Hnaaluene Tusi Itre Joxu
17 Ngöne la kola 12 lao macatre ne musi Ahaza joxu ne Iudra, hna acili joxu Hosea nekö i Ela, troa joxu ne Isaraela. Hnei nyidrëti hna mus koi 9 lao macatre e Samaria. 2 Nyidrëti a kuca la ngazo koi Iehova, ngo tha itre ngazo ka tru kö, tune la itre joxu ne Isaraela ka tro pa. 3 Hnei Salemanesa joxu ne Asuria hna tro troa isi me Hosea. Matre hnei Hosea pë hë hna nyihlu kowe la joxu ne Asuria, me kuiëne la mani hna athip koi nyidrë. 4 Ngo ngöne la ketre drai, hnene la joxu ne Asuria hna drenge ka hape, Hosea a thele troa icilekeu. Eje hi, hnei Hosea hna iupi fë maca koi So joxu ne Aigupito, nge tha kuiëne hë Hosea lo mani hna athip, tune lo itre xa macatre. Matre hnene la joxu ne Asuria hna othi Hosea me umë nyidrë hnine kalabus.
5 Thupene lai, hnene la joxu ne Asuria hna lapane la nöj asë, me cile xötreithi Samaria koi köni macatre. 6 Ngöne la kola 9 lao macatre ne musi Hosea, hnene la joxu ne Asuria hna thepe Samaria. Nyidrëti a xolouthe jë la angetre Isaraela, me kötre sai* angatr a tro Asuria. Nge nyidrëti a alapa angatre jë e Hala me Habora, ezine la hneopegejë Gozana, me ngöne la itre traon i angetre Madai.
7 Hna traqa tun, ke hnene la angetre Isaraela hna ngazo koi Iehova Akötresi angatr. Hnei nyidrëti lo hna thepe angatr qa Aigupito, me amele angatr qaathei Farao joxu ne Aigupito. Ngo hnei angatre pe hna nyihluene* la itre xa haze, 8 me nyitipune la qenenöj ne la itre nöj hnei Iehova hna helën nyine thue götrane i angatr, memine la itre qenenöj hna acil hnene la itre joxu ne Isaraela.
9 Hnei angetre Isaraela hna kuca la itre ewekë hna xele ma wang hnei Iehova Akötresi angatr. Hnei angatr hna xupe la itre hnë hmi gaa hmitrötr ngöne la itre traone i angatr asë, itre ita ne thup, me itre traon hna eköhagen.* 10 Nge hnei angatre fe hna acile la itre sine feni ka hmitrötr, me itre ipoto etë ka hmitrötr hune la itre sasala, me fene la nöjei sinöe ka cia lolo. 11 Nge hune la itre hnë hmi gaa hmitrötr, angatr a huhajine la itre huuje i angatr, tune lo aqane kuca ne la itre nöj hnei Iehova hna helën qëmekei angatr. Nge angatre pala hi a kuca la itre ewekë ka ngazo, nyine amejëne la elëhni Iehova.
12 Hnei angatr hna nyihluene la itre idrola ka sis,* ngacama öni Iehova koi angatr ka hape: “Tha tro kö epuni a kuca lai!” 13 Hnei Iehova hna hmekë Isaraela me Iudra jëne la nöjei perofeta i nyidrë, me itre ka qeje pu. Öni nyidrë: “Nuetrije pi la itre huliwa ka ngazo i epun! Drengethenge ju la itre wathebong, me itre hnenge hna amekötin, thenge la nöjei wathebo hnenge hna hamën koi itre qaaqaa i epun, me itre hnenge hna qaja koi epun jëne la itre hlueng, itre perofeta.” 14 Ngo xele kö angatr ma dreng, ke catre që* catr angatr tune lo itre qaaqaa i angatr, itre ka tha mejiun koi Iehova Akötresi angatr. 15 Hnei angatre pala hi hna trije la itre wathebo i nyidrë, memine la isisinyikeu hnei nyidrë hna kuca me itre qaaqaa i angatr, memine la itre aqane hmekë angatr hnei nyidrë. Angatre pala hi a nyihluene la itre idrola ka pë eloin, matre pë fe hë eloi angatr. Hnei angatr hna nyitipune la itre nöj xötreith, ngacama hnei Iehova hna wathebo angatr troa xome la thiina ne la itre nöje cili.
16 Nge hnei angatr hna trije la itre hna amekötine hnei Iehova Akötresi angatr, me xupe la lue neköi kau fao,* me ca sine feni ka hmitrötr, me thili kowe la trongene isi ne hnengödrai,* me nyihlue i Baala. 17 Nge angatre a dreuth la itre nekö i angatr trahmanyi me jajiny, me kuci haze, me thele hatren, nge tha mano kö angatr kuca la ngazo koi Iehova, matre amejëne la elëhni i nyidrë.
18 Ame hnei Iehova hna elëhni catre kowe la angetre Isaraela, matre nyidrëti a apatrenyi angatre pi qëmeke i nyidrë. Ngo lapa ju pe hi ngöne la nöj, la tribu ne Iudra.
19 Ngo ame fe la angetre Iudra, hnei angatr hna trije la itre hna amekötin hnei Iehova Akötresi angatr. Nge angatr a nyitipune jë la itre qenenöj hna kapa hnei angetre Isaraela. 20 Ame hnei Iehova fe hna trije la itre neköne la angetre Isaraela, me ahmahmanyi angatr, me nue angatr kowe la itre atrekënö, uti hë la nyidrëti a ase apatrenyi angatr qëmeke i nyidrë. 21 Nyidrëti a thepe Isaraela jë qaathene la fami i Dravita, nge hnei Isaraela hna ië Ieroboama nekö i Nebata troa joxu i angatr. Ngo hnei Ieroboama hna uku Isaraela troa nuetriji Iehova, me kuca la ketre ngazo ka tru. 22 Nge hnene la angetre Isaraela hna kuca la nöjei ngazo hna kuca hnei Ieroboama. Nge tha mano kö angatr kuca lai, 23 uti hë la Iehova a ase apatrenyi angetre Isaraela qëmekei nyidrë, tune lo aqane qaja i nyidrë jëne la itre hlue i nyidrë, itre perofeta. Matre hna oth me kötre fë la angetre Isaraela e Asuria uti hë la drai ce.
24 Nge hnene la joxu ne Asuria hna hëne la itre xa atr qa Babulona, qaane Kutha, me Ava, me Hamath, me Sefaravaima. Nyidrëti a alapa angatre jë ngöne la nöje Samaria troa nyihnai angetre Isaraela. Matre hnene la itre atre cili hna thapa la itre traon ne Samaria, me lapan itre ej. 25 Ngo ame hë lo angatr a xötrei lapa e Samaria, tha hnei angatre kö hna xoue* Iehova. Matre hnei Iehova hna nue nyipi angatr la itre liona, troa humuthe la ka ala nyim. 26 Thupene lai, hna qaja kowe la joxu ne Asuria ka hape: “Ame la itre atr hnei nyipëti hna alapan ngöne la itre traon ne Samaria, ke thatre kö angatre la hmi* ne la Haze ne la nöje cili, ke pëkö ala casi ka atre la hmi ne la nöje Samaria. Celë hi matre, hnene la Haze cili hna upe lapaane la itre liona troa humuthi angatr.”
27 Matre önine la joxu ne Asuria ka hape: “Upe hmaca jë la ketre atre huuj hnei epuni hna oth me kötre fë, matre tro angeic a lapa e cili, me inine la itre atr la hmi ne la Haze ne Samaria.” 28 Matre hnene la ketre atre huuj hna xome kowe la nöje trenyiwa, hna bëeke hmaca troa lapa e Bethela. Nge hnei angeic hna nyiqane inine la itre atr, la aqane tro angatr a xoue Iehova.
29 Ngo hnene la itre atr ka lapa e Samaria hna isa kuci hazen, me amë la itre haze i angatr hnine la itre uma hmitrötr ne la itre hnë hmi gaa hmitrötr, lo hna xup hnene la angetre Samaria. Nge hnene la itre nöj hna isa kuca lai ngöne la itre traon hnei angatr hna lapan.
30 Matre hnene la angetre Babulona hna kuca la idrola i Sokutha-benotha, nge hnene la angetre Kutha hna xupe la idrola i Neregala, nge hnene la angetre Hamath hna kuca la idrola i Asima, 31 nge hnei angetre Avi hna kuca la idrola i Nibehaza, memine la idrola i Taretaka, nge hnei angetre Sefaravaima hna dreuthe la itre nekö i angatr trahmany koi Aderamelek, me koi Anamelek, lo lue haze ne Sefaravaima. 32 Angatre hi a xoue Iehova, ngo hnei angatre pe hna acile la itre atre menu troa atre huuj hnine la itre hnë hmi gaa hmitrötr. Nge ame la itre atre huuj cili, angatr a hmi thatraqane la nöj, hnine la itre uma hmitrötr ne la itre hnë hmi gaa hmitrötr. 33 Angatre hi a xoue Iehova, ngo angatre kö a nyihluene la itre haze i angatr, ene lo hmi ne la itre sipu nöje i angatr.
34 Nge uti pala hi enehila, itre nöje cili a hmine lo hmi angatr, nge pëkö atre ka nyihlue i Iehova thei angatr. Nge pëkö ala cas ka metrötrëne la nöjei wathebo i nyidrë, me itre hna amekötin, me itre hna ahnith, lo hna hamën koi itre nekö i Iakobo, lo hnei Iehova hna ati ëjene ka hape, Isaraela. 35 Ame lo Iehova a isisinyikeu me angetre Isaraela, hnei nyidrëti hna amekötine ka hape: “Tha tro kö epuni a xouene la itre xa haze. Nge tha tro kö epuni a thili koi angatr. Tha tro kö epuni a nyihlue i angatr, me huuje koi angatr. 36 Ngo Iehova la nyine tro epuni a xouen, nyidrëti lo atre thepe epuni qa Aigupito hnene la men atraqatr, me ime ka catr.* Haawe, qa i epuni troa thil me tro fë huuj qëmekei nyidrëti hmekuje hi. 37 Nge ame la itre hnei nyidrëti hna isenyin, me amekötin, me wathebon me ahnith, lo hnei nyidrëti hna fejane koi epun, qa i epuni troa trongëne hnyawan, nge tha tro kö epuni a xouene la itre xa haze. 38 The thëthëhmine kö la isisinyikeu i easë, nge tha tro kö epuni a xouene la itre xa haze. 39 Ngo Iehova Akötresi epuni la nyine tro epuni a xouen, ke nyidrëti hi la ka atreine amele epun, qaathene la nöjei ithupëjia me epun.”
40 Ngo tha drenge kö la itre nöje cili, ke angatre kö a hmine lo hmi angatr. 41 Angatre hi a xoue Iehova, ngo angatre fe a nyihluene la itre idrola ne la itre haze i angatr. Matre ame pë hë la itre nekö i angatr, me itre api angatr, angatr a nyitipune la itre qaaqaa i angatr, nge uti pala hi enehila, hna tune fe hnene la itre matra i angatr.