Levitiko

16 Nge hnei Iehova hna ithanata koi Mose thupene la hna mec hnene la lue nekö i Arona, lo lue ka mec pine icilekeu me Iehova. 2 Öni Iehova jë hi koi Mose: “Qaja jë koi Arona mama i ö ka hape, tha tro kö angeic a lö lapa kowe la götrane gaa hmitrötr, tröne la imaano ne thewe hnahag. Nge tha tro kö angeic a cil qëmekene la ithingen ka ej hune la Pua, wanga meci pi angeic; ke tro hë ni a mama ngöne la iaw hune la thingen.

3 “Hane hi la nyine tro Arona a traqa fë ngöne la angeic a lö kowe la götrane gaa hmitrötr: ca neköi kau trahmany thatraqane la huuj ne ngazo, nge ca mamoe trahmany thatraqane la huuj ne dreuth asë. 4 Tro hë angeic a heetrëne la iheetr ka qea hna kuca hnei nyipi lino ka hmitrötr, memine la itre sine itrauziz lino ka troa juetrën la ngönetrei angeic. Nge qa i angeic troa sil ngöne la gö i angeic la otrene hni lino, me atuth la he i angeic memine la nyine atu he lino. Celë hi hnaheetr ka hmitrötr. Nge tro angeic a sië tim me heetrëne itre ej.

5 “Tro angeic a kapa qaathene la angetre Isaraela, la lue neköi nani trahmany nyine huuj ne ngazo, nge ca mamoe trahmany nyine huuj ne dreuth asë.

6 “Qa i Arona troa tro fë thatraqai angeic la kau nyine huuj ne ngazo, nge tro angeic a kuca tune lo hna majemin, ene la huuj ne ialoinekeun* thatraqai angeic, me fami* i angeic.

7 “Thupene lai, qa i angeic troa xome la lue nani trahmany me amë qëmekei Iehova ngöne la hnë lö ne la itat ne icasikeu. 8 Nge qa i Arona troa uthi drönegötiën* la lue nani trahmany, ca dröne göti thatraqai Iehova, nge cas thatraqai Azazele.* 9 Nge tro Arona a tro fë la nani trahmany hna amaman hnene la dröne göti thatraqai Iehova, me kuca la huuj ne ngazo. 10 Ngo ame la nani trahmany hna amaman hnene la dröne göti thatraqai Azazele, tro ha nu amelen ej qëmekei Iehova matre kuca tune lo hna majemin, ene la huuj ne ialoinekeun thatraqai angeic. Nge tro ha nue la nani koi Azazele ngöne la hnapapa.

11 “Nge qa i Arona troa tro fë thatraqai angeic la kau nyine huuj ne ngazo, nge tro angeic a kuca tune lo hna majemin, ene la huuj ne ialoinekeun thatraqai angeic me fami i angeic. Nge thupene lai, tro angeic a tro fë la kau nyine huuj ne ngazo i angeic.

12 “Tro angeic a atiqan la trepen eë hnei itre wanalep ka mel qa ngöne la ita ne huuj qëmekei Iehova, me xome fe la lue hnatrapaimë ka pui loi, me tro fë tröne la imaano ne thewe hnahag. 13 Nge qëmekei Iehova, tro angeic a nenge la ka pui loi hune la eë. Tro la haji ne la ka pui loi a lapan la thingen ne la Pua, ka ej hune la nyine Anyipicin matre tha tro kö angeic a mec.

14 “Nge qa i angeic troa xome la sine la madra ne la kau, me thathane* memine la hene wanakoime i angeic qëmekene la thingen, ngöne la götrane koië. Nge tro angeic a xome memine la hene wanakoime i angeic la sine la madra, me a 7 lao thathan qëmekene la thingen.

15 “Nge tro angeic a humuth kowe la nöj la nani trahmany nyine huuj ne ngazo. Nge tro angeic a tro fë la madran ej e tröne la imaano ne thewe hnahag, nge memine la madra cili, tro angeic a kuca tune lo madra ne la kau. Nge tro hë angeic a thathan ej qëmekene la ithingen.

16 “Qa i angeic troa kuca la huuj ne ialoinekeun thatraqane la götrane gaa hmitrötr, pine la itre huliwa ka pui ngazo ne la angetre Isaraela, me itre tria, me itre ngazo i angatr. Nge tro fe angeic a kuca tun kowe la itat ne icasikeu, lo ka cil nyipi angatr, me nyipine la itre huliwa i angatr ka pui ngazo.

17 “Tha tro kö la ketre atr a lapa hnine la itat ne icasikeu, qane ju hi la angeic a lö troa kuca la huuj ne ialoinekeun ngöne la götrane gaa hmitrötr, uti hmaca la angeic a tro. Tro hë angeic a kuca la huuj ne ialoinekeun thatraqai angeic, me fami i angeic, me nöje* Isaraela.

18 “Thupene lai, tro hë angeic a tro kowe la ita ne huuj ka ej qëmekei Iehova, matre kuca lo hna majemin, ene la huuj ne ialoinekeun thatraqane la ita ne huuj. Nge qa i angeic troa xome la sine la madra ne la kau trahmany memine la madra ne la nani trahmany, me köl la itre jian ne la ita ne huuj. 19 Nge tro angeic a xom memine la hene wanakoime i angeic la sine la madra, me a 7 lao thathane ngöne la ita ne huuj. Nge qa i angeic troa apuiloin me ahmitrötrën la ita ne huuj qa ngöne la itre huliwa ka pui ngazo ne la angetre Isaraela.

20 “Nge thupene la hna kuca lo hna majemin, ene la huuj ne ialoinekeun thatraqane la götrane gaa hmitrötr, memine la itat ne icasikeu, memine la ita ne huuj, qa i angeic troa tro fë la nani trahmany ka mel. 21 Nge qa i Arona troa atë la lue ime i angeic hune la he ne la nani trahmany ka mel, nge tro angeic a qaja amamane la itre ngazo hna kuca hnene la angetre Isaraela, memine la hnei angatr hna sasaithi wathebo, memine la itre tria i angatr. Nge qa i angeic troa atë itre ej hune la he ne la nani trahmany, me up ej kowe la hnapapa jëne la ketre trahmany hna acil thatraqane la huliwa cili. 22 Nge tro la nani trahmany a thu la itre tria i angatr ngöne la hnapapa. Nge tro angeic a nue la nani trahmany ngöne la hnapapa.

23 “Nge thupene lai, tro Arona a lö kowe la itat ne icasikeu me una la itre iheetre lino, lo hnei angeic hna heetrën lo angeic a lö hnine la götrane gaa hmitrötr, nge tro hë angeic a amë itre ej e cili. 24 Nge tro pë hë angeic a sië* tim ngöne la götrane gaa hmitrötr, me heetrëne la itre iheetre i angeic, me lö pi troa huujëne la huuj ne dreuth asë thatraqai angeic, memine la huuj ne dreuth asë thatraqane la nöj. Nge tro angeic a kuca tune lo hna majemin, ene la huuj ne ialoinekeun thatraqai angeic me thatraqane la nöj. 25 Nge qa i angeic troa huhajine hune la ita ne huuj la igiris ne la huuj ne ngazo.

26 “Nge ame lo trahmany ka nue lo nani trahmany thatraqai Azazele, ke tro angeic a wasin la itre iheetre i angeic me sië tim. Nge thupene lai, ijiji angeice hë troa bëeke hmaca ngöne la lapa.

27 “Nge ame la kau trahmany ne la huuj ne ngazo, memine la nani trahmany ne la huuj ne ngazo, lo hna traqa fë lo madra ngöne la götrane gaa hmitrötr matre kuca lo hna majemin, ene la huuj ne ialoinekeun, ke tro ha tro fë lue ej tröne la lapa. Nge tro ha dreuthetrije la ikupeine itre ej, memine la ijöne itre ej, memine la agetrine itre ej. 28 Nge ame la atre dreuthe itre ej, ke tro angeic a wasine la itre iheetre i angeic me sië tim. Nge thupene lai, ijiji angeice hë troa bëeke hmaca ngöne la lapa.

29 “Celë hi wathebo ka epine palua thatraqai epun, ngöne la hna 10 ne drai ne la hna 7 ne treu. Nge qa i epuni troa hleuhleu* pine la itre ngazo i epun, nge pëkö ka troa huliwa ngöne la ijine cili, ene la atre Isaraela, memine la trenyiwa ka lapa thei epun. 30 Nge ame ngöne la drai cili, tro ha kuca tune lo hna majemin, ene la huuj ne ialoinekeun thatraqai epun, matre apuiloinyi epun. Nge tro hë epuni a pui loi qëmekei Iehova qa ngöne la itre ngazo i epun. 31 Celë hi sabathi ne mano ka pexej koi epun, nge tro hë epuni a hleuhleu pine la itre ngazo i epun. Ke celë hi wathebo ka epine palua.

32 “Nge ame la atre huuj hna troa iën, me acil* ngöne la hnëqa ne atre huuj hnane la keme i angeic, qa i angeic troa kuca tune lo hna majemin, ene la huuj ne ialoinekeun, me heetrëne la itre iheetre lino, ene la itre iheetre ka hmitrötr. 33 Nge qa i angeic troa kuca tune lo hna majemin, ene la huuj ne ialoinekeun thatraqane la götrane gaa hmitrötr, memine la itat ne icasikeu, memine la ita ne huuj. Nge qa i angeic troa kuca tune lo hna majemin, ene la huuj ne ialoinekeun thatraqane la itre atre huuj, me thatraqane la nöje Isaraela. 34 Nge ame ngöne la macatre, tro hi a aca kuca lo hna majemin, ene la huuj ne ialoinekeun thatraqane la angetre Isaraela qa ngöne la itre ngazo i angatr. Celë hi wathebo ka epine palua thatraqai epun.”

Nge hnei angatr hna kuca thenge lo hnei Iehova hna ahnith koi Mose.