Salamo
Thatraqane la atre jumi traem. Nyima ne la itre nekö i Kora, thenge la nin, Alamotha.*
46 Akötresie la hnë zae me trengecatre së,
Ketre ixatua ka hmaloi troa öhn ngöne la ijine akötr.
2 Celë hi matre tha tro kö sa xou, ngacama kola saze la ihnadro,
Maine troa kei la itre wetr ngöne la hnagejë gaa jui,
3 Maine troa ulil me kaca la itre tim,
Nge maine tro la itre wetr a enienij pine la ecatrene la tim.* (Sela)
4 Hetre ketre hneopegejë laka, ame la itre jë i tim, ke itre ej a amadrinëne la traone i Akötresie,
Lo uma maano ka mingöming me gaa hmitrötr ne la Ka Draië Catr.
5 Pine laka, Akötresie ngöne la traon, thatreine kö troa akein ej.
Tro Akötresieti a xatuan ej qaan e kaqa ne lai.
6 Hna enienije la itre nöj nge kei hë la itre baselaia;
Hnei nyidrëti hna ewekë catr, ame hna hmu pi la ihnadro.
7 Ce easë me Iehova, joxu ne la itre trongene isi;
Lo Akötresi Iakobo, hnë zae* ka cile hut koi së. (Sela)
8 Haawe trohemi ma goeëne la itre huliwa i Iehova,
Me itre ewekë nyine haine hnei nyidrëti hna kuca e celë fen.
9 Nyidrëti a apëne la itre isi e celë fen.
Nyidrëti a axeciëne la tane pehna me hutra la jo;
Nyidrëti a dreuthetrije la itre ikatr* ne isi.
10 “Loi ju hë hna isi, nge atre ju laka, Akötresieti ni.
Tro ha atrunyi ni hnene la itre nöj;
Tro ha atrunyi ni hune la ihnadro.”
11 Ce easë me Iehova joxu ne la itre trongene isi;
Lo Akötresi Iakobo, hnë zae ka cile huti koi së. (Sela)