Itre Edromë
13 Ame la nekön ka inamacan, ke angeic a wangatrune la hna ini angeic hnei kem,
Ngo ame kö la atr ka ihnyimasai, ke tha ka drenge kö la ihaji.*
2 Ketre atr a xen la ka loi, jëne la itre trengewekë ka tro qa ngöne la që i angeic,
Ngo ame kö la atr ka mele thoi, ke angeic a ajane la isi.
3 Ame la ka thupëne la itre trengewekë* i angeic, ke ka thupëne la mele i angeic,
Ngo ame la ka fe angangane la që i angeic, ke ka tro kowe la hnëjin.
4 Tru hi la hna ajan hnene la geny, ngo pë pe hna hetreny,
Ngo ame kö la atre catre huliwa, ke tro angeic a hetrenyi asë.*
5 Methi ne la atr ka meköt la thoi,
Ngo itre huliwa ne la atr ka ngazo a axulun la hmahma me hnëjin.
6 Kola thupëne la atr ka pë engazon hnene la meköt,
Ngo ame kö la iakötrë, ke ej a akeine la atr ka ngazo.
7 Hetre atr ka nyi trenamo, ngo pë pe hna hetreny;
Hetre atr ka nyi pë ewekë, ngo ka trenamo pe.
8 Tro la trengamo ne la atr a nyi thupene mel koi angeic,
Ngo pë fe kö ka troa traqa* kowe la itre ka pë ewekë.
9 Troa mele catre* la laam ne la itre ka meköt,
Ngo tro ha pi la laam ne la itre ka ngazo.
10 Ame la pi tru, ke ej a aciane la iwesitrë,
Ngo thatraqane la itre ka thele eamo* la inamacan.
11 Tro ha ae la trengamo hna canga kapa,
Ngo tro ha kökötre la trengamo hna nango xawan* trongën.
12 E troa itreqe aqeany,* ke tro ha wezipo la hni,
Ngo e canga traqa la hna ajan, ke sinöe ne mel.
13 Troa xeni pun hnene la ka methinëne la hna amekötin,*
Ngo troa amanathithine la ka metrötrëne la wathebo.
14 Qeqe ne mel la ini* hna hamën hnene la ka inamacan
Ej a ajean qa ngöne la itre hnö ne la mec.
15 Ame la atr ka atreine thelewekë, ke tro ha kepe angeic,
Ngo ka xozaxoza la gojenyi ne la itre atr ka mele thoi.
16 Ame la atr ka inamacan, angeic a huliwa cememine la atrehmekun,
Ngo ame kö la hmo, angeic a amamane la aqane hmo i angeic.
17 Ame la atre ka ngazo thiina ka tro fë la maca, angeic a kei kowe la akötr,
Ngo ame la hna up ka mele nyipici, angeic a tro fë la nyine ameun.
18 Tro ha pë ewekë me hmahma la atre wangesixan la ihaji,*
Ngo tro ha atrune la atre nyipiewekëne la ihaji.*
19 Ka lolo la kola eatr la hna ajan,
Ngo xele kö la itre hmo troa ananyine la ngazo.
20 Ame la atre ce tro me itre ka inamacan, ke tro ha inamacan,
Ngo ame la atre epe kowe la itre hmo, ke tro hë angeic a jol.
21 Kola xötrethengen la itre atr ka ngazo hnene la akötr,
Ngo tro ha trenamo la itre ka meköt.
22 Ame la atr ka loi thiina, angeic a hnëkë edrö kowe la itre api i angeic,
Ngo ame la trengamo ne la atr ka ngazo, ke thatraqane pë hë la atr ka meköt.
23 Kola ham atrune la dro hna troon ne la ka pë ewekë,
Ngo ijije tro ej* a patr hnene la huliwa ka tha meköti kö.
24 Ame la atre cipane la jia,* ke ka methinëne la nekö i angeic,
Ngo ame la atre hnimi kuku, ke tha cile kö angeic troa haji* nyën.
25 Kola xeni mej la atr ka meköt,
Ngo ka nanyi la hni ne la atr ka ngazo.