Ezekiela

18 Hnei Iehova hmaca hna ewekë koi ni, me hape: 2 “Kola hapeu la edromë celë hna qaja e Isaraela: ‘Hnene la itre keme hna iji wene rezë ka ija,* ngo itre neköne pë hë la ka megi inyö’?

3 “‘Maine nyipici laka, ka mele ni,’ öni Iehova Joxu Ka Sisitria, ‘tha tro hmaca kö epuni a qaja la edromë celë e Isaraela. 4 Dreng! Eni la atrekë ewekëne la mel, ene la mele ne la kem me kuku. Ame la atr ka kuca la ngazo, ke angeice hi la ka troa mec.

5 “‘Pane mekune jë laka, ketre atr ka meköt a kuca la ka loi me meköt. 6 Tha angeice kö a xeni la itre hna huujën kowe la itre idrola hune la itre wetr; tha angeice kö a ujë kowe la itre idrola ka sis* ne la nöje Isaraela; tha angeice kö a nyixetë* memine la föe ne la atre lapa easenyi angeic, me ce meköl memine la föe ka meci föe; 7 tha angeice kö a qanangazone la ketre atr, nge goi hamëne fe angeic la hatrene ti gufa kowe la atre sipo; tha angeice kö a atrekënöne la ketre atr, nge goi ce thawa fe angeic la a i angeic memine la itre ka mecijiin, me heetrën la ka lapa xöe; 8 tha angeice kö a hamën göi thupen, nge tha aja i angeice kö troa huliwa qenatrekënö; angeic a amekötin la lue atr thenge la meköt; 9 nge angeic pala hi a trongëne la itre wathebong me itre hnenge hna amekötin,* matre troa mele nyipici. Ka meköti la atre cili, nge tro kö angeic a mel,’ öni Iehova Joxu Ka Sisitria.

10 “‘Ngo pane mekune jë laka, angeic la keme ne la nekö trahmany ka atrekënö maine ka ihumuth,* maine ka kuca pena la ketre ewekë ka tune la 11 (ngacama tha hnene kö la kem hna hane kuca la itre ewekë cili): angeic a öni la itre hna huujëne kowe la itre idrola hune la itre wetr; angeic a nyixetë memine* la föe ne la atre lapa easenyi angeic; 12 angeic a qanangazon la atr ka aja ixatua nge ka pë ewekë; angeic a atrekënö; tha angeice kö a hamëne hmaca lo itre hatrene ti gufa; angeic a ujë kowe la itre idrola ka sis; angeic a kuca la itre huliwa hna xele ma wang; 13 nge angeic a hamën göi thupen. Tha tro kö la nekö trahmanyi cili a mel. Tro ha humuthi angeic pine la itre huliwa i angeic ka ngazo. Zö i angeice kö la angeic a mec.*

14 “‘Ngo pane mekune jë laka, öhn asë hi la nekö trahmany la nöjei ngazo hna kuca hnene la keme i angeic, ngo tha hane kö angeic kuca la itre ewekë cili. 15 Tha angeice kö a öni la itre hna huujën kowe la itre idrola hune la itre wetr; tha angeice kö a ujë kowe la itre idrola ka sis ne la nöje Isaraela; tha angeice kö a nyixetë memine* la föe ne la atre lapa easenyi angeic; 16 tha angeice kö a qanangazone la ketre atr; tha angeice kö a cipan la itre hatrene ti gufa; tha angeice kö a atrekënö; angeic a thawa la a i angeic memine la ka mecijiin, me heetrëne la ka lapa xöe; 17 tha aja i angeice kö troa qanangazone la ka pë ewekë; tha angeice kö a hamëne göi thupen; nge angeic a trongëne la wathebong me itre hnenge hna amekötin. Tha tro kö angeice lai a mec pine la ngazo ne la keme i angeic. Eje hi, tro kö angeic a mel. 18 Ngo ame kö la keme i angeic ka huliwa qenatrekënö, me atrekënö la trejin me nyidrë, me kuca la ngazo nyipine la nöj, ke tro nyidrëti a mec pine la ngazo i nyidrë.

19 “‘Ngo tro epuni a hnying ka hape: “Hnauëne laka, tha hna hane kö upezöne la nekön pine la ngazo i kem?” Pine laka, hnene la nekön hna kuca la loi me meköt, me metrötrëne la wathebong me trongëne la hnenge hna amekötin, tro kö angeic a mel. 20 Ame la atr ka kuca la ngazo, ke angeice kö la ka troa mec. Tha tro kö a upezöne la nekön pine la ngazo ne la kem, nge tha tro kö a upezöne la kem pine la ngazo ne la nekön. Tro kö a jelemekötine la atr ka meköt pine la huliwa i angeic ka meköt, nge tro kö a jelengazon la atr ka ngazo pine la huliwa i angeic ka ngazo.

21 “‘Ketre, maine tro la atr ka ngazo a nuetrije la nöjei huliwa i angeic ka ngazo, me metrötrëne la wathebong me kuca la loi me meköt, tro hë angeice lai a mel. Tha tro kö angeic a mec. 22 Tha tro kö a mekune hmaca la itre tria i angeic. Tro kö angeic a mel, ke hnei angeic hna kuca la meköt.’

23 “‘Hapeu, eni kö a madrine fë la meci ne la atr ka ngazo?,’ öni Iehova Joxu Ka Sisitria. ‘Tha eni kö lo a ajan tro angeic a saze aqane ujë matre mel?’

24 “‘Ngo maine tro la atr ka meköti a nue la itre huliwa i angeic ka meköt matre kuca la ngazo,* me itre ewekë hna sisine tune la itre atr ka ngazo, ke hapeu, tro kö angeic a mel? Tha tro hmaca kö a mekun lo itre ewekë ka meköt hnei angeic hna kuca ekö. Tro pe angeic a mec pine angeice mele thoi me kuca la ngazo.

25 “‘E cili, tro epuni a qaja ka hape: “Tha ka meköti kö la aqane ujë i Iehova!” Pane drenge ju, nöje Isaraela! Ka tria kö la aqane ujëng, maine aqane ujë i epuni pe la ka tria?

26 “‘Maine tro la atr ka meköt a nue la itre huliwa i angeic ka meköt me kuca la ngazo, nge tro angeic a mec pine lai, ke hnene kö la ngazo i angeic matre meci pi angeic.

27 “‘Nge e tro la atr ka ngazo a nue la aqane iakötrë i angeic matre kuca pena la loi me meköt, tro hë angeic a amele angeice kö. 28 E tro angeic a trotrohnin me nuetrije la itre ngazo i angeic, ke tro hë angeice lai a mel. Tha tro kö angeic a mec.

29 “‘E cili, tro hë la nöje Isaraela a hape: “Tha ka meköti kö la aqane ujë i Iehova!” Nöje Isaraela fe, hapeu, ka tria kö la aqane ujëng, maine aqane ujë i epuni pe la ka tria?’

30 “‘Celë hi matre, tro ni a ameköti epun thenge la isa aqane ujë i epun nöje Isaraela,’ öni Iehova Joxu Ka Sisitria. ‘Nuetrije pi la nöjei ngazo i epuni asë, eje hi, nuetrij asë pi, matre tha tro hmaca kö itre ej a akeinyi epuni kowe la ngazo. 31 Loi ju hë hna kuca la ngazo, ngo thele* jë pe troa hetrenyi la hni me mekun ka hnyipixe. Ke eje hi, hnauëne laka, tro epuni a mec, nöje Isaraela?’

32 “‘Tha madrine kö ni la kola mec la ketre atr,’ öni Iehova Joxu Ka Sisitria. ‘Haawe, saze aqane ujë pi matre mele pi epun.’”