Iobu
35 Nge öni Elihu hmaca jë ka hape:
2 “Hapeu, xecie kö koi nyipëti la hnei nyipëti hna qaja, matre öni nyipë,
‘Ka meköti kö ni hui Akötresie’?
3 Ke öni nyipë: ‘Nyine uën?*
Nemene la eloin e tha kuca kö ni la ngazo?’
4 Tro hë ni a sa koi nyipë
Me itre sinee i nyipë.
5 Gala jë draië nge goeëne jë,
Wange ju la itre iaw ka draië kö hui nyipë.
6 Maine tro nyipëti a kuca la ngazo, hnauëne pena tro Akötresie a akötr?
Nge maine nyimutre la itre tria i nyipë, hetre thangane kö koi nyidrë?
7 Nge maine ka meköti nyipë, nemene la hnei nyipëti hna hamë nyidrë;
Nge nemene fe la hnei nyidrëti hna kapa qaathei nyipë?
8 Ame la nyipë a thiina ka ngazo, nyipëti hi a akötrëne la itre atr ka tui nyipë,
Nge ame la nyipë a kuca la itre ewekë ka meköt, itre nekö i atr hmekuje hi la ka troa kepe eloin.
9 Ame la kola akötrëne la itre atr, angatr a itreijeny;
Nge angatr a sue matre troa thepe angatr qa ngöne la musi* ne la itre ka catr.
10 Ngo pëkö atre ka qaja ka hape: ‘Ekaa Akötresie, lo Atre Xupi ni,
Atre upi ni troa nyima ngöne la jidr?’
11 Sisitria kö la aqane ini së hnei nyidrëti hune la itre öni e celë fen,
Me aqane ainamacanë së hune la itre waco e caha.
12 Kola itreijenyi la itre atr, ngo tha sa kö nyidrë,
Pine la aqane pi tru ne la itre atr ka ngazo.
13 Tha Akötresieti kö a drenge la itre treij ne la itre atr ka thoi;
Nge tha nyidrëti kö a semesine angatr.
14 The qaja pala ha e tro nyipëti a eetr, ke tha öhnyi nyidrëti kö hnei nyipë!
Thei Akötresieti hë la jole i nyipë, haawe, loi e tro nyipëti a lapa treqe nyidrë.
15 Ke tha hnei nyidrëti kö hna ameköti nyipë ngöne la nyidrëti a elëhni;
Me wangatrune la itre trengewekë i nyipë ka menu.
16 Hnei Iobu hna fe menune la që i nyidrë;
Nge pëkö atrehmekune i nyidrë, matre tha mano kö nyidrëti ithanata.”