Mika
6 Pane drenge ju la hna qaja hnei Iehova.
Cile jë, nge isigöli eö jë qëmekene la itre wetr,
Nge epi tro la itre sasala a dreng la nine i ö.
2 Itre wetre fe, drenge ju la Iehova a ikootrë,
Epun itre trepene ka catr ne la ihnadro,
Ke Iehova a kootrëne la nöje i nyidrë;
Nyidrëti a troa ameköti Isaraela me hape:
3 “Nemene la hnenge hna kuca koi ö, nöjeng?
Hnenge hna akucakucanyi ö tune kaa?
Pane qaja amamane jë la ngazong.
4 Hnenge hna thepe eö qa Aigupito,
Hnenge hna itö eö qa ngöne la nöje ka thahluë eö;
Hnenge hna upi Mose, me Arona, me Miriama qëmekei ö.
5 Nöjenge fe, the thëthëhmine kö lo hna pi kuca hnei Baraka joxu ne Moaba,
Memine la aqane sa i Balaama nekö i Beora
Lo jol ka traqa nyipin e Sitima me Gilegala
Matre tro eö a atre la itre huliwa ka meköt i Iehova.”
6 Nemene la nyine tro ni a traqa fë qëmekei Iehova?
Nemene la nyine tro ni a traqa fë matre thil kowe la Akötresie e koho?
Tro kö ni a traqa fë la itre huuje ne dreuth asë,*
Me itre neköi kau ka ca macatre?
7 Tro kö Iehova a kapa madrine la itre mamoe trahmany ka nyimutre,
Memine la oel ne oliv ka neni catr tune la itre hneopegejë?
Tro kö ni a nue la pane neköng pine la icilekeung,
Memine la neköng* göne la ngazong?
8 Ase hë nyidrëti amamai ö la ka loi.
Nge nemene la hnei Iehova hna thele* thei ö?
Ene hi la troa kuca la meköt, me ajane la mele nyipici,*
Me ipië ngöne la eö a ce tro memine la Akötresi ö!
9 Kola hëne la traon hnene la nine i Iehova;
Tro la itre ka huliwane la inamacan a xouene la ëje i nyipë.
Nyipiewekëne ju la jia nge drenge ju la atre acil ej.
10 Hapeu, hetrenyi pala kö ngöne la uma ne la atr ka ngazo, la itre mo hna kapa qa ngöne la hna iakötrë
11 Tro pala kö a wië la thiinang* e tro ni a huliwane la itre itulu ka tria,
Me itre wene tulu ka tria?
12 Ke ka iakötrë la itre trenamo ne la traon,
Nge ka thoi la itre atren;
Ka iaö la thineme i angatr ngöne la itre që i angatr.
13 “Celë hi matre, tro ni a lepi ö me eatrë eö,
Nge tro hë eö a patr pine la itre ngazo i ö.
14 Tro eö a xen, ngo tha tro kö eö a mej;
Tro pala hi a nanyi* la hni i ö.
Ame la hnei ö hna troa amë acon, ke thatreine kö eö troa lapa fë,
Nge ame la hnei ö hna atreine kötre fë, ke tro hë ni a nue kowe la ithupëjia.*
15 Tro eö a traan, ngo tha tro kö eö a menuën.
Tro eö a öje la itre wene oliv, ngo tha tro kö eö a huliwane la oel;
Tro eö a wajawaja la itre wene rezë,* ngo tha tro kö eö a iji la waina.
16 Ke epuni a trongën la qenenöje i Omera, me itre huliwa i Ahaba me fami i angeic,
Nge epuni a xötrethenge la itre thupaca* i angatr.
Celë hi matre tro la itre atr a sesëkötre ngazo pine la aqane tro ni a ameköti ö
Nge tro ha qejin la itre atren ej;*
Tro ha methinë epun hnene la itre nöj.”