Pane Tus Samuela

25 E thupen, hna meci hnei Samuela. Matre hnene la nöje Isaraela asë hna itronyi troa treije pi angeic, me kelemi angeic ezine la hnalapa i angeic e Rama. Nge thupene lai, Dravita a tro ju kowe la hnapapa e Parana.

2 Nge e cili la ketre trahmanyi qa Maon, nge ka trene ume öni e Karemela.* Trenamo catr angeic, ke 3 000 lao mamoe i angeic, nge 1 000 lao nani. Nge ngöne la ijine cili, angeic e Karemela troa xötre pene mamoe. 3 Nabala la ëje i angeic, atrene la lapa i Kaleba. Nge Abigaila la föi angeic, föe ka mingöminge catr nge ka inamacan. Ngo ame Nabala, atre ka iakötrë nge ka ngazo thiina. 4 Nge ngöne la hnapapa, drenge ju hi Dravita laka, Nabala a xötre pene mamoe. 5 Matre angeic a upe pi la 10 lao nekö trahmany, troa wai Nabala e Karemela. Nge öni angeic: “E öhnyi nyidrëti hë epun, qaja ju ka hape, eni a pi atre la pengö i nyidrë. 6 Thupene lai, tro epuni a qaja ka hape: ‘Epi tro nyipëti a mel aqeany, nge epi troa loi* la mele i nyipë. Nge epi manathithe la fami i nyipë, me nöjei ewekë i nyipëti asë. 7 Ngo drenge hë ni laka, nyipëti a xötre pene mamoe, nge ame lo eahuni a ixelë me itre ka thupëne la ume öni i nyipë, tha hne huni kö hna qanangazo angatr. Nge ame lo angatr e Karemela, pëkö ca ewekë i angatr hna atrekënö. 8 Hnyingë angatre ju, nge tro kö angatr a qaja koi nyipë. Drai ne madrine* la, matre hnime ju la itre thupëtresij hna upe koi nyipë, nge maine hetre munëne xen i nyipë, pane hamëne pi koi angatr, me koi Dravita fe nekö i nyipë.’”

9 Ame hnene la itre atre i Dravita hna tro koi Nabala, me qaja hnyawa la maca hna upi angatr troa tro fë. Matre ame hë la angatr a ase ithanata, 10 öni Nabala: “A drei pena ha lae Dravita nekö i Iese? Ala nyimu hë la itre hlue enehila ka kötre maseta. 11 A tro na xome la falawang, me timing, me mitr hna hnëkën koi itre ka xötre pene mamoeng, matre hamëne kowe la itre ka tro menu?”

12 Ame hna bëeke hmaca jë la itre thupëtresij koi Dravita, me qaja asë koi Dravita la hna qaja hnei Nabala. 13 Nge öni Dravita jë hi: “Isa ajö tauane jë.” Angatr me Dravita a isa acatrei tauane ju ngöne la itre beletre i angatr. Matre kola easenyi koi 400 lao trahmanyi ka ce tro me Dravita, nge ala 200 ka lapa pe troa thupë trengetreng.

14 Nge ngöne la ijine cili, hnene la ketre hlue i Nabala hna thuemacanyi Abigaila la ewekë ka traqa. Öni nyën: “Hnei Dravita, lo ka lapa ngöne la hnapapa, hna upe la itre thupëtresij troa amanathithine la maseta së, ngo hnei maseta hna sue, me qaqa angatr. 15 Ngo hnei angatre hna loi thiina koi hun, nge tha hnei angatre kö hna akötrë hun, nge pëkö ca ewekë hna atrekënö, lo ce angatr me eahun ngöne la hnapapa.* 16 Nge ngöne la ijine eahuni a thupë öni ezi angatr, hnei angatre hna thupë hun e lai me jidr, kösë ihag xötreithi hun. 17 Matre, kuca jë la ketre ewekë, wanga traqa pi la ngazo kowe la maseta së, me easë fe. Ngo ka pë hnënyöngön la maseta së, pëkö ka atreine ithanata koi nyidrë.”

18 Abigaila a canga eöthe jë la 200 lao falawa, me lue trenge waina atraqatr, me 5 lao mamoe nyine tro pë hë a atron, me 5 lao sea* ne wene feja hna dreudreuth, me 100 lao gato vin* ka qaqacil, me 200 lao gato wacua ka qaqacil. Nge angeic a atë asë jë hune la itre boliko. 19 Thupene lai, öni Abigaila kowe la itre hlue ka hape: “Tro pa i epuni jë, nge qanyinge fe hi.” Ngo tha qaja pi kö angeic koi Nabala föi angeic.

20 Abigaila a të jë hune la boliko, me uti qa ngöne la wetr. Nge ame Dravita me itre atre i angeic, angatr a traqa koi Abigaila, ngo tha öhnyi eahlo kö, ke hna juetrën hnene la wetr. Ame hnei angatre hna ixelë. 21 Nge Dravita a ithanata me hape: “Luzi kö lo eni a thupëne la itre ewekë ne la atre ce, ngöne la hnapapa. Pëkö hna atrekënö thei angeic, ngo angeice a të la loi hnei ngazo. 22 Epi tro Akötresie a të la ngazo kowe la itre ithupëjiang, e tha humuthe kö ni elanyi hmakanyi la itre trahmanyi* thei angeic.”

23 Nge ame hë la Abigaila a öhnyi Dravita, eahlo a canga uti pi qa hune la boliko, me sa iwatingöneca qëmeke i Dravita, me thil. 24 Abigaila a kei ju kowe la lue ca i Dravita, me hape: “Joxung, eni hi la atrekë zön, ngo pane nue ni pi troa ithanata koi nyipë. Pane drenge ju la hlue i nyipë. 25 Joxung, the semesine Nabala* kö, ke ka pë hnënyöngön. Nge angeice kö a trongëne la ëje i angeic, ke hmo lai. Ngo ame ni hlue i nyipë, tha öhne kö ni lo itre thupëtresij hnei nyipëti hna up. 26 Nge enehila joxung, eni a sisinyi qëmeke i Iehova, Akötresie ka mel, me qëmeke i nyipë laka, Iehova la ka sewe nyipë troa humu atr, me të* la ngazo. Nge epi tro la itre ithupëjia, me itre ka pi tru koi nyipë a tui Nabala. 27 Nge enehila joxung, thawa pi kowe la itre thupëtresij, la itre ahnahna* hnenge hna traqa fë koi nyipë. 28 Nge joxung, epi nue pi la ngazong. Tro kö Iehova a kuca, matre troa mel aqeanyi la itre matra i nyipë, ke itre isi i Iehova la hnei nyipëti hna isigölin. Nge pëkö ewekë ka ngazo hnei nyipëti hna kuca, qaane lo kola hnaho nyipë. 29 Nge e traqa jë ketre atre thele troa humuthi nyipë, tro Iehova Akötresi nyipë a thupëne la mele i nyipë, kösë hna atuth hnine watreng. Ngo tro nyidrëti a jumetrije la mele ne la itre ithupëjia me nyipë, tune la etë lo kola tha trehle. 30 Nge e pexeje hë la itre manathith hnei Iehova hna thingehnaean koi nyipë, nge e tro hë nyidrëti a acili joxu nyipë hui Isaraela, 31 tha tro kö a hace* la hni i nyipë, ke pëkö madra hnei nyipëti hna anenine menun, nge tha hnei nyipëti kö hna të* la ngazo. Matre joxung, e amanathithi nyipëti hë hnei Iehova, meku ni fe kö, hlue i nyipë.”

32 Öni Dravita jë hi koi Abigaila ka hape: “Loi e troa atrunyi Iehova, Akötresi Isaraela, ka upi eö enehila troa ixelë me eni! 33 Nge epi tro Akötresie a amanathithine la aqane tuluewekë i eö! Enehila, hnei eö hna sewe ni troa ihumuth, me të* la ngazo. 34 Qëmeke i Iehova Akötresi Isaraela ka mel, lo atre sewe ni troa ngazo koi eö, maine tha traqa ju eö troa canga wai ni, traqa pë hë elanyi hmakany, nge meci asë hë la nöjei trahmanyi* ka huliwa koi Nabala.” 35 Dravita a kapa ju la itre hnei eahlo hna traqa fë, nge öni angeic: “Bëeke jë memine la tingeting kowe la hnalapa i ö, ke öhne hi ö lai laka, eni a drenge la hnei ö hna qaja. Tro hë ni a kapa la sipo i ö.”

36 Ame hnei Abigaila hna bëeke kowe la hnalapa i eahlo, nge Nabala* a xeni atruny kösë joxu. Madrine catr angeic, nge ka hnaitö hnyawa. Matre tha ithanata pi kö Abigaila qëmekene troa fetra la jö. 37 Nge e thupen ngöne la hmakany, lo tha hnaitö hë Nabala, hnene la föi angeic hna qaja asë koi angeic la ewekë ka traqa. Haawe, tha mano ju hi la wenethëhmi i Nabala, kösë atre ka mec. Nge tha enije hë angeic, kösë ietë. 38 Nge ma thupene la 10 lao drai, Iehova a humuthi Nabala pi.

39 Nge ame hë la Dravita a drenge ka hape, meci hë Nabala, öni angeic: “Epi troa atrunyi Iehova, ke hnei nyidrëti hna isigöli ni, thupene la hna qaqa ni hnei Nabala. Nge hnei nyidrëti hna sewe ni troa kuca la ngazo. Hnei Iehova hna abëekëne la ngazo i Nabala kowe la he i angeic!” Thupene lai, Dravita a upe pi la itre ka tro fë maca koi Abigaila, me sipone troa föi angeic. 40 Matre hnene la itre ka tro fë maca i Dravita hna tro ju a tro Karemela troa wai Abigaila, nge öni angatr: “Hnei Dravita hna upi hun koi eö, ke angeic a pi xomi ö.” 41 Abigaila a sa iwatingöneca pi me hape: “Hape ju kowe la joxung ka hape, öning, eni la hlue i nyipë. Nge aja i eni troa wasine la lue ca ne la itre hlue ne la joxung.” 42 Haawe, Abigaila a mejë jë me të hune la boliko i angeic, nge 5 lao hlu jajiny ka trongë ihnadro me ixötrethenge. Abigaila a xötrethenge lo itre ka tro fë maca, nge angeic a föi Dravita jë.

43 Nge hnei Dravita fe hna faipoipo me Ahinoam qa Iezerela. Nge nyidro la lue föi Dravita.

44 Ngo ame Mikala, lo pane föi Dravita, hnei Saulo hna hamën nyine föi Paleti, nekö i Laisi qa Galim.