Levitiko

19 Nge öni Iehova hmaca koi Mose ka hape: 2 “Hape jë kowe la angetre Isaraela: ‘Hmitrötre ju epun, ke ame ni Iehova Akötresi epun, ka hmitrötre ni.

3 “‘Qa i epun troa isa metrötrë* kem me thin, me thupëne la itre sabathing. Iehova ni Akötresi epun. 4 Tha tro kö epuni a tro kowe la itre haze ka pë men, me kuci haze fao. Iehova ni Akötresi epun.

5 “‘Nge maine tro epuni a huujën koi Iehova la huuje ne tingeting, qa i epun troa huujën ej matre tro nyidrëti a kepe epun. 6 Tro ha öni la huuj ngöne la drai ne kola huujën ej me ngöne la drai thupen; tro pë hë a dreuthetrij la munën ngöne la hnaakönine drai. 7 Ngo maine tro la ketre a öni ngöne la hnaakönine drai, ewekë ka sisi lai, nge tha tro kö a kapa la huuje i angeic. 8 Ame la atre öni la huuje cili, tro hë angeic a xeni pun la ngazo i angeic, ke tha metrötrëne kö angeic la ewekë hna ahmitrötrën thatraqai Iehova; tro ha apatrenyi angeic qa ngöne la nöje i angeic.

9 “‘E tro epuni a menuëne la itre hlapa i epun, tha tro kö a menuën asë la itre ngon ne la hlapa, nge tha tro kö a menuën la ka lapa pe.* 10 Ketre, tha tro kö eö a menuëne la itre wene rezë i ö ka lapa pe hune la ivin, me hlem la itre wene rezë ka mala qa ngöne la ivine i ö. Ngo tro pë hë eö a nue lai, kowe la ka pë ewekë me kowe la trenyiwa. Iehova ni Akötresi epun.

11 “‘Tha tro kö epuni a atrekënö, me mele hnihni,* me huliwa thoi koi ketre me ketre. 12 Tha tro kö epuni a sisinyi thoi ngöne la ëjeng, me adrone la ëje ne la Akötresi ö. Iehova ni. 13 Tha tro kö eö a atrekënö la atre lapa easenyi ö, me thapa la itre ewekë i angeic. Tha tro kö eö a cipan uti hë elanyi hmakany la thupen ne la atre huliwa.

14 “‘Tha tro kö eö a ejine la ka simi hnangenyë, me amë la ketre ewekë qëmekene la timek; nge tro eö a xouene la Akötresi ö. Iehova ni.

15 “‘Tha tro kö a tria la aqane ameköti ewekë i epun. Tha tro kö eö a utipine* la atre pë ewekë, ke pëkö ewekë angeic, maine hnime la trenamo. Ngo tro pe eö a amekötine la atre lapa easenyi ö ngöne la meköt.

16 “‘Tha tro kö eö a tro fë trenge ithanata* ka thoi ngöne la nöje i ö. Tha tro kö eö a thele troa humuth* la atre lapa easenyi ö.* Iehova ni.

17 “‘Tha tro kö eö a methinëne la trejine me eö e kuhu hni i ö. Ngo nyipiewekë tro eö a hajine la atre lapa easenyi ö, matre tha tro kö eö a ngazo tui angeic.

18 “‘Tha tro kö eö a të la ngazo me lapa fë trenge hni kowe la nöje i ö; nge tro eö a hnime la atre lapa easenyi ö tui ö hi. Iehova ni.

19 “‘Qa i epun troa thupëne la itre wathebong: tha tro kö a ce hnaho la lue öni i ö ka isapengön. Tha tro kö eö a traan ngöne la zi i ö la lue feja ka isapengön. Nge tha tro kö eö a heetrëne la iheetr hna cane hnei lue thenyi ka isapengön.

20 “‘Maine tro la ketre trahmany a ce meköl memine la hlue föe, ngo hna othi eahlo pe kowe la ketre trahmany, nge tha hna itö eahlo pala kö maine nuamacanyi eahlo, ke tro ha të koi nyidro. Ngo tha tro kö a humuthi nyidro, ke hna othi eahlo. 21 Qa ne la trahmany troa tro fë ngöne la hnë lö ne la itat ne icasikeu, la huuj ne ialoinekeun thatraqai Iehova: ene la ca mamoe trahmany kowe la huuje cili. 22 Nge tro la atre huuj a huujëne thatraqane la atre cili, la mamoe trahmany nyine huuj ne ialoinekeun qëmekei Iehova, göne la ngazo i angeic; nge tro ha nue la ngazo i angeic.

23 “‘Ame hë la epuni a traqa ngöne la nöj, tro epuni a traa sinöe nyine xen, ngo tha tro kö* epuni a xeni la itre wene sinöe, ke ka pui ngazo lai koi epun. Ngöne la köni macatre, hna wathebo epuni troa xen la itre wene sinöe. 24 Ngo ame hë ngöne la hna 4 ne macatre, tro ha hmitrötr la itre wene sinöe, matre tro epuni a madrin qëmekei Iehova. 25 Ame ngöne la hna 5 ne macatre, tro hë epuni a xeni la itre wene sinöe me xome itre eje nyine nyixane la itre hnei epuni hna menuën. Iehova ni Akötresi epun.

26 “‘Tha tro kö epuni a öni la mitr hna tha anenine la madra. Tha tro kö epun a thele ewekë kowe la itre drai elany, me kuci haze.

27 “‘Tha tro kö epuni a cine* la itre xötre ezine la itre ihe i epun, me cine la itre xötre ezine la ienaje i ö.

28 “‘Tha tro kö epuni a xöje la ngönetrei i epun thatraqane la ka mec, me sija* la ngönetrei i epun. Iehova ni.

29 “‘The ahmahmane kö la nekö i ö jajinyi matre troa nyi föe ne gojeny, wanga tro la nöj a ujë tun, nge tro ej a tiqa hnei itre thiina ka ngazo.

30 “‘Qa i epun troa thupëne la itre sabathing, me metrötrëne* la uma maano. Iehova ni.

31 “‘The tro kö troa wange la itre ka ithanata me itre ka mec, me itre ka qajaqaja la itre drai elany; wanga apuingazonyi epuni jë. Iehova ni Akötresi epun.

32 “‘Tro eö a mejë qëmekene la itre ka qia he, me metrötrëne la itre qatr, me xouene la Akötresi ö. Iehova ni.

33 “‘Maine tro la ketre trenyiwa a lapa ngöne la nöje i epun, tha tro kö epuni a qanangazo angeic. 34 Ame la trenyiwa ka lapa thei epun, tro hë epuni a xome ceitu angeic me ketre atre Isaraela; nge qa i ö troa hnimi angeic tui ö hi, ke itre trenyiwa epuni lo e Aigupito. Iehova ni Akötresi epun.

35 “‘Tha tro kö epuni a qenatrekënö la epuni a tuluthe la eqean, me ehacen, memine la alien la itre ewekë. 36 Tro pe epuni a huliwane la itre tulu ka meköt, me itre wene tulu* ka meköt, me tuluth amekötine la itre ewekë ka qaqacil,* me ka neni.* Iehova ni Akötresi epun, lo atre amele epun qa Aigupito. 37 Matre qa i epun troa thupën asë la itre wathebong, me itre hnenge hna amekötin, me trongën itre ej. Iehova ni.’”