Nyima i Solomona
4 “Mingöminge catr eö jajinyi hniminang!
Mingöminge catr eö!
Ceitune hi la luemeke i ö hnine la isol me luemeke ne piny.
Ceitune hi la penehe i ö memine la hnënge nani
Ka utine la itre wetr ne Gileada.
2 Ceitune hi la itre inyö i ö me hnënge mamoe hna hnyipi xötre pen
Ka elë qa ngöne la tim thupen la hna siën,
Nge ka hnaho fini,
Pëkö ala cas ka meci nekön.
3 Ceitune hi la ukeineqë i ö me sine ihages ka madra palulu,
Nge mingöming e troa dreng la itre trengewekë i ö.
Ceitune hi la lue itrasitre* i ö hnine la isol,
Memine la wene grenad hna thupa.
4 Ceitune hi la nyinawa i ö memine la ita ne thupe i Dravita,
Hna xup hnei xötre etë
Nge hna athip la 1 000 lao ipetr,
Lo itre ipetr ka raon ne la itre atr ka catr.
5 Ceitune hi la lue thi i ö me lue neköi drube,
Lue fini hna hnahon hnene la gazel,
Ka xeni trootro nyipine la itre lili.”
6 “Qëmeken troa ut la hnepe eny ka lepany* nge troa kötr la itre iahnu,
Tro ni a tro kowe la wetr ka tiqa hnei muro
Me kowe la sasala ka tiqa hnei libanu.”
7 “Mingöminge catr eö, jajinyi hniminang,
Nge pëkö hnepe engazo i ö.
8 Hniminange fe,* ce kötre pi so qa Lebanona,
Ce kötre pi so qa Lebanona.
Uti pi qa ngöne la wetre Amana,*
Qa ngöne la wetre Senira, me qa ngöne la wetre Heremona,
Lo hnë zae ne la itre liona, me qa ngöne la itre wetr ka tiqa hnei leopar.
9 Trejine hniminang,* ase hë eö thapa la hning,
Hnei ö hna thapa la hning ngöne hi la eö a goeë ni,
Me qa ngöne hi la ca etë ka melemel ne la otrene nyinawa i ö.
10 Trejine hniminang,* ka hnyapa catr la itre hatrene ihnim i ö!
Sisitria kö la itre hatrene ihnim i ö hune la waina,
Memine la punepune ne la senitr i ö hune la itre dröne hnitr ka pui lolo!
11 Jajinyi hniminang,* kola thithia la miel qa ngöne la ukeineqë i ö.
Eje fene la thineme i ö la miel me melek,
Nge ceitune hi la punepune ne la itre iheetre i ö me ipunepune ne Lebanona.
12 Ceitune la trejine hniminang* me hnë traa iengen hna lokan,
Eje hi, ketre hnë traa iengen hna lokan, me qeqe ne tim hna masuan.
13 Paradraiso* la itre wapicine* i ö, hnë cia ne la itre igrenad
Ka hamë wen ka hnyapa, me itre feja,* me itre nado,*
14 Ene la nado, me safra,* me rozo ka pui lolo, me kanel,
Me nöjei pengöne sinöe libanu, me muro, me aloes,
Memine la nöjei feja ka pui lolo catr.
15 Eö la qeqe ne tim ngöne la hna traa iengen, ketre hnë tha tim nyine ij,
Me itre jë i tim ka neni qa Lebanona.
16 Hlë jë eö, enyi ne kolopi;
Trohemi, enyi ne kolojë.
Ufe hmidrane ju la hnë traa iengening.
Matre songe jë la punepunen.”
“Epi tro la hniminang a lö hnine la hlapa i angeic
Me iji la itre wene sinöe ka hnyapa catr.”