Itre Edromë
12 Ame la atre hnime la ihaji,* ke angeic a wangatrune la atrehmekun,
Ngo ame la atre methinëne la iameköti, ke ka pë inamacan.
2 Iehova a kapa la ka loi thiina,
Ngo nyidrëti a amekötin la ka mekun troa kuca la ngazo.
3 Pëkö atr ka mele tingeting nge kolo pe a iakötrë,
Ngo ame kö la atr ka meköt, pëkö ka atreine fejetriji angeic.
4 Ame la föe ka loi thiina, ke korona ne la föi angeic,
Ngo ame la föe ka kuca la nyine hmahman, ke kösë mec ka xuje la itre ijun.
5 Ame la itre mekun ne la itre atr ka meköt, ke ka nyipici,
Ngo ame kö la itre eamo ne la itre atr ka ngazo, ke ka iaö.
6 Ame la itre hnaewekë ne la itre atr ka ngazo, ke ketre theth hna mecin,*
Ngo ame kö la që ne la itre atr ka meköt, ke kola amele angatr.
7 Ame la kola kapasaitrën la itre atr ka ngazo, ke patre pi hi angatr,
Ngo tro kö a cile la uma ne la itre atr ka meköt.
8 Troa qaja aloine la atr ka huliwan inamacanëne la që i angeic, me thupën ej,
Ngo troa thaipiëne la hni ne la atr ka iaö.
9 Ka loi ju kö la atr hna qaja angazon ngo ka hetre hlu
Hune la troa pi mama, ngo pë pe xen.*
10 Ame la atr ka meköt, angeic a thupëne hnyawa la itre si* i angeic,
Ngo ame kö la atr ka ngazo, ke mekune ju hë angeic ka hape, ka utipin angeic, ngo ka iakötrë pe.
11 Ame la atr ka eëny, tro angeic a xeni mej,
Ngo ka pë wangatrehmekune* la atre nyinyape thenge la ka pë alien.
12 Ame la atr ka ngazo, angeic a piine la itre ewekë hna thapa hnene la itre xaa atr ka ngazo,
Ngo ame la iwaane la itre atr ka meköt, ke ej a wa wen.
13 Jötre hë la atr ka ngazo hnene la itre trengewekë i angeic ka iakötrë,
Ngo mele kö la atr ka meköt qa ngöne la iakötrë.
14 Jëne la itre trengewekë ka tro qa ngöne la që i angeic, kola amejine la ketre atr hnene la itre ewekë ka loi,
Nge tro angeic a kepe thangane la huliwa ne la lue ime i angeic.
15 Ame la aqane ujë ne la hmo, ke ka meköti kö koi angeic,
Ngo ame la atr ka inamacan, ke ka dreng la itre eamo.
16 Ame la hmo, ke angeic a canga* amamane la elëhni i angeic,
Ngo ame la atr ka atreine waiewekë, tha dreng akötrëne* kö angeic la iqaqa.
17 Ame la temoë ka mele nyipici, ke ka qaja la nyipici,*
Ngo ame kö la temoë ka thoi, ke ka qaja la itre trengewekë ka iaö.
18 Ame la kola ithanata menu, ke kösë kola thin hnei taua,
Ngo ame kö la thineme ne la ka inamacan, ke ka ameun.
19 Ka epine palua la ukeineqë ka qaja la nyipici,
Ngo canga tro hi a patre la thinem ka thoi.
20 Ame la itre ka eköthe la ngazo, ke ka tiqa la hni i angatr hnei iaö,
Ngo ame la itre ka sajuëne* la tingeting, ke ka madrin.
21 Pëkö ngazo ka troa traqa kowe la atr ka meköt,
Ngo tro ha traqa itrai la itre akötr kowe la atr ka ngazo.
22 Methi Iehova la itre ukeineqë ka thoi,
Ngo ka amadrinë nyidrëti pe la itre atr ka mele nyipici.
23 Ame la atr ka atreine waiewekë, ke angeic a juetrën la hnei angeic hna atre,
Ngo ame la hni ne la itre hmo, ke kola nue jëne la qenahmo.
24 Tro ha mus la iwanakoime ne la itre ka catre huliwa,
Ngo tro ha folosane la itre ime ka geny.
25 Ame la hnehengazo e kuhu hni ne la atr, ke kola hnöthe* la mele i angeic,
Ngo kola amadrinë angeic hnene la itre ithanata ka lolo.
26 Ame la atr ka meköt, angeic a wang trongëne la itre hna axö öni i angeic,
Ngo ame kö la aqane ujë ne la itre atr ka ngazo, ke ka amenu angatr.
27 Tha ka thele tha kö la itre ka geny,
Ngacama edrö ne la atr la troa catre huliwa.
28 Jëne mel la gojenyi ne la meköt;
Pëkö mec ngöne la gojenyi cili.