Malaki
2 “Ngo enehila, itretre huuje fe, thatraqai epuni la hna amekötin celë! 2 Maine xele kö epuni ma dreng, nge maine tha wangatrune kö epuni la ëjeng,” öni Iehova joxu ne la itre trongene isi e hnengödrai, “tro hë ni a upe koi epun la hnëjin, me saze la itre manathithi epun koi hnëjin. Eje hi, hnenge hna saze la itre manathith koi hnëjin, ke tha hnei epuni kö hna wangatrune lai qa kuhu hni.”
3 “Goeën! Zöi epun matre eni ha apatrene* la itre itine feja hnei epuni hna jum. Nge tro hë ni a hna la agetrin kowe la ialameke i epun, lo agetrin ne la itre feete i epun; nge tro ha xomi epun koi angatr.* 4 Tro hë epuni a atre laka, hnenge hna hamëne la wathebo cili, matre tro pala hi a metrötrën la isisinyikeung me Levi,” öni Iehova joxu ne la itre trongene isi e hnengödrai.
5 “Ame lo isisinyikeung me angeic, ke isisinyikeu göi mel me tingeting, lue ewekë hnenge hna hamën koi angeic, matre hnei angeic hna xoue* ni. Hnei angeic hna xoue ni, eje hi, hnei angeic hna nyipi metrötrëne la ëjeng. 6 Eje ngöne la që i angeic la wathebo* ka nyipici, nge pëkö ewekë ka tha meköti kö ngöne la ukeineqë i angeic. Hnei angeic hna ce tro me eni ngöne la tingeting me meköt, nge ala nyimu la hnei angeic hna abëekën kowe la gojenyi ka meköt. 7 Eje hi, loi e tro pala hi a eje la atrehmekune ngöne la ukeineqë ne la atre huuj, nge loi e troa hnyingëne thel kowe la që i angeic la wathebo,* ke angeic la ka tro fë maca i Iehova joxu ne la itre trongene isi e hnengödrai.
8 “Ngo hnei epuni pe hna jea qa ngöne la gojenyi cili. Ala nyimu la hnei epuni hna akein pine la wathebo.* Hnei epuni hna angazon la isisinyikeung me Levi,” öni Iehova joxu ne la itre trongene isi e hnengödrai. 9 “Qa ngöne lai, tro hë ni a kuca matre troa methinë epun me thaipië epun qëmekene la nöj, ke tha hnei epuni kö hna trongëne la itre jëng, ngo hnei epuni pe hna ië hna hnim ngöne la epuni a trongëne la wathebo.”
10 “Hapeu, tha ca keme së kö lo? Tha hna xupi së kö hnene la Akötresie ka cas? Nga hnauëne kö hö la easa itö iaö, matre angazon la isisinyikeu ne la itre qaaqaa së? 11 Hnei Iudra hna mele thoi, nge hna kuca la ketre ewekë ka sis e Isaraela me Ierusalema; ke hnei Iudra hna adron la ehmitrötre* i Iehova, lo* hnei nyidrëti hna hnim. Nge hnei angeic hna xomi föe thene la itre neköne la haze trenyiwa. 12 Ame la nöjei pengöne* atr ka tro tun, ke tro Iehova a apatrenyi* angeic qa ngöne la itre itate i Iakobo, ngacama angeice ju hë a tro fë huuj koi Iehova joxu ne la itre trongene isi e hnengödrai.”
13 “Nge hetre ketre* ewekë hnei epuni hna kuca, nge ka atiqan la ita ne huuje i Iehova hnei itre trenge timidra, me treij me akötr, matre tha wangatrune hë nyidrëti la itre huuje i epun, nge tha kapa ha nyidrëti la itre hnei epuni hna tro fë. 14 Ngo epuni pe a hnying ka hape: ‘Pine nemen?’ Pine laka, hnei Iehova hna upezö eö, ke hnei ö hna nyixetëtrij la föe ne thupëtresiji ö, ngacama angeice hi la sinee i ö, me föe hnei ö hna isisinyikeu memin.* 15 Ame pe, hetrenyi pala kö thei epun la itre ka xele ma ujë tun, ke aja i angatr troa hetre matran ka sine la nöje i Akötresie. Angatr a tro thenge la ua. Haawe, thupëne kö la aqane waiewekë i epun, nge the nyixetëtrije kö la föe ne thupëtresiji epun. 16 Ke cane methinge* la seihnacil,” öni Iehova Akötresi Isaraela, “memine la atr ka hakuth la iheetre i angeic hnei iakötrë,*” öni Iehova joxu ne la itre trongene isi e hnengödrai. “Wange pala kö la aqane waiewekë i epun, nge the mele thoi kö.”
17 “Hmanono hë Iehova kowe la itre trengewekë i epun. Ngo öni epuni pe: ‘Nemene la hne huni hna kuca matre hmanono jë nyidrë?’ Ngöne la epuni a hape: ‘Ame la atr ka kuca la ngazo, ke ketre atr ka loi koi Iehova, nge nyidrëti a madrin kowe la itre atr ka tun,’ maine pena, ngöne la epuni a hape: ‘Ekaa la Akötresi ne la meköt?’”