Deuteronomi

9 “Isaraela fe, drenge ju! Ame enehila, tro eö a sasaithe la hneopegejë Ioridrano me thapa la itre nöje ka tru, nge ka catre kö hui ö, lo itre traone ka tru nge hna eköhagen uti hë e hnengödrai, 2 ketre nöje ka tru nge ka qea hmae, itre nekö i Anaka, lo hnei ö hna atre me drei mejen ka hape: ‘Drei la ka atreine cile kowe la itre nekö i Anaka?’ 3 Matre loi e tro eö a atre enehila laka, tro Iehova Akötresi ö a sasaithe la Ioridrano qëmekei ö. Ceitu i nyidrë me eë ka catrehnin; tro nyidrëti a apatrenyi angatr. Qëmekei ö, tro nyidrëti a akeinyi angatr, matre tro eö a canga helënetriji* angatr, me humuthi angatr, tune lo hnei Iehova hna sisinyi koi ö.

4 “Ame hë la Iehova Akötresi ö a helë angatr qëmekei ö, ke the qaja kö e kuhu hni i ö ka hape: ‘Hnei Iehova hna lö sai ni ngöne la nöj matre troa thapa la nöj, ke ka meköti ni.’ Ngo hnei Iehova pe hna helëne la itre nöje cili qëmekei ö, ke itre nöj ka ngazo thiina angatr. 5 Tha hnene kö laka, ka meköti ö nge ka meköt la hni i ö, matre eö a lö me thapa la itre nöje i angatr. Ngo hnene pe laka, itre nöj ka ngazo thiina angatr, matre Iehova Akötresi ö a helë angatr qëmekei ö, göne tro pala hi a eatrëne la hnei Iehova hna sisiny kowe la itre qaaqaa i ö, ene Aberahama, me Isaaka, me Iakobo. 6 Haawe, lapa atre ju laka, tha hnene kö laka, ka meköti ö matre Iehova Akötresi ö a hamë eö la nöje ce ka lolo, ke nöje ka catre he* eö.

7 “Mekune kö lo ijin epuni a aelëhni Iehova Akötresi epun ngöne la hnapapa. The thëthëhmine pi kö. Qaane lo drai ne epuni a tro qa Aigupito, uti hë la epuni a traqa ngöne la götrane ce, hnei epuni pala hi hna icilekeu me Iehova. 8 Ketre tune fe e Horeba, hnei epuni hna jele la trengehni i Iehova. Tru catre la elëhni i Iehova, matre hnei nyidrëti hna mekun troa apatrenyi epun. 9 Ame lo eni a elë hune la wetr troa xome la lue sine etë, ene lo lue sine etë ne isisinyikeu i Iehova me epun, hnenge hna lapa e cili koi 40 lao drai me 40 lao hej, nge tha ase kö ni xeni me ij. 10 Ame hnei Iehova hna hamë ni la lue sine etë hna cinyianyin hnene la hene wanakoime i nyidrë. Nge hune lue ej la itre trengewekë hna qaja hnei Iehova hune la wetr, nyipine la eë, ngöne lo epuni a icasikeu. 11 Thupene la 40 lao drai me 40 lao hej, hnei Iehova hna hamë ni la lue sine etë, ene lo lue sine etë ne isisinyikeu. 12 Öni Iehova jë hi koi ni: ‘Mejë jë, nge canga uti pi qa la, ke ame la nöje i ö, lo hnei ö hna tro xom qa Aigupito, ke angatr a kuca la ngazo. Nge saqe hi angatr jea qa ngöne la gojeny hnenge hna upi angatr troa trongën. Hnei angatr hna xupe la ketre idrola.’* 13 Thupene lai, öni Iehova koi ni: ‘Öhne hë ni laka, ka catre he la nöje ce.’ 14 Pane nue ni pi, matre tro ni a apatrenyi angatr, me köletrij la ëje i angatr qa celë fen, nge tro hë ni a kuca matre tro eö a nöje ka catr, me ala nyimu kö hui angatr.’

15 “Ame hnenge hna uti qa ngöne la wetr ka mel hnei eë. Hnenge hna uti fë la lue sine etë ne isisinyikeu. 16 Nge hnenge hna öhne laka, ase hë epuni ngazo koi Iehova Akötresi epun! Hnei epuni hna xupe la neköi kau fao. Nge canga saqe hi epuni jea qa ngöne la gojeny hnei Iehova Akötresi epuni hna upi epun troa trongën. 17 Ame hnenge hna xome la lue sine etë, me kuiënetrij, me thëtrij qëmekei epun. 18 Thupene lai, hnenge hna sa iwatingöneca qëmekei Iehova koi 40 lao drai me 40 lao hej, tun e cili lo. Tha ase kö ni xeni me ij, pine la itre ngazo hnei epuni hna kuca, ene la itre ewekë ka ngazo qëmekei Iehova, matre troa akötrë nyidrë. 19 Ke eni lo a meci hnei xou pine la aqane elëhni i Iehova koi epun; tru catre la elëhni i nyidrë matre nyidrëti a pi apatrenyi epun. Ngo ame pe, hnei Iehova hmaca kö hna drei ni.

20 “Tru catre la elëhni i Iehova koi Arona, matre hnei nyidrëti hna pi humuthi angeic. Ngo hnenge fe hna xëwe sai Arona ngöne la ijine cili. 21 Ase jë lai, hnenge hna xome la neköi kau, lo hatrene la ngazo i epun, me dreuthetrij ej. Hnenge hna waja fici ej. Hnenge hna ahmudrohmudron ej uti hë la tro ej a tune la xaxau, nge hnenge hna trije la xaxau ngöne la tim ka neni qa ngöne la wetr.

22 “Hnei epun mina fe hna jele la trengehni i Iehova e Tabera, me e Masa, me e Kiberoth-Hataava. 23 Nge ame lo Iehova a qaja koi epun e Kadesi-Banea, ka hape: ‘Elë jë nge thapa pi la nöj hnenge hna troa hamë epun!’, ke hnei epuni hmaca hna icilekeu memine la hna amekötin hnei Iehova Akötresi epun. Tha drei nyidrëti kö hnei epun, nge tha lapaune kö epun koi nyidrë. 24 Qaane lo eni a atre epun, hnei epuni pala hi hna icilekeu me Iehova.

25 “Celë hi matre hnenge hna sa iwatingöneca qëmekei Iehova koi 40 lao drai me 40 lao hej. Hnenge hna sa iwatingöneca, ke öni Iehova, tro nyidrëti a apatrenyi epun. 26 Nge hnenge hna xëwe koi Iehova, me hape: ‘Joxu Iehova fe, the apatrene kö la nöje i nyipë. Kolo atu ka co* i nyipë, lo hnei nyipëti hna nyithupen hnene la edraië i nyipë, me thapa qa Aigupito hnene la ime ka catre i nyipë. 27 Mekune ju lo itre hlue i nyipë, ene Aberahama, me Isaaka, me Iakobo. The goeëne catrën kö la aqane catre që ne la nöje ce, me aqane ngazo i angatr, me itre tria i angatr, 28 wanga qaja jë hnene la itre atrene lo nöj hnei nyipëti hna xomi huni qa ngön, ka hape: “Thatreine kö Iehova lö sai angatr ngöne la nöj hnei nyidrëti hna sisiny koi angatr. Nge pine laka, nyidrëti a methinë angatr, matre hnei nyidrëti hna xomi angatre qa la, troa mec ngöne la hnapapa.” 29 Ke angatr la nöje i nyipë me atu ka co i nyipë, lo hnei nyipëti hna tro xom qa Aigupito hnene la mene i nyipë, me ime ka catre* i nyipë.’