isisinyikeu jë me eahun, matre tingetinge pi së.”’ 12 Goeëne la falawa hne huni hna xom trongën: ka idreuthi pala kö lo eahuni a tro qa ngöne la itre hnalapa hun. Ngo goeën, qaqacile hë, nge kola ha mudromudro. 13 Nge öhne fe hi epun la itre trengene waina, ka hnyipixe lo eahuni a nyialien, ngo xulu hë itre ej enehila. Goi ae fe la itre iheetr me itre ibutre hun, ke nanyi catre la gojenyi hne huni hna trongën.”
14 Matre hnene la itre trahmanyi ne Isaraela hna xome* la itre xaa kemej i angatr, ngo tha pane hnyingëne pe la mekuna i Iehova. 15 Ame hnei Iosua hna thele troa iloi me angatr, me sisinyi laka, tha tro kö a humuthi angatr. Nge hnene fe la itre tane la nöj hna sisinyi troa metrötrëne la isisinyikeu cili.
16 Ngo thupene hë la köni drai, hnene la itre trahmanyi ne Isaraela hna drenge laka, ame la itre atre cili, ke angatre hi a lapa e cili ezin. 17 Matre hnene la angetre Isaraela hna tro koi köni drai uti hë la itre traon hna lapan hnene la itre atre cili, ene Gibeona, me Kefira, me Berotha, me Kiriatha-Iarim. 18 Ngo tha lepi angatre ju kö hnene la angetre Isaraela, ke hnene lo itre tane la nöj hna isisinyikeu ngöne la ëje i Iehova, Akötresi Isaraela. Ame hnene la nöj hna eetre* pine la itre tan. 19 Matre önine jë hi la itre tan kowe la nöj ka hape: “Tha ijiji huni kö troa akötrë angatr, ke ase hë huni sisinyi ngöne la ëje i Iehova, Akötresi Isaraela. 20 Ngo hane pe la nyine tro sa kuca: Tro sa nue angatre troa mel, wanga elëhni jë Akötresieti koi së, ke ase hë së lo isisinyikeu me angatr.” 21 Nge tune lo hna sisinyi kowe la angetre Gibeona, öni la itre tan ne la nöj ka hape: “Nue angatre pi troa mel, ngo qaan enehila, tro pë hë angatr a nyi sinöe me tha tim kowe la nöj asë.”
22 Ame hnei Iosua hna hëne la angetre Gibeona me hape: “Hnauëne la epuni a iaö hun, me hape: ‘Eahuni a traqa qa gaa nany,’ ngo tha nanyi pe epun qaathe hun? 23 Qaane enehila, hnëjine hë epun, nge tro hë epuni a itre hlu uti hë epin. Tro pë hë epuni a nyi sinöe me tha tim thatraqane la uma ne la Akötresing.” 24 Ame hnei angatre hna sa koi Iosua ka hape: “Joxu fe, hne huni hna qaja lai, ke hna thuemacanyi hun laka, hnei Iehova Akötresi nyipë hna upi Mose hlue i nyidrë troa hamë epuni la nöje ce, me lep apatrene la itre atren, ngöne la epuni a traqa. Matre hne huni hna meci hnei xou. Nge celë hi kepin, matre kuca jë huni lai. 25 Ngo enehila, qanyi nyipëti kö troa musinë* hun. Kuca jë koi hun la ka loi me meköt koi nyipë.” 26 Hane hi la hnei Iosua hna kuca koi angatr: hnei angeice hna thupë angatr qa ngöne la elëhni ne la angetre Isaraela, matre tha hna humuthi angatre ju kö. 27 Ngo qaane ju hi lai, hnei Iosua hna amekötin koi angatre troa nyi sinöe, me tha tim kowe la nöj me kowe la ita ne huuje i Iehova, ngöne la götran hnei nyidrëti* hna troa iën. Nge celë pala hi la hnei angatr hna kuca enehila.